Read CHUYA QELLQA La Biblia en Quechua de Ayacucho 2012 Marcos 4 Bible Online

Marcos 4 - CHUYA QELLQA La Biblia en Quechua de Ayacucho 2012 bible

Marcos 4

¹Jesusmi qochapa patanpi huktawan yachachiyta qallaykurqa. Achkallaña runakuna huñunakaramuptinmi, qochapi barcaman qespispan Jesús tiyaykurqa, llapa runañataqmi qochapa patallanpi karqaku.

²Chaypim rikchanachiykunawan tukuy imamanta yachachispan nirqa:

³Uyariychik, huk runam tarpukuq lloqsirqa.

⁴Muhuta machqeptinmi, ñanman wakin wichirqa, hinaptinmi urpitukuna hamuruspa mikururqaku.

⁵Wakinñataqmi mana ancha allpayuq ranraman wichirqa, hinaspanmi as allpallapi kasqanrayku chaylla wiñaramurqa.

⁶Ichaqa mana allin sapichakusqa kasqanraykum inti ruparamuspa chakirachirqa.

⁷Wakin muhuñataqmi kichka-kichka ukuman wichiykurqa, hinaptinmi kichkakuna wiñaruspa eqoyarachirqa, chaymi mana rururqachu.

⁸Wakinñataqmi allin allpaman wichiykurqa, chaymi wiñarus-pan allinta rururqa; huk muhullamantam rururqa kimsa chunkata, soqta chunkata hinaspa pachakninpi.

⁹¡Uyarikuqkunaqa kasukuchunyá! nispa.

¹⁰Sapallanña Jesús qeparuptinmi, paypa hichpanpi kaqkunawan kuska chunka iskayniyuq discipulonkuna tapukurqaku, ima ninanmi chay rikchanachiy kasqanmanta.

¹¹Jesusñataqmi paykunata nirqa: Qamkunamanqa Diosmi munaycha-kuyninpi pakasqa kaqkunata yachachisunkichik, hawapi kaqkunamanmi ichaqa rikchanachiykunawan yachachin,

¹²qawachkaspankupas mana rikunankupaq, uyarichkaspankupas mana entiendenankupaq, chaynapi Diosman mana kutirikunankupaq hinaspa huchan-kumantapas mana pampachasqa kanankupaq, nispa.

¹³Chaymantam Jesús nirqa: ¿Manachu qamkunapas kay rikchanachiyta entiendenkichik? Hinaspaqa, ¿imaynataq wakin rikchanachiykunataqa entiendewaqchik?

¹⁴Chay tarpuqqa Diospa palabran willakuqmi.

¹⁵Ñanman wichiq muhuñataqmi allin noticiata uyariq runaman rikchakun, ichaqa Satanasmi hamuruspan sonqonpi tarpusqa Diospa palabranta chaylla hurqorun.

¹⁶Pisi allpayuq ranraman wichiq muhuñataqmi Diospa palabranta uyariykuspa kusikuyllawanña chaskikuq runaman rikchakun,

¹⁷ichaqa mana allin sapichasqa kasqankuraykum mana unaytachu takyan. Diospa palabranrayku ñakarichisqa hinaspa qatikachasqa kaspankum chaylla kutikunku.

¹⁸Kichka-kichka ukuman wichiq muhum, Diospa palabranta uyariqkunaman rikchakun,

¹⁹ichaqa kay pachapi kaqkunamanta preocupakuykunam, qori-qollqella maskaykunam hinaspa tukuy ima munapayaykunam paymanta munaychakuruspan Diospa palabranta chinkarachin, chaynapi mana rurunankupaq.

²⁰Allin allpaman wichiq muhuñataqmi Diospa palabranta uyariykuspa chaskikuq runaman rikchakun, paykunaqa achkanpim rurunku; paykunaqa chullallamantam rurun kimsa chunkata, soqta chunkata hinaspa pachakta, nispa.

²¹Jesusqa nirqataqmi: ¿Yaqachu mecherota ratachichwan cajón ukuman otaq camapa ukunman churarunapaq? Manam chaynachu; mecherotaqa ratachinku alto pataman churaptinku allinta achkinanpaqmi.

²²Chaynaqa, imapas pakasqa kaqkunaqa yachasqam kanqa, imapas upallallapi rimasqakunaqa uyarisqam kanqa.

²³Uyarikuqkunaqa kasukuchunku.

²⁴Allintayá uyariychik. Imaynam runamasikichikwan ruwasqaykichikman hinam Diospas qamkunawan ruwanqa; qamkunawanqa aswantaraqmi ruwanqa.

²⁵Kapuqniyuqmanqa mastaraqmi qonqa, aslla kapuqniyuqmantam ichaqa aslla kapuqnintapas qechunqa, nispa.

²⁶Jesusmi nirqa: Diospa munaychakuyninqa muhuta chakranpi tarpuq runamanmi rikchakun.

²⁷Puñuptin otaq rikchaptinpas, tutapas otaq punchawpas, muhuqa paypa mana yachasqallantam wiñan.

²⁸Chaytaqa allpam wiñachimun: Wiñamuptinñataqmi puntata tullun rikurimun, chaymantañataq espigamun hinaspam rurun;

²⁹poqoruptinñataqmi, cosecha chayaramuptin rutuytaña qallarinku, nispa.

³⁰Jesusmi huktawan nirqa: ¿Imawantaq Diospa munaychakuyninta tupachichwan? ¿Imawantaq rikchanachichwan?

³¹Mostaza muhu hinam. Mostazaqa allpapi tarpusqapas wakin muhukunamantaqa taksachallam,

³²wiñaruspanmi ichaqa wakin qorakunamantapas aswan hatunraq, kallmankunapas hatun kasqanraykum alton pawaq urpitukunapas chaypi qesachakunku, nispa.

³³Chayna rikchanachiykunawanmi runakunata Jesús yachachirqa entiendey atinankupaq hinalla.

³⁴Mana rikchanachispaqa manam imatapas rimarqachu, discipulonkunamanmi ichaqa sapallankupi allinta entiendechiq.

³⁵Chay punchawmi tutaykaramuptin discipulonkunata Jesús nirqa: Chimpaman hakuchik, nispa.

³⁶Hinaspam llapa runakunata saqeruspanku Jesusta barcapi aparqaku; wakin barcakunapas waqtankutam rirqaku.

³⁷Richkaptinkum sinchillaña wayra hatarirurqa, hinaptinmi yakupa olankunapas hoqarikuspa barcaman yaqaña huntarurqa.

³⁸Jesusñataqmi sawnapakuykuspa qepa lawpi puñukuchkarqa. Chaymi rikchachispanku nirqaku: Yachachikuq ¿manachu imapas qokusunki? ¡Chinkaykuchkanchikñam! nispanku.

³⁹Jesusñataqmi hatarispan wayrata qaqcharqa, qochatañataqmi nirqa: ¡Hawkayay! nispan. Chaymi wayra samaruptin lliw hawkayarurqa.

⁴⁰Chaymantam discipulonkunata nirqa: ¿Imanasqataq mancharisqallaña kachkankichik? ¿Manachu iñiynikichik kan? nispa.

⁴¹Paykunañataqmi llumpay mancharisqallaña kikinkupura ninakurqaku: ¿Pitaq kay runaqa wayrapas yakupas kasunanpaqqa? nispanku.