Read CHUYA QELLQA La Biblia en Quechua de Ayacucho 2012 Zacarías 7 Bible Online

Zacarías 7 - CHUYA QELLQA La Biblia en Quechua de Ayacucho 2012 bible

Zacarías 7

¹Rey Darío tawa wataña munaychakuchkaptinmi, Quisleu sutiyuq isqon kaq killapa tawa kaq punchawninpi, profeta Zacariasta Tayta Dios rimapayarqa.

²Chay punchawpim Bet-el llaqtapi yachaqkuna, Sarezertawan Regem-melecta runankunatawan kacharqaku, Tayta Diospa yanapakuyninta mañakamunankupaq,

³hinaspa Tukuy Atiyniyuq Tayta Diospa templonpi kaq sacerdotekunata chaynataq profetakunata kaynata tapumunankupaq: ¿Hinaraqchu pichqa kaq killapi waqasaqku hinaspa ayunasaqku imaynam watan-watan ruwasqaykuman hina? nispanku.

⁴Chaymi Tukuy Atiyniyuq Tayta Dios niwarqa:

⁵Kay nacionpi llapallan runakunata hinaspa sacerdotekunata kaynata nimuy: Kay qanchis chunka watantin, pichqa kaq killapi chaynataq qanchis kaq killapi waqaspa ayunaspaykichik, ¿ñoqapaqchu ayunarqankichik?

⁶Mikuspaykichikpas upyaspaykichikpas, ¿manachum kikillaykichikpaq mikurqankichik hinaspa upyarqankichik?

⁷¿Manachum Tayta Diosqa ñawpaqmantaraq profetankunawan hina kaynata rimarirqa? Chaynataqa rimarirqa Jerusalén llaqtapi yachaqkuna hawkalla hinaspa achkallaña kawsakuchkaptinkum, hina chaynallam kawsakuchkarqaku muyuriqnin llaqtakunapi yachaqkunapas chaynataq Neguev lawpi yachaqkunapas hinaspa waqtakunapi yachaqkunapas, nispa.

⁸Tayta Dios rimapayaptinmi Zacarías kaynata nirqa.

⁹Tukuy Atiyniyuq Tayta Diosmi kaynata nin: Qamkunaqa cheqap kaqwan juzgaspayá runamasikichik-wanqa llakipayanakuspa chaynataq kuyapayanakuspa kawsaychik.

¹⁰Ama-yá viudakunatapas, mana tayta-mamayuq-kunatapas, huklaw llaqtayuqkunatapas hinaspa wakchakunatapas ñakarichiychikchu. Amataqyá runamasikichikpa contranpiqa mana allin ruwaytapas piensaychikchu, nispa.

¹¹Qamkunam ichaqa uyariyta mana munarqankichikchu, aswanraqmi mana kasukuspaykichik mana uyariqpas tukurqankichikchu.

¹²Sonqoykichikta pasaypaqta rumiyarachispam, Espiritunpa yanapakuyninwan ñawpaq profetankunatakama Tukuy Atiyniyuq Tayta Dios rimapayasusqaykichik yachachikuyninkunata chaynataq kamachikuyninkunatapas mana kasukurqankichikchu. Chayraykum Tukuy Atiyniyuq Tayta Dios llumpayta piñakururqa.

¹³Chaynaqa, Tukuy Atiyniyuq Tayta Diosmi kaynata nin: Imaynam paykuna qayakuyniyta mana kasukurqakuchu, chaynam ñoqapas mañakuyninkuta mana uyarirqanichu.

¹⁴Aswanraqmi sinchi wayra hina mana reqsisqanku nacionkunaman cheqerachirqani, chaynapim nacionninkupas mana pipapas purinan chunniqmanña tikrakururqa. Sumaqllaña naciontam paykuna llakikuypaq chunniqman tikrarurqaku, nispa.