Read CHUYA QELLQA La Biblia en Quechua de Ayacucho 2012 Mateo 25 Bible Online

Mateo 25 - CHUYA QELLQA La Biblia en Quechua de Ayacucho 2012 bible

Mateo 25

¹Diospa munaychakuyninqa rikchakun chunka sipaskunamanmi. Paykunam mecheronkuta aparikuspa novio taripaq lloqsirqaku.

²Pichqam karqaku allin yachayniyuq sipaskuna, pichqañataqmi mana yachayniyuqkuna.

³Mana yachayniyuq kaqkunam mecheronkuta aparqaku, aceitetam ichaqa mana aparqakuchu.

⁴Allin yachayniyuq kaqkunañataqmi mecheronkutawan kuskata aceiteta aysakuchankupi aparqaku.

⁵Novio manaña chayarimuptinmi puñuy aysaykuptin lliw puñururqaku.

⁶Yaqa chawpi tutatam huk qayakuy uyarikamurqa: “¡Noviom hamuchkanña, chaskinaykichikpaq lloqsiychik!” nispa.

⁷Hinaptinmi chay sipaskunaqa hatarispanku mecheronkuta alistarqaku.

⁸Chay mana yachayniyuq sipaskunañataqmi yachayniyuq sipaskunata nirqaku: “Aceitekichikta rakiykuwayku, mecheroykum wañuruchkanña”, nispanku.

⁹Chaymi yachayniyuq sipaskunañataq nirqaku: “Qamkunaman qoykuptiykuqa yanqañataq llapanchikpaq pisirunman, chaynaqa rantikuqkunamanyá riychik rantimunaykichikpaq”, nispanku.

¹⁰Rantiq rinankukamam novio chaya-ramurqa, hinaptinmi yachayniyuq sipaskuna noviowan casamiento convidoman yaykurqaku. Yaykuruptinkum punku wichqakururqa.

¹¹Chaymantam mana yachayniyuq sipaskunapas chayaramuspanku kaynata qayakurqaku: “¡Señor, señor, kichaykamullawayku!”, nispanku.

¹²Payñataqmi nimurqa: “Qamkunataqa manam reqsikichikchu”, nispa.

¹³Chaynaqa, rikchan-rikchanllayá kaychik, manam yachankichikchu ima punchawmi otaq imay horatam runapa Churin hamunantapas, nispa.

¹⁴Diospa munaychakuyninqa rikchakun karuman illananpaq serviqninkunata qayaykuspa qollqenta saqeykuq apumanmi.

¹⁵Hukninmanmi qoykurqa pichqa wayqa qollqeta, hukninmanñataq iskay wayqa qollqeta, hukninmanñataqmi huk wayqallata. Atisqankuman hina sapakamaman qoykuspanmi illarurqa.

¹⁶Pichqa wayqa chaskiqmi chay qollqewan negociota ruwaspan pichqa wayqatawan mirarachirqa.

¹⁷Chaynataqmi iskay wayqa chaskiqpas iskay wayqatawan mirarachirqa.

¹⁸Huk wayqallata chas-kiqñataqmi allpata uchkuruspan patronninpa qollqenta chaypi pakarurqa.

¹⁹Unaymantam chay sirvientekunapa patronnin kutiramurqa, hinaspam paykunamanta cuentata mañarqa.

²⁰Pichqa wayqa qollqeta chaskiqmi pichqa wayqatawan apamuspan nirqa: “Señor, pichqa wayqallatam qowarqanki, ichaqa pichqa wayqatawanmi mirarachimuni”, nispa.

²¹Hinaptinmi patronninñataq nirqa: “Qamqa allin serviqniymi kanki, asllata qochkaptiypas allinta ruwasqaykiraykum achkataraq qosqayki. Chaynaqa, yaykuspaykiyá ñoqawan kusikuy”, nispa.

²²Iskay wayqa qollqeta chaskiqpas chayaramuspanmi nirqa: “Señor, iskay wayqallatam qowarqanki, kay iskay wayqatawanmi mirarachimuni”, nispa.

²³Chaymi patronninñataq nirqa: “Qamqa allin serviqniymi kanki, asllata qochkaptiypas allinta ruwasqaykiraykum achkataraq qosqayki. Chaynaqa, yaykuspaykiyá ñoqawan kusikuy”, nispa.

²⁴Huk wayqa qollqellata chaskiqpas chayaramuspanmi nirqa: “Señor, yachar-qanim piña-piña runa kasqaykita, qam-qa mana tarpusqaykitam cosechanki, mana wayrachisqaykitam huñukunki.

