Read CHUYA QELLQA La Biblia en Quechua de Ayacucho 2012 Miqueas 7 Bible Online

Miqueas 7 - CHUYA QELLQA La Biblia en Quechua de Ayacucho 2012 bible

Miqueas 7

¹¡Ay, imallapiraq rikukuni! Cosecharuptinku pallapakuq hinam rikuriruni, uvasta pallaparuptinku, mikuykuyta munaspa chulla rurullatapas mana tariq hinam rikuriruni.

²Llakipayakuq runakunam kay pachapi tukurun, allin ruwaq runakunam chinkarun. Llapallankum wañuchinakuyta maskanku, runamasinta wichichinanpaqmi toqllata churanku.

³Mana allin ruwaymanmi amañarunku, kamachikuqkunapas[2] pagotam mañakunku, juezkunapas sobornotam chaskikunku, atiyniyuqkuna munasqanta rimaptinkum “allinmi” nispa sayapakunku.

⁴Paykunamanta allinpaq hapisqa runakunam kichka hina, allin kawsaqñataqmi anku kichka hina. Ñakarinayki punchawmi hamuchkan, castigasqa kanaykimanta profetakunapa rimarisqan punchawmi chayamuchkan, hinaptinmi muspaypi hina tarikunki.

⁵Reqsinakusqaykipa nisqantapas ama creeychu, kamachikuqpipas ama hapipakuychu, puñuqmasikimantapas cuidakuy, simikitapas wichqakuy.

⁶Qari churinmi taytanta penqayman churan, warmi wawanñataqmi mamanpa contranpi sayarin, llumchuymi suegranpa contranpi hatarin, runapa enemigonkunaqa hina wasinpi kaqkunallam.

⁷Ñoqam ichaqa Tayta Diosllapi hapipakullasaq, Salvaykuqniy Diosllapim hapipakullasaq; Diosnillayqa uyariykuwanqam.

⁸Cheqniwaqniy nación, tuñisqata qawawaspaykiqa amayá kusipayawaychu, wichiruspaypas ñoqaqa hatarisaqmi, tutayayña pampaykuwaptinpas Tayta Diosmi kanchariwaqniyqa.

⁹Tayta Diospa contranpi huchallikurusqayraykum piñakuynintapas aguantasaq, chaykamam imam ruwasqaymanta juzgawaspan allin arreglota ruwawanqa. Payqa achkiymanmi hurqowanqa, allin ruwaynintam qawaykachiwanqa.

¹⁰Chayta qawaspanmi, ¿maytaq Tayta Diosnikiqa? niwaqniy enemigoypas penqakuymanta pakakunqa. Ñoqañataqmi ñanpi mituta hina sarusqata qawaspay kusikusaq.

¹¹Jerusalén llaqta, hamuchkanmi punchaw harkasuqniki perqaykikuna hatarichisqa kananpaq, chay punchawmi linderoykikunapas mirachisqa kanqa.

¹²Chay punchawmi kallpasapa atiyniyuq nacionkuna hamusunki: Asiriamanta qallaykuspa Egiptokama, Nilo mayumanta Eufrates mayukama, lamar qochapa patankunamanta, chaynallataq orqokunamantapas.

¹³Runakunapa huchanmantam kay pachaqa pasaypaqta chunninqa, runakunapa mana allin ruwasqanmantam kay pachaqa pasaypaqta purmanqa.

¹⁴Dios Taytalláy, sumaq pastokunapa kananpiyá llaqtaykita ovejakunata hina michikuy, orqokunapi montekunapi sapallan puriq ovejaykikunata, ñawpaq tiempokunapi hinayá Basán lawpi chaynataq Galaad lawpi paykunata michikuy.

¹⁵Egiptomanta hurqomusqaykipi hina admirakuypaq atiynikita qawarichiy.

¹⁶Atiynikita qawaykuspankum nacionkunapas atiyninkumanta penqakunqaku, manam rimaytapas nitaq uyariytapas atinqakuchu.

¹⁷Maqta uru hinam, qasqonpa puriq animalkuna hinam, paykunaqa allpata llaqwanqaku, pakakusqankumanta mancharisqallaña lloqsispam Tayta Diosman kutirikunqaku, hinaspam payta kasukunqaku.

¹⁸Dios Taytalláy, qam hinaqa manam pipas kanchu, llaqtaykimanta puchuqkunapa hucha ruwasqankuta pampachaykuspam qonqarunki, wiñaypaq mana piñakuruspaykim kuyapayaykuwankiku.

¹⁹Huktawanyá llakipayariykullawayku, hinaspayá huchallaykutapas pamparuy, lamar qocha ukunmanñayá wischuykuy.

²⁰Amayá qonqaruychu Jacobman prometesqaykitapas, nitaq Abrahampaq kuyapayakuynikitapas, chaynatam taytaykuman ñawpaqmantaraq jurarqanki.