Read CHUYA QELLQA La Biblia en Quechua de Ayacucho 2012 Mateo 11 Bible Online

Mateo 11 - CHUYA QELLQA La Biblia en Quechua de Ayacucho 2012 bible

Mateo 11

¹Jesusmi chunka iskayniyuq discipulonkunaman yachachiyta tukuruspan, huklaw llaqtakunapiña yachachimunanpaq rirqa.

²Juanñataqmi carcelpi kachkaspa Cristopa ruwasqankunata yacharur-qa, hinaspam discipulonkunamanta iskayta kacharqa,

³Jesusta kaynata tapumunankupaq: ¿Qamchu kachkanki Diosmanta hamuq, icha huktachu suyasaqku? nispa.

⁴Chaymi Jesusñataq nirqa: Kutispaykichik imam qawasqaykichikmantawan uyarisqaykichikmanta Juanman willamuychik.

⁵Ñawsakunam qawakuchkanña, suchukunam purichkankuña, leprayuqkunam sanoyarunkuña, mana uyarikuqkunam uyarikuchkan-kuña, wañusqakunam kawsarinku, wak-chakunapas evangeliotam uyarichkanku, nispaykichik.

⁶¡Mayna kusisqam ñoqamanta mana iskayrayaqkunaqa! nispan.

⁷Paykuna pasakuptinmi, runakunaman Juanmanta willaspan Jesús nirqa: ¿Ima qawaqtaq purunta rirqankichik? ¿Wayrapa kuyuchisqan soqosta qawaqchu?

⁸¿Pi qawaqtaq rirqankichik? ¿Allin pachawan pachasqa runata qawaqchu? Yachankichikmi, allin pachawan churakuqqa reykunapa wasinpim kachkanku.

⁹Chaynaqa, ¿pi qawaqtaq rirqankichik? ¿Profetata qawaqchu? Arí, cheqaptapunim nikichik, payqa manam profeta hinallachu.

¹⁰Juanmantam Qellqa kay-nata nin: “Ñoqam willakuqniyta ñawpaqnikita kachasaq, paymi rinayki ñanta allichanqa”, nispa.

¹¹Cheqaptapunim nikichik, warmimanta nacemuq runakunamantaqa manam hukllapas Bautizaq Juan hinaqa kanchu. Chaywanpas Diospa munaychakuyninpi kaqkunamanta hukkaqnin taksan kaqmi Juanmantapas aswan hatunqa.

¹²Bautizaq Juanpa hamusqanman-tapunim Diospa munaychakuynin-ta chinkachiypi richkanku, allin kall-pawanraqmi chinkachiyta munan-ku.

¹³Profetakunawan kamachikuyku-nam Juan hamunankama willakur-qaku.

¹⁴Qamkuna creeyta munaptiki-chikqa, Juanmi chay suyasqaykichik Eliasqa.

¹⁵Haykan rinriyuqkunaqa uyariychikyá.

¹⁶¿Pimantaq tupachiyman kunan tiempo miraykunata? Paykunaqa plazakunapi pukllakuq warmakunamanmi rikchakunku, paykunaqa warmamasinkunatam kaynata qayaykachanku:

¹⁷“Qenata tocaptiykupas manam tusurqankichikchu, aya takita takiptiykupas manam waqarqankichikchu”, nispanku.

¹⁸Juanmi hamurqa, payqa manam mikurqachu nitaqmi tomarqachu, hinaptinmi nirqankichik: “Payqa demonioyuqmi”, nispaykichik.

¹⁹Runapa Churin hamuspa mikuptin tomaptinñataqmi ninkichik: “Kay runaqa mikuysapa hinaspa vinolla upyakuqmi, impuesto cobraqkunapa hinaspa huchasapakunapa amistadninmi”, nispaykichik. Diospa yachayninqa ruwasqankunapim qawachikun, nispa.

²⁰Maypim achkallaña milagrokuna ruwasqan llaqtakunatam Jesús qaqcharqa, Diosman mana kutirikusqankumantam kaynata nirqa:

²¹¡Ay, Corazín llaqta, imaynaraq kanki! ¡Ay, Betsaida llaqta, imaynaraq kanki! Sichum qamkuna ukupi ruwasqay milagrokunata Tiro llaqtapi hinaspa Sidón llaqtapi ruwaptiyqa, chayllachá qachqa pachawan churakuykuspa, uchpawan machqekuspa wanakurunmankuña karqa.

²²Chayraykum juicio punchawpiqa Tiro llaqtamantapas chaynataq Sidón llaqtamantapas aswan castigasqa kankichik.

²³Capernaúm llaqta, ¿hanaq pachakama hatarichisqa kaytachu piensachkanki? Aswanqa uku pachakamam wischusqa kanki. Sichum qam ukupi milagro ruwasqaykuna Sodoma llaqtapi ruwasqa kaptinqa, kunankamapas kachkanmanmi karqa.

²⁴Chayraykum juicio punchawpiqa Sodoma chaynataq Gomorra llaqtakunamantapas aswan castigasqa kanki, nispan.

²⁵Chay tiempopim, Taytanta mañakuspan Jesús nirqa: Hanaq pachapipas kay pachapipas munaychakuq Taytalláy, yachayniyuqkunamantawan yuyayniyuqkunamanta pakaykuspaykim, wawakunaman kaykunata reqsichirqanki, chayraykum yupaychayki.

²⁶Arí, Taytalláy, chaynatam munarqanki.

²⁷ Taytaymi tukuy imakunata qoykuwarqa. Churitaqa manam pipas allintaqa reqsinchu aswanqa Taytallanmi, Taytataqa manataqmi pipas reqsinchu aswanqa Churillanmi hinaspa Churinpa reqsichisqan kaqkunallam.

²⁸Haykam pisipasqakuna hinaspa ñakariqkuna ñoqaman hamuychik, ñoqapim samayta tarinkichik.

²⁹Yugoyta apaspayá ñoqamanta yachaychik, ñoqaqa llampu sonqo hinaspa mana chaylla piñakuruqmi kani, chaynata ruwaspam ñoqapi samayta tarinkichik.

³⁰Yugoyqa manam llasanchu, qepiypas sampallataqmi, nispa.