Read CHUYA QELLQA La Biblia en Quechua de Ayacucho 2012 Marcos 3 Bible Online

Marcos 3 - CHUYA QELLQA La Biblia en Quechua de Ayacucho 2012 bible

Marcos 3

¹Jesusmi huktawan sinagogaman yaykurqa, chaypim kachkarqa chakisqa makiyuq runa.

²Fariseokunañataqmi Jesusta wateqachkarqaku samana pun-chawpi sanoyarachiptinqa chaymanta acusanankupaq.

³Jesusñataqmi chakisqa makiyuq runata nirqa: Hatarispayki kay chawpipi sayay, nispa.

⁴Hinaspam llapa runakunata tapurqa: ¿Imatataq samana punchawpi ruwayta atichwan, allin kaqtachu icha mana allin kaqtachu? ¿Runapa vidan salvaytachu icha wañurachiytachu? nispa. Paykunañataqmi upallalla karqaku.

⁵Chaymi Jesusqa muyuriqninpi kaqkunata piñasqallaña qawarispan rumi sonqo kasqankumanta llakikurqa; chay runatañataqmi nirqa: Makikita haywariy, nispa. Haywariykuptillanmi makin sanoyarurqa.

⁶Hinaptinmi fariseokuna lloqsiramuspanku Herodespa qatiqninkunawan huñunakuruspanku Jesusta imaynam wañuchinankupaq tanteanakururqaku.

⁷Jesusñataqmi discipulonkunapiwan qochapa patanman pasakurqaku, hinaptinmi achkallaña runakuna Galilea lawmanta qatirqaku.

⁸Jesuspa tukuy ima ruwasqanta yacharuspankum qawaq rirqaku Judea lawmanta, Jeru-salenmanta, Idumeamanta, Jordán mayupa waklawninmanta, Tiro hinaspa Sidón llaqtakunapa muyuriqninkunamantapas.

⁹Achkallaña runakuna chaypi kasqanraykum discipulonkunata Jesús kamachirqa huk barcata alistanankupaq, chaynapi llapa runakuna mana ñitirunanpaq.

¹⁰Chaynataqa kamachikurqa, achka onqoqkunataña sanoyarachisqanraykum tukuy rikchaq onqoyniyuqkunapas Jesusta llapchaykunankupaq ñitinakustin asuykusqankuraykum.

¹¹Demoniopa huntasqan runakunañataqmi Jesusta rikuruspanku ñawpaqninpi qonqorakuspanku kaynata qaparirqaku: ¡Qamqa Diospa Churinmi kanki! nispanku.

¹²Jesusñataqmi paykunata chunkay-chunkayta kamachirqa pim kasqanmanta ama pimanpas willakunankupaq.

¹³Chaymantam Jesusqa wakin puriqmasinkunata pusarikuspan orqoman rirqa, chaypi huñunakuruptinkum,

¹⁴paykunamanta chunka iskayniyuqta akllarqa paywan kuska purinankupaq, chaynapi kamachiptin Diospa munaychakuyninmanta willakamunankupaq.

¹⁵Hinaspam demoniokunata qarqonankupaq atiyta qorqa.

¹⁶Chay chunka iskayniyuq discipulonkunam karqa: Simón, paytam Pedrowan suticharqa;

¹⁷Jacobowan Juan, paykunaqa Zebedeopa churinkunam karqaku, paykunatam Boanergeswan suticharqa, chayqa “Rayopa churinkuna” ninanmi.

¹⁸Wakinñataq Andrés, Felipe, Bartolomé, Mateo, Tomás, Alfeopa churin Jacobo, Tadeo, cananista Simón,

¹⁹hinaspa Judas Iscariote, paymi Jesusta traicionarurqa.

²⁰Chaymantam Jesuswan discipulonkuna wasiman kutimurqaku, hinaptinmi huktawan achkallaña runakuna huñunakaramurqaku, chaymi Jesuspas nitaq discipulonkunapas manaña mikuytapas atirqakuñachu.

²¹Jesuspa ayllunkunañataqmi chaypi kasqanta yacharuspanku, “locoyarunmi” niptinku pusanankupaq hamururqaku.

²²Diospa leynin yachachiqkunapas Jerusalenmanta hamuspankum nirqaku: Kay runaqa demoniokuna kamachiq Beelzebúpa nisqapa huntasqanmi kachkan, paypa atiyninwanmi demoniokunata qarqon, nispanku.

²³Jesusñataqmi paykunata qayaspan rikchanachiykunawan nirqa: ¿Imaynataq Satanasqa kikillanta qarqokunman?

²⁴Sichum huk nación iskayman rakinasqa kaspaqa manam takyan-manchu.

²⁵Huk ayllupas rakinasqa kaspaqa manataqmi takyanmanchu.

²⁶Chaynataqmi Satanaspas kikinpa contranpi hatarispaqa mana takyanmanchu, aswanqa puchukarunqam.

²⁷Kallpasapa runapa wasintaqa manam pipas suwayta atinmanchu, payta manaraq puntata chaqnaruspaqa. Chaqnaruspam ichaqa tukuy imankunatapas suwarunman.

²⁸Cheqaptapunim nikichik: Diosqa pampachanqam runakunapa huchankutawan kikin kamisqankutapas.

²⁹Chuya Espirituta kamiqkunatam ichaqa mana haykapipas pampachanqachu, aswanqa wiñaypaq huchayuqmi kanqaku, nispa.

³⁰Chaytaqa nirqa: “Jesusqa mana allin espiritupa huntasqanmi kachkan”, nispa rimasqankuraykum.

³¹Jesuspa kasqanmanmi mamanwan wawqenkuna chayarurqaku, hinaspam hawallamanta payta qayachirqaku.

³²Chaymi Jesuspa muyuriqninpi tiyaqkuna nirqaku: Mamaykiwan wawqekikunam maskasuspayki hawapi kachkanku, nispanku.

³³Jesusñataqmi nirqa: ¿Pitaq mamaywan wawqeykunaqa? nispan.

³⁴Hinaspam muyuriqninpi tiyaqkunata qawarispan nirqa: Paykunam mamaywan wawqeykunaqa.

³⁵Pipas Diospa munasqanta ruwaqmi mamayqa, wawqeyqa hinaspa paniyqa, nispa.