Read CHUYA QELLQA La Biblia en Quechua de Ayacucho 2012 Mateo 9 Bible Online

Mateo 9 - CHUYA QELLQA La Biblia en Quechua de Ayacucho 2012 bible

Mateo 9

¹Jesusmi barcaman qespiykuspan lamar qochata chimparuspan llaqtanman chayarurqa.

²Hinaptinmi suchu runata chakanapi wantumurqaku, chaymi Jesusñataq paykunapa iñiyninta qawaykuspan chay suchuta nirqa: Churilláy kallpanchakuy, huchaykikunaqa pampachasqañam, nispan.

³Diospa leynin yachachiqkunamantam wakiqnin kaynata rimapakurqaku: “Kay runaqa Diospa contranpim riman”, nispanku.

⁴Chayna piensasqankuta yachaspanmi Jesús nirqa: ¿Imanasqataq mana allinkunata piensankichik?

⁵Mayqantaq fácil kanman: ¿Huchaykikunaqa pampachasqañam niychu, icha hatarispayki “puriy” niychu?

⁶Kunanmi yachankichik, runapa Churinqa huchakunata pampachananpaq kay pachapi atiyniyuq kasqanta. Chaynata niruspanmi suchuta nirqa: Hatarispayki chakanaykita aparikuspa wasikiman ripukuy, nispa.

⁷Hinaptinmi chay suchuqa hatarispan wasinman ripukurqa.

⁸Chayta qaway-kuspankum llapa runakuna mancharikurqaku, hinaspam runakunaman atiy qosqanmanta Diosta yupaycharqaku.

⁹Chaymanta pasaspanmi Mateota Jesús rikururqa, Romapaq impuesto cobrananpi tiyachkaqta, hinaspam nirqa: Qatiway, nispan. Hinaptinmi Mateoqa hatarispan paywan pasakurqa.

¹⁰Mateopa wasinpi Jesús mikuch-kaptinmi impuesto cobraqkunawan huchasapapaq qawasqa runakuna achkallaña hamurqaku, hinaspankum Jesuswan chaynataq discipulonkunawan kuska mikurqaku.

¹¹Llapa fariseokunañataqmi chayta qawaykuspanku Jesuspa discipulonkunata tapurqaku: ¿Imanasqataq yachachiqnikichikqa impuesto cobraqkunawan hinaspa hucha-sapakunawan kuska mikuchkan? nispanku.

¹²Chayta uyariruspanmi Jesús nirqa: Sano runakunaqa manam medico-taqa necesitankuchu, aswanqa onqoqkunallam.

¹³Rispaykichik, “Kuyapayakuq kanaykichiktam munani, manam sacrificiotachu” nisqanpa imam ninanta yachamuychik. Ñoqaqa hamurqani manam justo runakuna qayaqchu, aswanqa llapa huchasapakuna huchankumanta wanakunankupaq qayaqmi.

¹⁴Bautizaq Juanpa discipulonkunam asuykuspanku Jesusta tapurqaku: Fariseokunawan ñoqaykuqa llumpaytam ayunaniku, ¿imanasqataq discipuloykikunaqa mana ayunankuchu? nispanku.

¹⁵Jesusñataqmi nirqa: ¿Yaqachum casamientoman riq runakuna paykunawan novio kachkaptin llakisqa kanmanku? Ichaqa chayamunqam punchaw paykunamanta novio qechusqa kaptin ayunanankupaq.

¹⁶Manam pipas mawka pachata musoq latapawanqa remiendanmanchu, musoq latapaqa chintiruspanmi mawka pachata astawan llikirunman.

¹⁷Manataqmi pipas mana poqosqa vinotaqa mawka odrekunamanqa hillpunmanchu, chay odrekuna toqya-ruptinmi vinopas chaynataq odrekunapas yanqachakurunman. Chayraykum mana poqosqa vinotaqa musoq odrekunaman hillpuna, chaynapi odrepas vinopas waqaychasqa kanankupaq.

