Read CHUYA QELLQA La Biblia en Quechua de Ayacucho 2012 Mateo 16 Bible Online

Mateo 16 - CHUYA QELLQA La Biblia en Quechua de Ayacucho 2012 bible

Mateo 16

¹Fariseokunawan saduceokunam tentanankupaq Jesusman asuy-kurqaku, hinaspam Diosmanta hamus-qanta yachanankupaq huk milagrota ruwananpaq mañakurqaku.

²Jesusña-taqmi nirqa: Tardenmi antaqata rikuspa ninkichik: “Allin tiempom kanqa”, nispaykichik.

³Pacha achikyaytañataqmi puyutawan antaqata rikuspa ninkichik: “Wayra-param kanqa”, nispaykichik. ¡Iskay uyakuna! Qamkunaqa cielopi kaqkunata qawaspam imaynam tiempo kananta yachankichik; chaynaqa, ¿imanasqataq kunan tiempokunapi imakunam pasakusqanmantaqa mana kaqpaqpas hapinkichikchu?

⁴ Kay mana kasukuq huchasapa runakunaqa, milagrotaraqmi mañakunkupas, ichaqa manam milagroqa ruwasqachu kanqa, aswanqa profeta Jonasta imam pasasqallanmi paykunapaq señal kanqa, nispan. Chaynata niruspanmi paykunata saqeruspan Jesús pasakurqa.

⁵Jesuspa discipulonkunam lamar qocha-pa waklaw chimpanman chayarurqaku, ichaqa tanta apaytam qonqarusqaku.

⁶Chaymi Jesús nirqa: Fariseokunapa hinaspa saduceokunapa levadurankumanta cuidakuychik, nispa.

⁷Hinaptinmi discipulonkuna nina-kurqaku: Tantata mana apamusqanchikraykum chaynataqa nichkan, nispanku.

⁸Jesusñataqmi chayta musyaruspan nirqa: Yaw, pisi iñiyniyuq runakuna, ¿imanasqataq nichkankichik: “Manam tantanchik kanchu”, nispaykichik?

⁹¿Manachu entiendenkichik? ¿Manachu yuyankichik pichqa waranqa qarikunapaq pichqa tantata haypachisqayta? ¿Hayka canastatataq puchuqninkunata huñurqankichik?

¹⁰¿Manataqchu yuyankichik qanchis tantata tawa waranqa runapaq hay-pachisqaytapas? ¿Hayka canasta hunta-tataq puchuqta huñurqankichik?

¹¹“Fari-seokunapa hinaspa saduceokunapa levaduranmanta cuidakuychik” nispayqa, manam tantamantachu rimarqaniqa. ¿Imanasqamá manaqa entiendenkichikchu? nispan.

¹²Chayñam yachaykurqaku Jesus-qa mana tanta ruwana levaduraman-tachu rimasqanta, aswanqa fariseo-kunapa hinaspa saduceokunapa yacha-chikuyninmanta cuidakunankupaq nisqanta.

¹³Cesarea de Filiposwan sutichasqa llaqtaman Jesús chayaruspanmi discipulonkunata tapurqa: ¿Llapa runakunaqa pim ninkutaq runapa Churinmanta? nispa.

¹⁴Chaymi paykunañataq nirqaku: Wakinmi ninku Bautizaq Juanmi nispanku, wakinñataqmi ninku Eliasmi, Jeremiasmi otaq hukkaqnin profetam, nispanku.

¹⁵Jesusñataqmi nirqa: ¿Qamkunaqa pim kasqaytataq ninkichik? nispan.

¹⁶Hinaptinmi Simón Pedro nirqa: Qamqa kanki kawsaq Diospa Churin Cristom, nispa.

¹⁷Chaymi Jesús nirqa: Jonaspa churin Simón, mayna kusisqam kanki, kaytaqa manam runachu qawachisurqanki, aswanqa hanaq pachapi kaq Taytaymi.

¹⁸Chaymi ñoqapas niki, qamqa Pedrom kanki, kay rumipa hawanpim iglesiayta hatarichisaq, paytaqa wañuypa atiyninpas manam vencenqachu.

¹⁹Diospa munaychakuyninpa llavenkunatam qos-qayki; kay pachapi watasqaykim hanaq pachapipas watasqa kanqa, kay pachapi paskasqaykiñataqmi hanaq pachapipas paskasqa kanqa, nispa.

²⁰Hinaspam discipulonkunata kama-chirqa: Amam pimanpas Cristo kasqaytaqa willankichikchu, nispan.

²¹Chaymantapunim discipulonkunaman Jesús willakurqa Jerusalenman riptin judiokunapa chaynataq sacerdotekunapa kamachiqninkuna hinaspa Diospa leynin yachachiqkuna ñakari-chinankumanta. Willakurqataqmi wañu-rachiptinku kimsa punchawninman kawsarimunantapas.

²²Chaymi Pedroñataq huklawchaman pusaruspan Jesusta nirqa: Amayá Diospas munachunchu chaykuna pasasunaykitaqa, nispan.

²³Hinaptinmi muyuriykuspan Pedrota Jesús nirqa: ¡Anchuy ñawpaqniymanta Satanás! Qamqa pantachiwaytam munachkanki, qamqa manam Diospa munasqanman hinachu tanteanki, aswanqa runakunapa tanteasqanman hinallam, nispan.

²⁴Chaymantam discipulonkunata nirqa: Pipas qatiwayta munaspaqa amaña kikillanpaq kawsaspayá cruzninta qepikuykuspa qatiwachun.

²⁵Pipas vidallan salvay munaqqa pierderunqam, pipas ñoqarayku wañuqmi ichaqa kawsanqa.

²⁶¿Imatataq runa hurqokunman kay pachapi kaqkunata ganaruspan vidantañataq pierderuspan? ¿Haykatataq runa paganman vidanta salvananpaq?

²⁷Runapa Churinqa Taytanpa atiyninwan huntarisqam angelninkunawan hamunqa, hinaspam sapakamaman imam ruwasqanman hina pagapunqa.

²⁸Cheqaptapunim nikichik, kaypi kaqkunamantaqa achkaqmi mana wañunqakuchu runapa Churinta munaychakunanpaq hamuqta rikunankukama.