Read CHUYA QELLQA La Biblia en Quechua de Ayacucho 2012 Miqueas 3 Bible Online

Miqueas 3 - CHUYA QELLQA La Biblia en Quechua de Ayacucho 2012 bible

Miqueas 3

¹Hinaptinmi ñoqañataq kaynata nirqani: Jacobpa mirayninpi munaychakuqkuna, Israelpa mirayninpi kamachikuqkuna, uyariwaychik. ¿Manachum qamkunaqa allinta ruwanaykichikpaq kamachisqa kachkankichik?

²Qamkunam ichaqa allin ruwayta cheqnispa mana allin ruwayta kuyankichik, ovejata hinaraqmi llaqtaytapas tulluntawan qarallantaña ruwarunkichik.

³Llaqtaytam mikuypaq mikunkichik, qaranta chustuspam tulluntapas pakinkichik, timpuchkaq mankapaq otaq rupachkaq hornopaq kuchupachkaq hinam parteparunkichik.

⁴Huk punchawmi Tayta Diosta qayakunkichik, ichaqa manam uyarisunkichikchu. Tukuy mana allinkunata ruwasqaykichikraykum chay tiempopi qamkunamanta pakakurunqa.

⁵Llaqtanta pantayman apaq profetakunapa contranpim Tayta Dios kaynata nin: Paykunam mikuy qoqninpaq hawkayayta profetizanku, mana mikuy qoqninpaqñataqmi sasachakuyta.

⁶Chayraykum profeciapas mana kanqañachu, revelación chaskiypas tukurunqañam. Paykunamantaqa intipas pakakunqam, paykunapaqqa punchawpas kanqa tutayaymi.

⁷Profetakunapas penqaypim tarikunqaku, adivinaqkunapas muspaypi hinañam rimanqaku. Tayta Diosmanta mana imatapas chaskisqankuraykum siminkutapas wichqarunqaku.

⁸Ñoqam ichaqa Tayta Diospa Espiritunwan, allin ruwayninwan, chaynataq atiyninwan huntasqa kachkani, Jacobpa mana kasukuyninta qawachinaypaq, Israelta huchanmanta qaqchanaypaq.

⁹Jacobpa mirayninpi munaychakuqkuna, Israelpa miraynimpi kamachikuqkunata, kayta uyariychik. Qamkunam allin ruwayta millakunkichik, allin arreglo ruwaytañataqmi qewirunkichik.

¹⁰Sión llaqtatam yawarta chaqchuspa hatarichinkichik Jerusalentañataqmi ñakariypa hawanpi hatarichinkichik.

¹¹Kamachiqninkunapas pagollapaqmi kamachikunku, sacerdotenkunapas qollqellapaqmi yachachikunku, profetakunapas qollqellapaqmi profetizanku, Tayta Diosman hapipakuq tukuspankum kaynata ninku: Diosmi ñoqanchikwan kachkan, manam ima sasachakuypas chayamuwasunchu, nispanku.

¹²Chaynaqa, qamkunapa huchaykichikmantam Sión llaqtapas yapusqa chakraña kanqa, Jerusalenñataqmi soqyasqa rumillamanña tikrasqa kanqa. Templopa kanan moqopas mana allin qorakunawanmi monteyanqa, nispa.