Read CHUYA QELLQA La Biblia en Quechua de Ayacucho 2012 Zacarías 8 Bible Online

Zacarías 8 - CHUYA QELLQA La Biblia en Quechua de Ayacucho 2012 bible

Zacarías 8

¹Tukuy Atiyniyuq Tayta Diosmi rimapayawaspan kaynata niwarqa:

²Tukuy Atiyniyuq Tayta Diosmi kaynata nin: Sión llaqtataqa ñoqallapaqñam munani, tukuy sonqoywanmi kikillaypaqña munani, nispa.

³Tayta Diosmi kaynata nin: Sión llaqtatam musoqmanta hatarichisaq, hinaspaymi chawpinpi yachakusaq, Jerusalén llaqtam cheqapwan, Tukuy Atiyniyuq Tayta Diospa orqonwan, chuyanchakuna orqowan sutichasqa kanqa.

⁴Tukuy Atiyniyuq Tayta Diosmi nin: Jerusalén llaqtapa plazankunapim, machuchakunawan payachakuna huktawan tiyanqaku. Sinchi yuyaqña kasqankuraykum sapakama tawnayuqkama kanqaku.

⁵Callenkunapipas qari warmakunam warmi warmakunam huntarinqaku, hinaspam plazankunapi pukllakunqaku, nispa.

⁶Tukuy Atiyniyuq Tayta Diosmi kaynata nin: Sichum tukuy kaykuna, chay tiempopi puchuq runaykunapaq mana ruway atinapaq hina rikchakuptinpas, ñoqapaqqa manam sasachu kanqa, nispa.

⁷Tukuy Atiyniyuq Tayta Diosmi kaynata nin: Ñoqapunim llaqtayta libramusaq, intipa qespimunan lawpi nacionkunamanta, intipa seqaykunan lawpi nacionkunamantapas.

⁸Kutichimuptiymi Jerusalenpi yachakunqaku, paykunam kanqa llaqtay, ñoqañataqmi Diosninku kasaq, paykunam ñoqapi hapipakunqaku, ñoqañataqmi nanachikuqninku kasaq, nispa.

⁹Tukuy Atiyniyuq Tayta Diosmi kaynata nin: Chaynaqa, temploy musoqmanta hatarichisqa kananpaq cimientonkuna churasqa kasqanmanta kay punchawkunakama profetakunapa willakuyninta uyariqkuna kallpanchakuychik.

¹⁰Kay punchawkunakamaqa, runakunapas, uywakunapas, manam pagota chaskirqakuchu, enemigonkuraykum runakunapas hawkaqa mana puririyta atirqakuchu; runakunatapas runamasinpa contranpim churarurqani.

¹¹Kunanmi ichaqa runaykunamanta puchuqkunata manaña ñawpaqta hinañachu ruwasaq.

¹²Aswanqa chawpinkupi hawkayay kaptinmi, uvaspas sumaqllataña rurunqa, allpapas achkanpim rurunqa, cielokunapas sullantam chayachimunqa. Tukuy chaykunatam munaychakunankupaq kay llaqtamanta puchuqkunaman qosaq.

¹³Judá nacionpi, Israel nacionpi yachaq-kuna, imaynam huklaw nacionkunapi ñakasqa karqankichik, kunanñataqmi salvaykuspay bendición kanaykichikpaq churasqaykichik. Chaynaqa, ama manchakuspa kallpanchakuychik, nispa.

¹⁴Chaynaqa, Tukuy Atiyniyuq Tayta Diosmi kaynata nin: Ñawpaq taytaykichikkuna piñarachiwaptinmi paykuna castigaruyta tantearurqani, manam llakipayarqanichu.

¹⁵Kunanmi ichaqa Jerusalentawan Judá nacionta yanapaytaña tantearuni. Ama manchakuychikchu.

¹⁶Chaynaqa, kaykunata ruwaychik: Runamasikichikwan cheqap kaqta rimaychik, mana pimanpas sayapakuspa allin arreglota ruwaychik, cortekunapipas hawkayayta maskaychik.

¹⁷Ama runamasikichikpa contranpi mana allin ruwayta piensaychikchu, amataq yanqamantapas juraychikchu. Tayta Diosmi nin: Tukuy chaykunatam ñoqaqa cheqnini, nispa.

¹⁸Tukuy Atiyniyuq Tayta Diosmi nin:

¹⁹Tawa kaq killapi, pichqa kaq killapi, qanchis kaq killapi hinaspa chunka kaq killapi ayuno ruwasqaykichikmi kusikuymanña tikrakunqa, Judá nacionpaqmi hatun kusikuy fiestamanña tikrakunqa. Chaynaqa, cheqap kaqtawan hawka kawsakuyta kuyaychik, nispa.

²⁰Tukuy Atiyniyuq Tayta Diosmi kaynata nin: Achkallaña llaqtakunamantam llapa runakuna hamunqaku.

²¹Hinaptinmi huk llaqtapi yachaqkuna huklaw llaqtapi yachaqkunata ninqaku: “Bendeciykuwananchikpaq Tukuy Atiyniyuq Tayta Diosta mañakuq hakuchik nispanku, hinaptinmi wakinñataq ninqaku, ñoqaykupas risaqkum”, nispanku.

²²Hinaspam achkallaña nacionkunawan nana-nanaq llaqtakuna Jerusalén llaqtaman hamuspanku, Tukuy Atiyniyuq Tayta Diosta maskaspa bendicionninta mañakunqaku, nispa.

²³Tukuy Atiyniyuq Tayta Diosmi kaynata nin: Chay punchawkunapim, tukuy rikchaq rimayniyuq huklaw nacionkunamanta chunka runakuna, Judá nacionniyuq runata capanmanta hapipakuruspa ninqaku: “Qamkunawan riytam munaniku, qamkunawan Dios kasqantam uyariruniku”, nispanku.