Read CHUYA QELLQA La Biblia en Quechua de Ayacucho 2012 Mateo 21 Bible Online

Mateo 21 - CHUYA QELLQA La Biblia en Quechua de Ayacucho 2012 bible

Mateo 21

¹Jerusalén llaqtaman hichparus-pankum Betfagé llaqtaman chaya-rurqaku, hinaspam Olivos moqopa hichpanpi samarurqaku. Chaymantam Jesusqa iskay discipulonkunata kachaspan

²nirqa: Wak chimpa llaqtaman riychik, chaypim uñayuq china asnota watarayachkaqta tarinkichik. Paskaykuspa pusaramuychik.

³Sichum pipas imatapas nisuptikichikqa: “Señormi necesitachkan, chayllam kutichipamusunki” nispam ninkichik.

⁴Chayqa pasakurqa profetapa qellqasqan cumplikunanpaqmi.

⁵Paymi kaynata qellqarqa: Sión llaqtata niychik: “Reynikim qanman hamuchkan, asnopi silladam humildella hamuchkan, carga asnopa wawanpi silladam hamuchkan”, nispaykichik.

⁶Chaymi discipulonkuna rispanku Jesuspa kamachisqanman hina ruwarqaku.

⁷Asnota uñantinta aysaramuspanku capankuwan caronaykuptinkum Jesusñataq sillakuykurqa.

⁸Hinaptinmi achkallaña runakuna capankuta ñan-man mastarqaku. Wakinñataqmi sacha-pa kallmankunata kuchuspa Jesuspa pasanan ñanman mastarqaku.

⁹Ñawpaqninta qepanta riq runakunañataqmi qaparir-qaku: ¡Davidpa churinqa yupaychayqayá kachun! ¡Señorpa sutinpi hamuqqa yupaychasqayá kachun! ¡Hanaq pacha-pipas Diosqa yupaychasqayá kachun! nispanku.

¹⁰Jerusalenman Jesús yaykuruptinmi, llapa runakuna chaqwakuspa nirqaku: ¿Pitaq kayqa? nispanku.

¹¹Hinaptinmi runakunañataq nirqaku: Payqa Galilea law Nazaret llaqtayuq profeta Jesusmi, nispanku.

¹²Jesusmi temploman yaykurqa, hinaspam chaypi rantikuqkunatawan rantiqkunata qarqorqa. Qollqe cambiananku mesakunatawan paloma rantikuqkunapa sillankunatapas wikaparurqam.

¹³Hinaspam nirqa: Chuya Qellqapim nichkan: “Temployqa mañakuna wasiwan sutichasqam kanqa”, nispa; qamkunam ichaqa suwakunapa machayninta hinaña ruwarunkichik, nispa.

¹⁴Templopi kachkaptinmi ñawsakunawan wistukuna Jesusman asuykurqaku, hinaptinmi sanoyachirqa.

¹⁵Sacerdotekunapa kamachiqninkunawan Diospa leynin yachachiqkunañataqmi Jesuspa ruwasqan milagrokunata rikuspanku chaynataq warmakunapas “Davidpa Churin salvaykullawayku” nispa nisqankuta uyarispanku llumpayta piñakururqaku.

¹⁶Hinaspam Jesusta nirqaku: ¿Uyarichkankichu kaykunapa nisqanta? nispanku. Jesusñataqmi nirqa: Arí, uyarichkanim. ¿Manachu Qellqapi leerqankichik: “Llapa warmakunawan ñuñuq wawakunam yupaychasunki” nisqanta? nispa.

¹⁷Chaynata niruspanmi paykunata saqeruspan Betaniaman pasakurqa, chaypi samakunanpaq.

¹⁸Tutapayta Jerusalenman kutimuchkaspanmi yarqarachikurqa.

¹⁹Chaymi ñanpa patanpi higosta rikuruspan asuykurqa. Ichaqa manam ima rurutapas tarirqachu aswanqa llaqellantam. Chayraykum chay higosta nirqa: ¡Kunanmantaqa manañam haykapipas rurunkiñachu! nispan. Hinaptinmi chaypunilla chay higos chakirurqa.

²⁰Discipulonkunañataqmi chayta qawaykuspanku admirasqallaña Jesusta tapurqaku: ¿Imanasqataq kay higos chaypunilla chakirun? nispanku.

²¹Chaymi Jesusñataq nirqa: Cheqaptapunim nikichik, sichum iñispaykichik mana iskayrayaspaqa manam kay higos sachawan ruwas-qayta hinallachu ruwawaqchik, aswan-qa kay orqotapas niwaqchikmi: “Kay-manta suchuspa lamar qochaman wischukuykuy” nispaykichik, hinaptinqa chaynam kanman.

²²Sichum imatapas iñiywan mañakuspaykichikqa chaskinkichikpunim, nispan.

²³Chaykunapa qepantam, temploman Jesús yaykuruspan yachachichkarqa, hinaptinmi llaqtapa kamachiqninkunawan sacerdotekunapa kamachiqninkuna kaynata tapurqaku: ¿Pitaq kamachisurqanki kaykunata ruwanaykipaq? ¿Pitaq kaykunata ruwanaykipaq atiyta qosurqanki? nispanku.