¹⁸Chaykunata Jesús rimachkaptinmi judiokunapa kamachiqnin chayaramuspan Jesuspa qayllanpi qonqorakuykuspan nirqa: Warmi churiymi kunallan wañukun, sichum rispayki llapchaykamuptikiqa kawsarirunqam, nispan.

¹⁹Chaymi Jesusqa hatarispan discipulonkunawan kuska pasakurqa.

²⁰Hinaptinmi chunka iskayniyuq wataña yawarpakuy onqoywan ñakariq warmiñataq Jesuspa capanpa patanta qepanmanta llapchaykurqa.

²¹Chay warmim sonqonpi kaynata nirqa: “Sichum capallantapas llapchaykuspayqa allinyarusaqmi”, nispan.

²²Jesusñataqmi muyuriykuspan payta rikururqa, hinaspam nirqa: Churilláy kallpanchakuy, iñiynikiman hinam allinyarunki, nispan. Hinaptinmi chaylla allinyarurqa.

²³Chay kamachikuqpa wasinman Jesús chayaruspanmi, qena tocaqkunatawan llapa runakunata chaqwakuchkaqta tariykurqa.

²⁴Chaymi paykunata Jesús nirqa: Kaymanta lloqsiychik, warmaqa manam wañusqachu kachkan, aswanqa [4]“puñuyllam puñuchkan”, nispan. Hinaptinmi runakunañataq Jesusta asipayarqaku.

²⁵Ichaqa runakunata hawaman qarqoramuptinkum, Jesusñataq yaykuykuspan warmata makinmanta aysariykurqa hinaptinmi payñataq hatarirurqa.

²⁶Chay ruwasqanmi llapallan llaqtakunapi uyarikurqa.

²⁷Chaymanta Jesús lloqsiptinmi iskay ñawsakuna qatirqaku kaynata qaparis-panku: ¡Davidpa churin, llakipayariykullawayku! nispanku.

²⁸Wasiman Jesús yaykuruptinmi ñawsakunañataq asuykurqaku, hinaptinmi Jesusñataq tapurqa: ¿Creenkichikchu allinyarachinayta? nispan. Chaymi nirqaku: Arí, Señorllayku, nispanku.

²⁹Hinaptinmi ñawinkuta llapchaykuspan Jesús nirqa: Iñiynikichikman hinayá ruwasqa ka-chun, nispa.

³⁰Chaymi ñawinku qawarikuruptin paykunata Jesús kamachirqa ama pimanpas willakunankupaq.

³¹Paykunam ichaqa lloqsiruspanku Jesuspa ruwasqankunamanta tukuy hinastin llaqtakunapi willakurqaku.

³²Chay runakuna lloqsiruptillanmi demoniopa huntasqan mana rimaq runata Jesusman pusaramurqaku.

³³Chaymi demoniota qarqoruptin chay runa rima-rirurqa. Llapa runakunañataqmi admirakuspa nirqaku: Israelpiqa manam kaynakunataqa haykapipas rikurqanchikchu, nispanku.

³⁴Fariseokunam ichaqa nirqaku: Kay runaqa demoniokunata qarqon demoniokunapa kamachiqninpa atiyninwanmi, nispanku.

³⁵Jesusmi llapallan llaqtakunapi hinaspa taksa llaqtakunapipas purirqa, Diospa munaychakuyninmanta sinagogakunapi willakustin, tukuy rikchaq onqoyniyuqkunata hinaspa nanayniyuqkunata sanoyachistin.

³⁶Chaymi achkallaña runakunata qawaykuspan paykunamanta llakipayarikurqa, mana michiqniyuq wischusqa ovejakuna hina cheqesqa kasqankumanta.

³⁷Hinaspanmi discipulonkunata nirqa: Cosechanapaqqa achkallañam kachkan, cosechaqkunam ichaqa aslla.

³⁸Chaynaqa, cosechapa dueñontayá mañakuychik llamkaqkunata kachamunanpaq, nispa.