Read CHUYA QELLQA La Biblia en Quechua de Ayacucho 2012 Mateo 7 Bible Online

Mateo 7 - CHUYA QELLQA La Biblia en Quechua de Ayacucho 2012 bible

Mateo 7

¹Runamasikichiktaqa amayá juzgaychikchu chaynapi Diospas mana juzgasunaykichikpaq.

²Imaynam juzgas-qaykichikman hinam Diospas juzga-sunkichik, imaynam ruwasqaykichikman hinataqmi Diospas qamkunawan ruwanqa.

³¿Imanasqataq wawqekipa ñawinpi qopataraq qawanki kikiki-pa ñawikipi kaspita mana qawachkaspaqa?

⁴Ñawikipi kaspi kachkaptinqa, ¿imaynataq wawqekita niwaq: “Ñawikipi qopata hurqorusqayki” nispaqa?

⁵¡Yaw, iskay uya! Puntataqa ñawikipi kaspitaraq hurqokuruy, chaynapi allinta qawakuspa runamasikipa ñawinmanta qopata hurqonaykipaq.

⁶Diospa kaqninkunataqa amayá allqokunamanqa qoychikchu, yanqañataq kutiriykuspa llikiparusunkichikman. Amataqyá perlaskunatapas kuchiku-namanqa qoychikchu, yanqam sarutyarunmanku.

⁷Mañakuptikichikqa qosunkichikmi, maskaspaqa tarinkichikmi, qayakuptikichikqa kichamusunkichikmi.

⁸Pipas mañakuqqa chaskinmi, maskaqqa tarinmi, qayakuqtaqa kichaykamunqam.

⁹¿Mayqannikichiktaq churikichik tantata mañakusuptikichik rumita qoy-kuwaqchik?

¹⁰¿Otaq challwata maña-kusuptikichik maqta uruta qoykuwaqchik?

¹¹Sichum qamkunapas mana allin runakuna kachkaspa allin kaqkunata churikichikman qochkaptikichikqa, ¿manachum hanaq pachapi Taytaykichikqa haykam mañakuqninkunamanqa allin kaqkunata qoykusunkichikman?

¹²Chaynaqa, imaynam runamasikichik qamkunapaq ruwananta munankichik, chaynatayá qamkunapas paykunapaq ruwaychik. Chaynatam kamachikuykunawan profetakunapas kamachiwanchik.

¹³Kichki punkuntayá yaykuychikqa, hatun punkuwan hatun ñanqa chinkaymanmi apakun, chaynintaqa achkallañam richkanku.

¹⁴Kawsayman apakuq ñanwan punkum ichaqa kichkilla, hinaspapas sasa purinam; chay ñannintaqa asllam richkanku.

¹⁵Llulla profetakunamantayá waqay-chakuychik. Paykunaqa ovejaman pachasqam hamunku, ukunkupim ichaqa suwa atoqkuna kanku.

¹⁶Qamkunaqa rurunpim reqsinkichik. Uvastaqa manam itanamantachu pallanku, nitaqmi higostapas kichkamantachu pallanku.

¹⁷Allin sachaqa allinkunallatam rurun, mana allin sachañataqmi mana allinta rurun.

¹⁸Allin sachaqa, mana allin rurutaqa manam rurunmanchu, nitaqmi mana allin sachapas allin rurutaqa rurunmanchu.

¹⁹Mana allin ruruq sachaqa kuchuchikuspam ninaman wischuchikunqa.

²⁰Chaynaqa, ruruyninpim reqsinkichik.

²¹Manam “¡Señorlláy, Señorlláy!” nispa lliw niwaqniykunachu Diospa munay-chakuyninmanqa yaykunqa, aswan-qa hanaq pachapi kaq Taytaypa munasqanta ruwaqkunallam.

²²Juicio punchawpiqa achkallañam niwanqaku: “Señorlláy, Señorlláy, ¿manachum sutikipi profetizarqaniku? ¿Manachum demoniokunatapas sutikipi qarqor-qaniku? ¿Manachum achka milagrokunatapas sutikipi ruwarqaniku?” nispanku.

²³Hinaptinmi nisaq: “Manam reqsikichikchu. ¡Mana allin ruwaqkuna, qayllaymanta anchuychik!”, nispay.

²⁴Pipas nisqaykunata uyarispan ruwayman churaqqa, taqrapa hawanpi wasichakuq allin yachayniyuq runamanmi rikchakun.

²⁵Chay wasimanmi para chayamurqa, lloqllam kallpamurqa, nisyu wayrapas pukumurqam, ichaqa taqrapa hawanpi ruwasqa kasqanraykum mana tuñirqachu.

²⁶Nisqayta uyarichkaspan mana ruwayman churaqmi ichaqa, aqopa hawanpi wasichakuq mana yachayniyuq runaman rikchakun.

²⁷Chay wasimanmi para chayamurqa, lloqllam kallpamurqa, nisyu wayrapas pukumurqam, hinaptinmi chinkanankama tuñiykurqa, nispa.

²⁸Rimayta Jesús tukuruptinmi, yacha-chikuyninkunawan llapa runakuna admi-rasqallaña karqaku.

²⁹Payqa atiywanmi yachachirqa, manam Diospa leynin yachachiqkuna hinachu, chayraykum admirakurqaku.