Read CHUYA QELLQA La Biblia en Quechua de Ayacucho 2012 Mateo 24 Bible Online

Mateo 24 - CHUYA QELLQA La Biblia en Quechua de Ayacucho 2012 bible

Mateo 24

¹Templomanta lloqsiruspa Jesús richkaptinmi discipulonkuna asuykuspanku templo imayna ruwasqam kasqanta qawachirqaku.

²Chaymi Jesús nirqa: ¿Qawachkankichikchu tukuy kaykunata? Cheqaptapunim nikichik, manam chulla rumillapas perqasqaqa qepanqachu, lliwmi tuñichisqa kanqa, nispa.

³Chaymantam Olivos moqoman pasarqaku, chaypi Jesús tiyaykuptinmi llapa discipulokuna sapanpi tapurqaku: Niykuwaykuyá, ¿haykapitaq kay nisqaykikuna pasakunqa? ¿Ima señaltaq kanqa kutimunaykita hinaspa kay pacha puchukananmanta yachanaykupaq? nispanku.

⁴Jesusñataqmi nirqa: Allintayá cuidakuychik, yanqataq pipas pantachisunkichikman.

⁵Achkaqmi ñoqapa sutiypi hamunqaku: “Ñoqam Cristo kani” nispanku, hinaspam achkaqta pantachinqaku.

⁶Guerrakunamantawan, guerrakuna kananmantam uyarinkichik, ichaqa amam manchakunkichikchu, chaykunaqa pasakunanpunim; chaywanpas manam puchukay punchawraqchu.

⁷Huk nacionmi huk nacionwan peleanqa, huk munaychakuqmi huk munaychakuqwan peleanqa; muchuypas, terremotokunapas kaypi chaypim kanqa.

⁸Chaywanpas kaykunaqa ñakariykunapa qallariyllanraqmi.

⁹Hinaptinmi ñakarinaykichikpaq entregasqa kaspa wañuchisqa kankichik, ñoqaraykum llapa runakuna cheqnisunkichik.

¹⁰Chay tiempopiqa achka runakunam iñiyninkuta saqenqa-ku, hinaspam hukninkumanta huk-ninkukama cheqninakuspa traicionanakunqaku.

¹¹Pantachikuq profetakunam achkallaña hatarinqaku, hinaspam achkaqta engañanqaku.

¹²Tukuy mana allin ruwaykuna llumpayta mirarusqanraykum achkaqpa kuyakuyninpas chirirunqa.

¹³Pipas tukupaykama takyaqmi ichaqa salvasqa kanqa.

¹⁴Diospa munaychakuyninmanta allin noticiam lliw kay pachapi willakusqa kanqa, chaynapi lliw runa yachananpaq, hinaptinñam tukupayqa hamunqa.

¹⁵Profeta Danielmi qellqarqa “Chuya” sutiyuq lugarpi millakuypaq kaqkunamanta (pipas kayta leeqqa entiendechun). “Chuya” sutiyuq lugarpi chaykunata rikuspaykichikqa,

¹⁶Judea lawpi kaqkunayá orqokunaman ayqechunku.

¹⁷Wasipa hawanpi kaqpas amañayá uraykamuchunchu imanpas hurqoqqa.

¹⁸Chakrapi kaqpas amañayá pachan hoqariqpas kutichunchu.

¹⁹¡Imaynaraq kanqaku chay punchawkunapi wiksayuq otaq ñuñuq wawayuq warmikuna!

²⁰Diostayá mañakuychik ayqenaykichikqa ama poqoy tiempopichu nitaq samana punchawpichu kananpaq.

²¹Chay punchawkunapiqa hatun ñakariymi kakunqa, chayna ñakariyqa kay pachapa qallariyninmantapuni kunankamapas manam karqachu, nitaqmi haykapipas kanqachu.

²²Sichum chay ñakariy punchawkuna mana asllayachisqa kaptinqa manachá pipas wañuymanta librakunmanchu. Ichaqa akllasqakunaraykum chay punchawkunaqa asllayachisqa kanqa.

²³Sichum pipas nisunkichik: “Qaway-chik, Cristoqa kaypim kachkan” otaq “Cristoqa wakpim kachkan”, nispa, hi-naptinqa amam creenkichikchu.

²⁴Chay punchawkunapiqa cristo tukuqku-nawan profeta tukuqkunam hatarimunqaku, hinaspam admirakuypaq milagrokunatawan señalkunata ruwan-qaku, chaykunawanmi Diospa akllasqan kaqkunatañapas pantachinqaku.

²⁵Qamkunataqa ñawpaqmantaraqmi nirqaykichikña.