²⁵Chayraykum manchakuspay qollqekita allpa ukupi pakarurqani, kayqaya qollqekiqa imam kaqlla kachkan”, nispa.

²⁶Hinaptinmi patronninñataq nirqa: “Qella, mana imapaq valeq sirviente, mana tarpusqayta cosechaq chaynataq mana wayrachisqayta huñukuq kasqayta yachachkaspaykiqa,

²⁷qollqeytaqa bancomanchiki churamuwaq karqa, chaynapi kutimuspay mirayniyuqta chaskikunaypaq”, nispan.

²⁸Hinaspam yanapaqninkunata kamachirqa: “Qechuspaykichik chay qollqeta chunka wayqa qollqeyuqman qoychik.

²⁹Kapuqniyuqmanqa aswanraqmi qosqa kanqa, chaynapi aswan kapuqniyuq kananpaq; mana kapuqniyuqmantam ichaqa aslla kapuqninpas qechusqa kanqa.

³⁰Chay mana imapas ruway yachaq sirvienteta hawaman, tutayaypa kasqanman wischumuychik; chaypim waqakuywan kiru kirichichiyllaña kanqa”, nispan.

³¹ Runapa Churinmi kanchariyninpi llapa angelninkunawan kuska hamuspan kancharichkaq trononpi tiyaykunqa,

³²hinaptinmi llapachallan nacionkuna qayllanman huñunakamuptinku payñataq hukninkumanta hukninkukama rakinanqa, imaynam huk michiq cabrakunamanta ovejakunata rakisqanta hina.

³³Ovejakunatam alleqninman rakinqa, cabrakunatañataqmi ichoqninman.

³⁴Hinaspanmi chay Reyqa alleq-ninpi kaqkunata ninqa: “Taytaypa bendecisqankuna hamuychik; manaraq kay pacha unanchasqa kachkaptin qamkunapaq churasqa munaychakuyta chaskiychik.

³⁵Qamkunaqa yarqaymanta kaptiymi mikuykachiwarqankichik, yakumanta kaptiymi yakuta qoykuwarqankichik; runapa llaqtanpi puriptiymi samaykachiwarqankichik.

³⁶Mana pachayuq kaptiymi pachaykachiwarqankichik, onqoptiymi watukaykamuwarqankichik, carcelpi kaptiymi watukaykamuwarqankichik”, nispa.

³⁷Hinaptinmi allin ruwaqkuna ninqaku: “Señor, ¿haykapitaq yarqaymanta kaptiki mikuykachirqaykiku? ¿Haykapitaq yakumanta kaptiki yakuta qoykurqaykiku?

³⁸¿Haykapitaq runapa llaqtanpi puriptiki samaykachirqaykiku? ¿Haykapitaq mana pachayuq kaptiki pachaykachirqaykiku?

³⁹¿Haykapitaq onqoptiki otaq carcelpi kaptiki watukaykamurqaykiku?” nispanku.

⁴⁰Hinaptinmi Reyñataq ninqa: “Cheqaptapunim nikichik, pipas kay waw-qeykunamanta taksan kaqllapaqpas ruwaspaykichikqa ñoqapaqmi ruwarqankichik”, nispan.

⁴¹Ichoqninpi kaqkunatañataqmi ninqa: “Llapa ñakasqakuna ñoqamanta anchuychik, diablopaqwan angelninkunapaq alistasqa wiña-wiñaypaq rawrachkaq ninaman.

⁴²Yarqaymanta kaptiypas manam mikuykachiwarqankichikchu, yakumanta kaptiypas manam tomaykachiwarqan-kichikchu.

⁴³Runapa llaqtanpi puriptiypas manam samaykachiwarqankichikchu, mana pachayuq kaptiypas manam pachaykachiwarqankichikchu, onqoptiypas hinaspa carcelpi kaptiypas manam watukuykuwarqankichikchu”, nispa.

⁴⁴Hinaptinmi paykunañataq ninqaku: “Señor, ¿haykapitaq yarqaymanta, yakunayasqata, runapa llaqtanpi, mana pachayuqta, onqosqata otaq carcelpi kachkaqta rikuspa mana yanapaykurqaykikuchu?” nispanku.

⁴⁵Chaymi payñataq ninqa: “Cheqap-tapunim nikichik, sichum kaykuna-manta taksan kaqllapaqpas mana ruwaspaykichikqa ñoqapaqpas manam ruwarqankichikchu”, nispa.

⁴⁶Paykunam wiña-wiñaypaq castigoman rinqaku, allin ruwaqkunañataqmi wiña-wiñay kawsakuyman rinqaku, nispan.