Read CHUYA QELLQA La Biblia en Quechua de Ayacucho 2012 Mateo 28 Bible Online

Mateo 28 - CHUYA QELLQA La Biblia en Quechua de Ayacucho 2012 bible

Mateo 28

¹Samana punchaw pasaruptinmi, domingo achikyaqman Magdala llaqtayuq Mariawan huknin María, sepultura qawaq rirqaku.

²Qonqaymantam huk terremoto pasakurqa; Señorpa angelninñataqmi hanaq pachamanta uraykamuspan sepulturaman asuykurqa, hinaspam rumita asurachispan chaypa hawanpi tiyaykurqa.

³Rikchayninmi karqa llipya hina, pachanñataqmi riti hina yuraq-yuraq.

⁴Payta rikuykuspankum Soldadokunapas manchakuymanta katkatataspanku wañusqa hina rikurirurqaku.

⁵Chay angelmi warmikunata nirqa: Ama manchakuychikchu, qamkunaqa chakatarusqanku Jesustam maskach-kankichik.

⁶Payqa manam kaypiñachu, nisqanman hinam kawsarirunña, hamuspayá maypim churasqankuta qawaykuychik.

⁷Hinaspayá utqayman rispa discipulonkunaman willamuychik: “Jesusqa kawsarirunmi, Galileamanmi ñawpachkan, chaypim tupankichik”, nispa. Chayllam niykunay karqa, nispan.

⁸Chaymi warmikunañataq sepulturamanta mancharisqallaña hinaspa llumpay kusisqa lloqsiramuspanku discipulokunaman willamunankupaq kallparqaku.

⁹Richkaptinkum paykunaman Jesús rikuriykuspan rimaykurqa. Paykunañataqmi asuykuspanku Jesusta chakinmanta abrazakuykuspanku hatuncharqaku.

¹⁰Chaymi Jesusñataq nirqa: Ama manchakuychikchu, waw-qeykunaman willamuychik Galilea lawman rinankupaq, chaypiñam tupasaqku, nispa.

¹¹Warmikuna richkaptinkum, llaqtaman wakin soldadokuna rispanku tukuy imam pasakusqanta sacerdotekunapa kamachiqninkunaman willamurqaku.

¹²Chay kamachikuqkunañataqmi ancianokunawan tanteanakunankupaq huñunakurqaku. Hinaspankum soldadokunaman achka qollqeta pagaruspanku

¹³nirqaku: Qamkunam ninkichik: “Puñunay-kukamam discipulonkuna hamuruspanku Jesuspa cuerponta suwarusqaku”, nispaykichik.

¹⁴Sichum chayta gobernador yacharuptinqa, ñoqaykum qamkunapa rantikichikpi rimarisaqku, chaynapi ama sasachakuyman chayanaykichikpaq, nispanku.

¹⁵Soldadokunañataqmi qollqeta chas-kikuruspanku paykunapa yachachis-qanta hinalla ruwarqaku. Chay llu-llakuspa rimasqankutam llapa judiokuna kunan punchawkama hinalla willakunku.

¹⁶Chunka hukniyuq discipulonkunam Galileaman rirqaku, Jesuspa nisqan orqoman.

¹⁷Chaymi Jesusta rikuykuspanku hatuncharqaku, wakiq-ninkuñataqmi iskayrayarqaku.

¹⁸Chaymi Jesusñataq paykunaman asuykuspan nirqa: Diosmi tukuy atiyta qoykuwan hanaq pa-chapipas chaynataq kay pachapipas.

¹⁹Chaynaqa, llapallan nacionkunaman riychik, hinaspayá discipulokunata hatarichimuspa, Taytapa, Churipa, Chuya Espiritupa sutinpi bautizamuychik.

²⁰Qam-kunaman tukuy ima kamachisqayta kasukunankupaq yachachimuychik. Ñoqaqa sapa punchawmi qamkunawan kasaq kay pacha puchukanankama, nispan.