²⁶Chaynaqa, sichum pipas nisunkichik: “Qawamuychik, purunpim kachkan”, nispa, hinaptinqa amam rinkichikchu; otaq: “Qawamuychik, wasipim kachkan”, nisuptikichikpas amataqmi creenkichikchu.

²⁷Imaynam llipya intipa qespimunan lawmanta lloqsispa intipa seqaykunan lawkama kancharin, chaynam runapa Churinpa hamunanpas kanqa.

²⁸Maypim ayapa kasqanpim ullachkukunapas huñunakunqaku.

²⁹Chay ñakariy punchawkuna pasaruptillanmi inti tutayarunqa, killapas manam kanchanqañachu, chaskakunapas wichimunqam, cielokunapi tukuy ima kaqkunapas katkatatanqam.

³⁰Hinaptinmi runapa Churinpa señalnin cielopi rikuriykamunqa, chaymi kay pachapi llapallan runakuna llumpayta mancharikuspa waqanqaku; hinaspam runapa Churinta puyupi tukuy atiyniywan hinaspa kanchariyniywan hamuchkaqta rikuykunqaku.

³¹Trompetapa waqayninwanmi angelninkunata kamachinqa, akllakusqankunata tukuy hinastinmanta huñumunankupaq.

³²Higos sachamanta yachachikuyta yachaychik: Kallmankuna llulluyariptinmi llaqenkunapas ikllimun, chaynapim yachankichik qoni tiempo hichpamusqanta.

³³Chaynaqa, tukuy kay nisqaykuna pasakuqta qawaspaykichikmi yachankichik tukupay tiempokunaqa hichpallaña kasqanta.

³⁴Cheqaptapunim nikichik, tukuy kaykunaqa cumplikunqa manaraqpas kay miraykuna tukuchkaptinmi.

³⁵Hanaq pachawan kay pachapas tukurunqam, palabraykunam ichaqa wiñaypaq takyanqa.

³⁶Ima punchawmi otaq imay horam kutimunaytaqa manam pipas yachanchu, hanaq pachapi angelkunapas manam yachankuchu, nitaqmi runapa Churinpas yachanchu, aswanqa Taytallaymi.

³⁷Imaynam Noeypa tiemponpi pasakurqa, chaynam runapa Churinpa kutimuyninpas kanqa.

³⁸Chay pun-chawkunapim manaraq sinchi para chayamuchkaptin llapa runakuna mikukuchkarqaku, upyakuchkarqaku, casarakuchkarqaku hinaspa casarachinakuchkarqaku; arcaman Noeypa yaykunan punchawkama.

³⁹Chayna kachkaptinkum sinchi para chayaramuspan llapallankuta chinkarachirqa. Runapa Churin kutimuptinpas chaynam kanqa.

⁴⁰Chay punchawpim chakrapi iskay kachkanqaku, hukninmi hoqarisqa kanqa, hukninñataqmi saqesqa.

⁴¹Iskay warmikunam molinopi kutakuchkanqaku, hukninmi hoqarisqa kanqa, hukninñataqmi saqesqa.

⁴²Chaynaqa, rikchan-rikchanllayá kaychik, qamkunaqa manam yachankichikchu ima punchawmi Señornikichik kutimunantaqa.

⁴³Kaytayá yachaychik, sichum wasiyuq yachanman imay horam suwa hamunanta hinaspaqa manachá puñunmanchu, chaynapi wasinta mana suwarunankupaq.

⁴⁴Chaynaqa, qamkunapas listollayá kaychik, runapa Churinqa mana yachasqaykichik horatam kutimunqa.

⁴⁵¿Pitaq allin yuyayniyuq hinaspa allin yachayniyuq sirvienteqa? ¿Paytaqa manachum patronninpas wasinpi churaykun, wasinpi kaqkunaman imam horapi mikuchinanpaq?

⁴⁶Mayna kusisqam kanqa sichum patronnin kutimuspa chayna ruwachkaqta tariykamuptinqa.

⁴⁷Cheqaptapunim nikichik, patronninqa tukuy kapuqninkunata nanachikunanpaqñam churaykunqa.

⁴⁸Ichaqa, sichum mana yuyayniyuq sirviente kaspa: “Patronniyqa haykapiraqya kutimunqapas”, nispan

⁴⁹sirvientemasinkunata maqapanman chaynataq sinkakunawan mikukuspa upyakunman.

⁵⁰Hinaptinqa mana yachasqan punchawpim patronnin kutiramuspan

⁵¹sinchita castigarunqa, hinaspam iskay uyakunatawan kuskata sentencianqa, chaypiqa waqakuywan kiru kirichichiyllañam kanqa, nispa.