Read CHUYA QELLQA La Biblia en Quechua de Ayacucho 2012 Mateo 10 Bible Online

Mateo 10 - CHUYA QELLQA La Biblia en Quechua de Ayacucho 2012 bible

Mateo 10

¹Chaymantam Jesusqa chunka iskayniyuq discipulonkunata qayaspan, mana allin espiritukunata qarqonankupaq hinaspa tukuy rikchaq onqoyniyuqkunata-wan nanayniyuqkunata sanoyachinan-kupaq atiyta qorqa.

²Kaykunam chunka iskayniyuq apostolninkunapa sutin: Punta kaqmi Simón, paypa huknin sutinqa Pedrom, wawqen Andrés; Jacobowan Juan, paykunaqa Zebedeopa churinkunam karqaku;

³Felipe, Bartolomé, Tomás, impuesto cobraq Mateo, Alfeopa churin Jacobo, Tadeo;

⁴cananista [5]Simón hinaspa Judas Iscariote, paymi Jesusta traicionarurqa.

⁵Kay chunka iskayniyuq discipulonkunatam Jesús kacharqa kaynata kamachispan: Diosta mana reqsiq runakunapa llaqtanmanqa amam rinkichikchu, amataqmi Samaria lawpi llaqtakunamanpas yay-kunkichikchu.

⁶Puntataqa Israelpa mirayninmanta kaq chinkasqa ovejakunaman riychik,

⁷hinaspayá willakamuychik: “Diospa munaychakuyninmi hichparamunña”, nispaykichik.

⁸Onqoqkunata sanoyachimuychik, wañusqakunata kawsarichimuychik, leprayuqkunata sanoyachimuychik hinaspa demoniokunata qarqomuychik. Qamkunaqa mana imallapaqmi chaskirqankichik, mana imallapaqtaqyá qomuychikpas.

⁹Amam qoritapas, qollqetapas, nitaq cobretapas apankichikchu,

¹⁰amataqmi qoqawtapas, mudakunaykichikpaq pachatapas, usutatapas nitaq tawnatapas apankichikchu. Llamkapakuqqa mikuchisqam kanan.

¹¹Mayqan hatun llaqtamanpas otaq taksa llaqtamanpas chayaspaykichikqa allin sonqoyuq runatam maskankichik, hinaspam ripunaykichikkama chaypi samapakunkichik.

¹²Wasiman yaykuspaqa rimakuykunkichikmi.

¹³Chay wasipi kaqkuna allin runakuna kaptinqa, paykunapaq hawkayay munasqaykichik chayachun, mana allin runakuna kaptinqa, hawkayay qamkunawan kutikuchun.

¹⁴Sichum pipas mana chaskisuptikichikqa chaynataq willakusqaykichiktapas mana uyarisuptikichikqa, chay wasimanta otaq chay llaqtamanta lloqsiychik hinaspa usutaykichikpi allpatapas taspiychik.

¹⁵Cheqaptapunim nikichik, chay llaqtaqa juicio punchawpim Sodoma hinaspa Gomorra llaqtakunamantapas aswan castigasqa kanqa.

¹⁶Atoqkunapa kasqanman ovejakunata kachachkaq hinam kachachkaykichik, qamkunaqa maqta uru hina sakriyá kaychik, ichaqa paloma hina manso.

¹⁷Cuidakuychik, juezkunamanmi apasqa kankichik, sinagogakunapim azotesqa kankichik.

¹⁸Ñoqaraykum reykunapa hinaspa kamachikuqkunapa qayllanman apasqa kankichik, chaynapi paykunamanwan Diosta mana reqsiqkunaman ñoqamanta willakunaykichikpaq.

¹⁹Kamachikuqkunaman apasuptikichikqa amam llakikunkichikchu imaynam otaq imatam rimanaykichikmantaqa, Diosmi imam rimanaykichiktapas yachachisunkichik.

²⁰Manam qamkunachu rimankichikqa, aswanqa hanaq pachapi Taytaykichikpa Espiritunmi rantikichikpi rimanqa.