²⁴Chaymi Jesusñataq nirqa: Ñoqapas tapusqaykichikyá, sichum kay tapusqayta contestawaptikichikqa ñoqapas nisqaykichikmi ima atiywanmi kaykuna ruwasqayta.

²⁵¿Pitaq bautizananpaq Juanta kachamurqa, Dioschu icha runakunachu? nispa. Chaynata niruptinmi kikinkupura kaynata nispa kutipanakurqaku: Sichum “Diosmi kachamurqa” niptinchikqa “¿Imanasqataq manaqa creerqankichikchu?” niwasunchiki.

²⁶Sichum “runakunallam kachamurqa” niptinchikqa llapa runakunachiki imatapas ruwaruwasun; Bautizaq Juantaqa profetapaqmi hapinku, nispanku.

²⁷Chaymi Jesusta nirqaku: Manam yachanikuchu, nispanku. Jesusñataqmi nirqa: Chaynaqa, ñoqapas manam nisqaykichikchu ima atiywanmi kaykuna ruwasqaytapas, nispa.

²⁸¿Imaninkichiktaq qamkuna? Huk runapam iskay churinkuna karqa, chaymi piwi churinta nirqa: “Churilláy, rispayá uvas chakranchikpi llamkamuy”, nispan.

²⁹Churinñataqmi nirqa: “Manam riymanchu”, nispa. Ichaqa allinta yuyaymanarispanmi pasarqa.

³⁰Chaymantam huknin churinmanpas asuykuspan hina chaynallata nirqa, hinaptinmi chay churinqa nirqa: “Arí taytáy, risaqmi” nispa. Ichaqa manam rirqachu.

³¹¿Kay iskayninkumanta mayqantaq taytanpa munasqanta ruwarqa? nispa. Chay runakunañataqmi nirqaku: Punta kaqmi, nispanku. Jesusñataqmi nirqa: Cheqaptaqa impuesto cobraqkunawan chuchumikakunaraqmi qamkunapa ñawpaqnikichikta Diospa munaychakuyninman richkanku.

³²Bautizaq Juanmi allin kawsakuymanta yachachisunaykichikpaq hamurqa, qamkunam ichaqa mana creerqankichikchu; impuesto cobraqkunawan chuchumikakunam ichaqa creerqaku. Qamkunaqa kaykunata qawachkaspapas manam paypi creenaykichikpaqqa wanakurqankichikchu.

³³Kay rikchanachiytawanyá uyariychik: Huk runam chakranpi uvasta plantaruspan muyuriqninta perqarachirqa, vinota ruwananpaqpas huk pozotam ruwachirqa, hinaspam cuidananpaq huk torreta ruwarurqa. Chaymantam chakra llamkaqkunaman arriendakuruspan illarurqa.

³⁴Cosecha tiempo chayaramuptinmi chay arriendaqninkunamanta tupaqninta mañamunankupaq serviqninkunata kacharqa.

³⁵Ichaqa arriendaqnin runakunam chay kacha-musqan serviqninkunata hapiruspanku hukninta maqaparurqaku, hukninta wañurachirqaku, huknintañataq rumiwan chamqaparurqaku.

³⁶Hinaptinmi chay chakrayuqqa punta kaqmantapas aswan achkataña serviqninkunata kacharqa; ichaqa chay llamkaqkunam ñawpaq hamuqkunata hina ruwarurqaku.

³⁷Chaykunapa qepantam churintaña kacharqa: “Churiytaqa respetanqakuchá”, nispa.

³⁸Ichaqa chay llamkaqkunam chakrayuqpa churinta rikuruspanku ninakurqaku: “Paymi herencia chaskiqqa, chaynaqa wañurachisun ñoqanchikña chakranwan qepakunanchikpaq”, nispanku.

³⁹Chaymi hapiruspanku chakramanta hawaman hurqoruspanku wañurachirqaku.

⁴⁰Chaynaqa, chakrayuq kutiramuspanqa, ¿imatataq chay llamkaqkunata ruwanqa? nispa.

⁴¹Uyariqninkunañataqmi nirqaku: Chay mana allin runakunataqa mana llakipayaspam wañurachinqa, hinaspam chakrantapas huk llamkaqkunamanña arriendakunqa chaynapi tiempollanpi payman tupaqnin cosechata qonankupaq, nispanku.

⁴²Jesusñataqmi nirqa: ¿Manachu Qellqapi leerqankichik: “Wasi perqaqkunapa wischupakusqanku rumim cimientopa esquinan hapiq rumiña rikurirun. Kaytaqa Diosmi ruwarun, chayraykum anchata admirakunchik nisqanta?” nispa.

⁴³Chaynaqa, nikichikmi, Diospa munaychakuyninmi qamkunamanta qechusqa kanqa, hinaspam Diospa munaychakuyninta ruruchiq llaqtamanña qosqa kanqa.

⁴⁴Chay rumiman wichiqñataqmi pakipasqa kanqa, rumipa hapisqanñataqmi ñutusqa kanqa, nispa.

⁴⁵Sacerdotekunapa kamachiqninkunawan fariseokunañataqmi Jesuspa rikchanachisqanta uyariruspanku, paykunamanta rimasqanta musyakururqaku.

⁴⁶Hinaspankum hapiruyta munarqaku, ichaqa runakunata manchakuspankum mana atirqakuchu, Jesusta profetapaq runakuna hapisqankurayku.