Read CHUYA QELLQA La Biblia en Quechua de Ayacucho 2012 Zacarías 9 Bible Online

Zacarías 9 - CHUYA QELLQA La Biblia en Quechua de Ayacucho 2012 bible

Zacarías 9

¹ Hadrac llaqtapa chaynataq Damasco llaqtapa contranpim profeta Zaca-riasnintakama Tayta Dios kaynata rimarirqa: Tayta Diospam Siria lawpi llaqtakunaqa, paypataqmi Israelpi llapallan ayllukunapas.

²Tayta Diospam Damascopa hichpanpi Hamat llaqtaqa, payllapataqmi yachaysapa Tiro llaqtawan Sidón llaqtapas.

³Tiro llaqtam murallankunata hatarirachin, qollqetam ñutu allpata hinaña huñukurun, qoritapas ñanpi mituta hinañam montokurun.

⁴Ichaqa Señormi wakchayachinqa, atiynintapas lamar qochapim chinkarachinqa, kikin llaqtatapas ninam rupanqa.

⁵Chaynata rikuspam Ascalón llaqtapas mancharikunqa, Gaza llaqtapas nanaywanmi ñakarinqa, Ecrón llaqtapas pantaypim rikurinqa. Gaza llaqtapa reyninpas chinkanqam, Ascalón llaqtapas mana runayuqmi chunninqa.

⁶Asdod llaqtapipas mana reqsisqa runakunañam yachakunqaku, chaynatam filisteokunapa hatunchakuyninta puchukachisaq.

⁷Aycha mikusqantapas yawarnintintam siminmanta qechurusaq, millakuypaq kaqkuna mikusqantapas kirunmantam aysarusaq; chaywanpas paykunamantam wakinta ñoqapaq puchuchisaq, hinaptinmi Judapa partenña kanqaku. Ecrón llaqtapas Jebús llaqta hinaraqmi kanqa.

⁸Ñoqañataqmi runaykunapa muyuriqninpi sayaykuspay waqaychasaq, manam pipas yaykunqachu ni lloqsinqachu, ñakarichiqkunapas manañam chaynintaqa pasanqakuñachu, kunanqa kikiyñam llaqtayta qawaspay waqaychasaq.

⁹¡Sión llaqtapi yachaqkuna llumpayta kusikuychik! ¡Jerusalenpi yachaqkuna kusikuymanta qapariychik! Reynikichikmi qamkunaman hamuchkan, payqa allin ruwaq hinaspa salvakuqmi, asnopi silladam humildella hamuchkan, malta asnochapim hamuchkan.

¹⁰Paymi Efrainpa carretankunatawan Jerusalenpa caballonkutapas chinkachinqa, guerrapaq arcokunatapas pakipanqam. Nacionkunapa hawkayaynintam rimarinqa, lamar qochapa kaylaw patanmanta waklaw patankamam munaychakunqa, Eufrates mayumanta qallaykuspam kay allpa pachapa patankama munaychakunqa.

¹¹Yawarwan pactota ruwasqanchikraykum, mana yakuyuq pozokunapi presochasqa kasqankumanta runaykikunata libramusaq.

¹²Librasqa kayta suyaqkuna, murallasqa llaqtaykichikman kutikuychik. Kunanmi qamkunaman willachkaykichik, iskay kuti mastaraqmi kutichipusqaykichik.

¹³Judatam guerrapaq arcota hina chutaruni, Efrainñataqmi flechankuna kanqa. Sión llaqta, qamtam espadata hina ruwasqayki, hinaspaymi wawaykikunata Grecia nacionpa contranpi hatarichisaq.

¹⁴Tayta Diosmi llaqtanpi qawachikunqa, flechankunatapas llipyata hinam kacharinqa; Tayta Diosmi trompetata tocanqa, sur lawmanta hatarimuq remolino wayrapa chawpintam hamunqa.

¹⁵Tukuy Atiyniyuq Tayta Diosmi llaqtanta waqaychanqa, paykunañataqmi enemigonkupa warakanan rumikunata sarupanqaku, hinaspam enemigonkuta mikurunqaku, yawarnintapas vinota hinaraqmi tomanqaku, yawarwan huntasqa plato hinaraqmi kanqaku, altarpi waqrakuna hinaraqmi kanqaku.

¹⁶Tayta Diosmi ovejakunata salvachkaq hina chay punchawpi llaqtanta salvaykunqa, paykunañataqmi coronapa alhaja ruminkuna hinaraq allpanpi kancharinqaku.

¹⁷¡Mayna allinraq kanqa! ¡Mayna sumaqraq kanqa! Trigopas jovenkunatam kusichinqa, vinoñataqmi sipaskunata kusichinqa.