Read CHUYA QELLQA La Biblia en Quechua de Ayacucho 2012 Mateo 14 Bible Online

Mateo 14 - CHUYA QELLQA La Biblia en Quechua de Ayacucho 2012 bible

Mateo 14

¹Chay tiempopim Jesuspa ruwasqankunata Herodes uyarirurqa.

²Chaymi criadonkunata nirqa: Payqa Bautizaq Juanmi kawsariramun, chayraykum milagrokuna ruwananpaq atiyniyuqqa, nispan.

³Herodesmi Juanta hapirachimuspan cadenawan watasqata carcelpi wichqarachirqa. Chaynataqa ruwarqa wawqen Felipepa warmin Herodiaspa causanpim.

⁴Juanmi Herodesta nirqa: Manam allinchu paywan casarakuynikiqa, nispan.

⁵Chayraykum Herodesqa Juanta wañurachiyta munarqa, ichaqa runakunatam manchakurqa, Juanta profetapaq hapisqankurayku.

⁶Herodespa santonpim, Herodiaspa warmi wawan llapa runapa qayllanpi tusurqa, chaymi Herodesta gustaykusqanrayku,

⁷juraspan prometekurqa imapas mañakusqanta qonanpaq.

⁸Hinaptinmi sipasñataq maman umacharuptin Herodesta nirqa: Bautizaq Juanpa umantayá platopi qoykuway, nispan.

⁹Chaymi rey Herodesqa llakikururqa, ichaqa convidasqankunapa qayllanpi prometesqanraykum qonankupaq kamachirqa.

¹⁰Hinaspam Juanpa umanta carcelpi qorumunankupaq kamaykachiptin

¹¹platopi apamuspanku sipasman haywaykurqaku, payñataqmi mamanman qoykurqa.

¹²Hinaptinmi llapa discipulonkuna Juanpa cuerponta hoqarispa pamparamurqaku, chaymantam pasaspanku Jesusman willaykamurqaku.

¹³Jesusmi Juanpa wañukusqanta yacharuspan, barcapi sapallan pasakurqa mana runakunapa kasqanman. Runakunañataqmi yacharuspanku llaqtankumanta lloqsispa chakiwan qatirqaku.

¹⁴Jesusñataqmi barcamanta uraykuspan chay achkallaña runakunata qawaykurqa, chaymi llakipayarikuspan paykuna ukupi kaq onqoqkunata sanoyachirqa.

¹⁵Yaqaña tutaykamuchkaptinmi payman asuykuspa discipulonkuna nirqaku: Ñam tutaykamuchkanña, kayqa chunniqmi. Chaynaqa, runakunatayá niy llaqtakunaman rispanku mikuyta rantimunankupaq, nispanku.

¹⁶Jesusñataqmi nirqa: Manam rinmankuchu, qamkunayá mikuchiychikqa, nispa.

¹⁷Chaymi discipulonkuna nirqaku: Kaypiqa pichqa tantawan iskay challwallam kachkan, nispanku.

¹⁸Jesusñataqmi nirqa: Kayman apamuwaychik, nispan.

¹⁹Runakunata pastopi tiyanankupaq kamachispanmi, pichqa tantakunatawan iskay challwakunata hapiykuspan hanaq pachata qawarispan Diosman graciasta qorqa, hinaspam tantata pakiykuspan discipulon-kunaman qoykuptin runakunaman aypurqaku.

²⁰Llapallankum saksanankukama mikurqaku, puchuqkunatañataqmi chunka iskayniyuq canasta huntataraq huñururqaku.

²¹Mikuqkunam karqaku pichqa waranqa qarikuna, warmikunawan wawakunam ichaqa mana yupasqachu karqaku.

²²Chaykunapa qepantam discipulonkunata Jesús kamachirqa barcaman qespispanku qochata chimpachkanankupaq, payñataqmi runakunata aviarqa.

²³Runakunata aviaruspanñataqmi, Jesusqa sapallanña orqoman rirqa Diosta chaypi mañakamunanpaq. Tutaykaramuptinmi Jesusqa sapallan chaypi tarikurqa,

²⁴barcañataqmi lamar qocha chawpitaña richkarqa, contranpi sinchi wayra pukumusqanrayku olakunawan yaqaña pampachikustin.

²⁵Hinaptinmi yaqa utulu waqaytaña, yaku hawantakama paykunaman Jesús asuykurqa.

²⁶Discipulonkunañataqmi yaku hawantakama puriqta rikuruspanku manchakuymanta qaparirqaku: ¡Manchachikum wakqa! nispanku.

²⁷Hinaptinmi Jesusñataq nirqa: ¡Hawkalla kaychik! ¡Ama manchakuychikchu! Ñoqam kani, nispan.

²⁸Pedroñataqmi nirqa: ¡Señor, qam kaspaykiqa yakupa hawanta qanman hamunaypaq kamachiway! nispan.

²⁹Chaymi Jesús nirqa: Hamuyá, nispan. Hinaptinmi Pedroqa barcamanta uraykus-pan yaku hawantakama Jesuspa kasqan lawman puriyta qallaykurqa.

³⁰Ichaqa sinchi wayra pukumusqanraykum mancharikuspan yakuman chinkaykuyta qallaykurqa, hinaspam qaparirqa: ¡Señorlláy, salvaykullaway! nispan.

³¹Chaymi Jesusñataq Pedrota makin-manta hapiykuspan nirqa: ¡Pisi iñiyniyuq runa! ¿Imanasqataq iskayrayanki? nispa.

³²Paykuna barcaman seqaruptinkum wayra taniramurqa.

³³Chaymi barcapi kaqkuna, Jesuspa ñawpaqninpi qonqoraspanku nirqaku: ¡Cheqaptapunim qamqa Diospa Churin kasqanki! nispanku.

³⁴Lamar qochata chimparuspankum Genesaret llaqtaman chayarurqaku.

³⁵Hinaptinmi chay llaqtapi runakuna Jesusta reqsiruspanku, muyuriqnin llaqtakunaman willakuyta cheqechir-qaku, chaymi onqoqkunata apamurqaku,

³⁶hinaspam ruegakurqaku pa-chanpa patallantapas llapchaykunankupaq, chaymi haykam llapchaqkunaqa sanoyarurqaku.