Read CHUYA QELLQA La Biblia en Quechua de Ayacucho 2012 Marcos 11 Bible Online

Marcos 11 - CHUYA QELLQA La Biblia en Quechua de Ayacucho 2012 bible

Marcos 11

¹Jerusalén llaqtaman hichparamuspankum Betfagé hinaspa Betania llaqtakunaman chayarurqaku. Chay llaqtakunaqa karqa Olivos moqopa waqtanpim. Chaymantam iskay discipulonkunata kachaspan

²nirqa: Wak chimpa llaqtata riruychik, chayaruspaykichikmi manaraq pipa-pas sillakusqan malta asnota watas-qata tarinkichik, paskaramuspa pusaramuychik.

³Sichum pipas: “¿Imapaqtaq paskachkankichik?” nispa tapusuptikichikqa kaynatam ninkichik: “Señormi necesitachkan, chayllam kutichipamusunki”, nispaykichik.

⁴Chaymi pasaspanku malta asnota ñanpa patanpi kaq wasipa punkunpi watasqata tariykuspanku paskarqaku.

⁵Chaypi kaqkunañataqmi nirqaku: ¿Imatataq ruwachkankichik? ¿Imapaqtaq chay asnota paskachkankichik? nispanku.

⁶Paykunañataqmi Jesuspa imam nisqanta hina nirqaku, chaymi manaña harkakuptinku pusamurqaku.

⁷Jesuspa kasqanman asnota aysaramuspankum capankuwan caronaykuptinku Jesusñataq sillakuykurqa.

⁸Hinaptinmi llapa runakuna capankuta ñanman mastarqaku, wakinñataqmi sachapa kallmankunata kuchuspanku pasanan ñanman mastarqaku.

⁹ Jesuspa qepanta chaynataq ñawpaqninta riqkunañataqmi kaynata qaparirqaku: ¡Yupaychasunchik! ¡Señorpa sutinpi hamuqqa alabasqayá kachun!

¹⁰¡Taytanchik Davidpa hamuq munaychakuyninyá hatunchasqa kachun! ¡Hanaq pachapi kawsakuq Dios salvaykullawayku! nispanku.

¹¹Jesusñataqmi Jerusalén llaqtaman chayaruspan temploman yaykurqa, ichaqa tardeña kaptinmi tukuy imata qawarispallan Betania llaqtaman chunka iskayniyuq discipulonkunawan kuska pasakurqa.

¹²Paqarinnintin punchawmi, Beta-niamanta lloqsichkaptinku Jesús yar-qarachikurqa,

¹³chaymi karullamantaraq llaqesapallaña higosta rikururqa, hinaspam “icha ima rurullanpas kachkan” nispan asuykurqa, ichaqa manaraq tiempon kasqanraykum mana ima rurutapas tarirqachu, aswanqa llaqellantam.

¹⁴Chayraykum chay higos sachata nirqa: Kunanmantaqa manañam pipas ruruykita mikunqañachu, nispa. Chay nisqantam discipulonkuna uyarirqaku.

¹⁵Jerusalén llaqtaman chayaruptinkum, temploman Jesús yaykuruspan chaypi llapa rantiqkunatawan rantikuqkunata qarqoyta qallaykurqa, qollqe cambiananku mesakunatapas chaynataq paloma rantikuqkunapa sillankunatapas wikaparurqam.

¹⁶Hinaspanmi templontakama imapas aparisqa pasanankuta mana munarqachu.

¹⁷Chaypim Jesús kaynata yachachirqa: ¿Manachu Qellqapi nichkan: “Wasiyqa llapallan nacionkunapaqmi mañakuwananku wasiwan sutichasqa kanqa”, nispa? Qamkunam ichaqa suwakunapa machayninta hinaña ruwarunkichik.

¹⁸Chayta uyariruspankum, sacerdotekunapa kamachiqninkunawan Diospa leynin yachachiqkunaqa imaynam wañurachiyta maskarqaku, ichaqa manchakurqakum, llapa runakuna Jesuspa yachachisqanwan admirakusqankurayku.

¹⁹Tutaykaramuptinmi llaqtamanta discipulonkunawan Jesús pasakurqa.

²⁰Paqarinnintin punchawmi, chay higos sachapa hichpanta pasachkaspanku sapinmanta chakisqataña rikururqaku.

²¹Chaymi Pedro yuyariruspan Jesusta nirqa: Yachachikuq qawariy, qayna punchaw ñakasqayki higos sacham chakirusqa, nispa.

²²Chaymi Jesusñataq nirqa: Diospi iñiynikichik kachun.

²³Cheqap-tapunim nikichik, pipas sonqonpi mana iskayrayaspa kay orqota ninman: “Kaymanta suchuspa lamar qochaman wischukaykamuy” nispa, chay nisqan cumplikunanta creeptinqa, ruwasqam kanqa.

²⁴Chaynaqa, nikichikmi, imatapas Diosta mañakuspaykichikqa, chaskisqaykichikpaqña hapiychik, hinaspaqa chaskinkichikmi.

²⁵Diosta mañakuspaykichikqa piwanpas piñanakusqaykichiktayá puntataqa pampachaychik, chaynapi hanaq pachapi kaq Taytaykichikpas huchaykichikta pampachasunaykichikpaq.

²⁶[8][Sichum qamkuna mana pampachaptikichikqa, hanaq pachapi kaq Taytaykichikpas manam pampachasunkichikchu], nispa.

²⁷Jerusalenman huktawan kutiruptinkum, Jesusqa templopi purichkarqa, hinaptinmi sacerdotekunapa kamachiqninkunawan Diospa leynin yachachiqkuna hinaspa ancianokuna asuykuspanku

²⁸tapurqaku: ¿Pipa kamachisqantaq kaykunata ruwanki? ¿Pitaq kamachisurqanki kaykunata ruwanaykipaq? nispanku.

²⁹Chaymi Jesusñataq nirqa: Ñoqapas tapusqaykichikyá, sichum contestawaptikichikqa, ñoqapas pipa kamachikuyninwanmi kaykuna ruwasqaytam nisqaykichik.

³⁰Niwaychikyá: ¿Pitaq bautizananpaq Juanta kamachimurqa, Dioschu icha runakunachu? nispa.

³¹Chaynata Jesús tapuptinmi kikinkupura atipanakurqaku: Sichum “Diosmi kachamurqa” nip-tinchikqa, “¿imanasqataq manaqa creer-qankichikchu?” niwasunmi.

³²Mana-taqmi nichwanchu “runakunallam ka-chamurqa nispapas”. Aswanqa llapa runakunatam manchakurqaku Juanta profetapaq hapisqankurayku.

³³Chaymi Jesusta nirqaku: Manam yachanikuchu, nispanku. Jesusñataqmi nirqa: Chaynaqa, manam ñoqapas nikichikmanchu pipa kamachikuyninwanmi kaykuna ruwasqayta, nispa.