²¹Runakunam wawqenta wañuyman qonqa, taytakunapas churinkutam wañuyman qonqa; churikunañataqmi tayta-mamanpa contranpi hatarispa wañuchinqa.

²²Ñoqaraykum llapallan runakuna cheqnisunkichik, ichaqa pipas tukupaykama takyaqmi salvakunqa.

²³Sichum hukkaqnin llaqtapi qatikachasuptikichikqa huklaw llaqtaman ayqekuychik. Cheqaptapunim nikichik, runapa Churinqa hamunqa Israelpi llaqtan-llaqtan puriyta manaraq tukuchkaptikichikmi.

²⁴ Discipuloqa manam yachachiqnin-manta maschu, nitaqmi criadopas patronninmanta maschu.

²⁵Discipulo-paqqa yachachiqnin hinalla kayninmi allinqa, criadopaqpas allinqa patronnin hina kayninmi. Sichum ñoqatapuni Beelzebuwan sutichawachkaspankuqa aswanraqchiki qamkunataqa.

²⁶Chaynaqa, amayá runakunataqa manchakuychikchu. Manam imapas pakasqaqa kanmanchu aswanqa yachas-qam kanqa, mana yachasqa kaqkunapas yachasqam kanqa.

²⁷Qamkunaman tutayaypi willasqaytaqa achkiy punchawpiyá willakuychik, rinrillaykichikpi willasqaytapas wasipa hawankunamantayá qayaykachakuychik.

²⁸Cuerpo wañuchiqkunataqa amayá manchakuychikchu, manam almataqa wañuchiyta atinmankuchu, manchakuychikqa almantinta, cuerpontinta infiernopi wiñaypaq chinkachiqtayá.

²⁹¿Manachum iskay urpichakunatapas as qollqellapaq rantikunku? Chaywanpas Dios Taytaykichik mana munaptinqa manam hukllanpas wichimunmanchu.

³⁰Qamkunapaqa chukchaykichikpas llapallanmi yupasqa kachkan.

³¹Chaynaqa, amayá manchakuychikchu, qamkunaqa urpichakunamantapas aswan valorniyuqmi kankichik.

³²Pipas runakunapa qayllanpi mana penqakuspa ñoqamanta willakuqtaqa, ñoqapas hanaq pachapi kaq Taytaypa qayllanpim paymanta willakusaq.

³³Runakunapa qayllanpi negaqniytam ichaqa ñoqapas hanaq pachapi kaq Taytaypa qayllanpi negasaq.

³⁴Amayá piensaychikchu ñoqaqa kay pachaman hawkayay apamunaypaq hamusqaytaqa; hamurqaniqa manam hawkayayta apamunaypaqchu, aswanqa sasachakuyta apamunaypaqmi.

³⁵Hamurqaniqa churinta taytanwan, wawanta mamanwan, llumchuytañataq suegranwan rakinanaypaqmi.

³⁶Chaynaqa, runapa enemigonqa kanqa wasinpi kaqkunallam.

³⁷Pipas tayta-mamanta ñoqamanta masta kuyaqqa manam ñoqapaq hinachu, pipas wawa-churinta ñoqamanta masta kuyaqqa manataqmi ñoqapaq hinachu.

³⁸Pipas cruzninta mana qepikuspan qatiwaqniyqa manam ñoqapaq hinachu.

³⁹Pipas vidanta salvay munaqqa wañurunqam, pipas ñoqarayku wañuqmi ichaqa kawsanqa.

⁴⁰ Pipas qamkunata chaskisuqnikichikqa ñoqatam chaskiwan, ñoqata chaskiwaqniyñataqmi pim kachamuwaqniyta chaskin.

⁴¹Pipas profetata chaskiqqa, profetapa chaskinan premiotam chaskinqa; pipas allin ruwaq runata chaskiqñataqmi allin ruwaq runapa premionta chaskinqa.

⁴²Pipas qatiqniykunamanta taksan kaqkunallamanpas chiri yakullatapas qoykuqqa, qatiqniy kasqanraykum premionta chaskinqa.