Read CHUYA QELLQA La Biblia en Quechua de Ayacucho 2012 Mateo 19 Bible Online

Mateo 19 - CHUYA QELLQA La Biblia en Quechua de Ayacucho 2012 bible

Mateo 19

¹Jesusmi kaykunata niruspan Galileamanta Jordán mayupa inti qespimunan lawninpi kaq Judea lawman pasakurqa.

²Achkallaña runakunam Jesusta qatirqaku, chaypitaqmi onqoqkunatapas sanoyachirqa.

³Wakin fariseokunam Jesusman asuy-kuspa, imawanpas wichirachiyta munaspanku tapurqaku: ¿Yaqachu pipas casado kachkaspa imallamantapas warminmanta rakikurunman? nispanku.

⁴Chaymi Jesusñataq nirqa: ¿Manachu Qellqapi leerqankichik, qallariyninpi unanchaqninkuqa qaritawan warmita ruwasqanta?

⁵Hinaspanmi nirqa: “Chayraykum qariqa tayta-mamanmanta rakikuspan warminman hukllawakunqa, chaynapim iskayninku huk runa hinallaña kanqaku”, nispan.

⁶Chaynaqa, manam iskayñachu kanqaku, aswanqa hukllañam. Chayraykum runaqa mana rakinmanchu Diospa kuskanchasqantaqa, nispa.

⁷Fariseokunañataqmi tapurqaku: Hinaptinqa, ¿imanasqataq Moisesqa kamachikurqa rakinakusqanmanta pa-pelta ruwaykuspa warminmanta rakikunanpaqqa? nispanku.

⁸Chaymi Jesusñataq nirqa: Rumi sonqo kasqaykichikraykum Moisesqa permitisurqankichik warmiki-chikmanta rakikunaykichiktaqa, chay-wanpas qallariyninpiqa manam chaynachu karqa.

⁹Ñoqam ichaqa nikichik, huk qariwan mana waqllikuruchkaptin warminmanta rakikuspan hukwan casarakuqqa, waqllikuy huchapim kachkan, nispan.

¹⁰Hinaptinmi discipulonkuna nirqaku: Sichum casado runapaq warminwan chayna kanan kaptinqa mana casarakuymi aswan allinqa, nispanku.

¹¹Jesusñataqmi nirqa: Manam lliwchu kaytaqa entiendenku, aswanqa chayta entiendenankupaq Diospa yachay qosqan kaqkunallam.

¹²Arí, kanmi nacesqanmantapuni mana casarakunanpaq kaqkuna, kantaqmi runapa capasqankunapas chaynataq Diosta servinankurayku mana casarakuy munaqkunapas. Pipas kayta entiendeqqa entiendechunyá, nispa.

¹³Jesusmanmi wawakunata pusamurqaku, chaynapi paykunaman makinta churaykuspa Diosta mañapunanpaq. Discipulokunañataqmi wawa pusamuqkunata qaqcharqaku.

¹⁴Hinaptinmi Jesus-ñataq nirqa: Ama harkaychikchu wawakuna ñoqa-man hamunantaqa, kay wawakuna hina kaqkunapaqmi Diospa munaychakuyninqa, nispa.

¹⁵Chaynata niruspanmi wawakunapa hawanman makinta churaykurqa, hinaspam chaymanta pasakurqa.

¹⁶Huk runam Jesusman asuykuspan tapurqa: Allin yachachikuq ¿ima allin kaqtataq ruwayman wiñay kawsayta haypanaypaq? nispa.

¹⁷Jesusñataqmi nirqa: ¿Imanasqataq allin niwanki? Allinqa chullallam, payqa Diosmi. Wiñay kawsayta munaspaykiqa Diospa kamachikuyninkunata kasukuy, nispa.

¹⁸ Hinaptinmi chay runañataq nirqa: ¿Mayqan kamachikuykunata? nispa. Jesusñataqmi nirqa: “Amam pitapas wañuchinkichu, amam hukwanqa waqllikunkichu, amam suwakunkichu, amam runamasikipa contranpiqa llullakunata rimankichu,

¹⁹tayta-mamaykitam respetanki, runamasikitam kikikita hina kuyanki”, nispa.

²⁰Hinaptinmi chay joven nirqa: Tukuy chaykunataqa ñam cumpliruniña. ¿Imatawanraqtaq ruwayman? nispan.

²¹Chaymi Jesusñataq nirqa: Mana pantaq runa kayta munaspaykiqa, tukuy imaykita rantikamuspa chay qollqeta wakchakunaman qomuy, chaynapim hanaq pachapi kapuqniyuq kanki hinaspa qatiway, nispa.

²²Jovenñataqmi chayta uyariykuspan, apu kasqanrayku llakisqallaña kutikurqa.

²³Hinaptinmi discipulonkunata Jesús nirqa: Cheqaptapunim nikichik, apuqa mayna sasatam Diospa munaychakuyninman yaykunqa.

²⁴Apu runa Diospa munaychakuyninman yaykunanmantaqa came-lloraqcha yaqapas agujapa rinrinta usturunman, nispa.

²⁵Chayta uyariykuspankum discipulonkuna aswanraq admiraykuspa nirqaku: ¿Hinaptinqa pitaq salvakuyta atinman? nispanku.

²⁶Jesusñataqmi paykunata qawarispan nirqa: Runakunapaqqa kayqa mana ruway atinanmi, Diospaqmi ichaqa atinallan, nispa.

²⁷Hinaptinmi Pedro nirqa: Ñoqaykuqa tukuy imata saqespam qatichkaykiku, chaynaqa, ¿imatataq chaskisaqku? nispa.

²⁸ Chaymi Jesusñataq nirqa: Cheqaptapunim nikichik, tukuy ima-pas musoqyachisqa kanan tiempo chayaramuptinmi kancharichkaq tro-nonpi runapa Churin tiyaykunqa, hinaptinmi qamkunapas chunka iskay-niyuq tronokunapi tiyaykuspa Israel ayllukunata juzgankichik.

²⁹Pipas wasinkunata, wawqenkunata, paninkunata, taytanta, mamanta, warminta, churinkunata, chakrankunata ñoqa-rayku saqeqqa, pachak kuti mastam chaskinqa, chaskinqataqmi wiñay kawsaytapas.

³⁰Ichaqa puntapi kaqkunam qepapi kanqaku, qepapi kaqkunañataqmi puntapi kanqaku, nispa.