Read CHUYA QELLQA La Biblia en Quechua de Ayacucho 2012 Marcos 9 Bible Online

Marcos 9 - CHUYA QELLQA La Biblia en Quechua de Ayacucho 2012 bible

Marcos 9

¹Cheqaptapunim nikichik, kaypi kaqkunamantam wakiqninku mana wañunqachu Diospa munaychakuynin atiywan hamuqta rikunankukama, nispa.

²Soqta punchaw pasaruptinmi orqoman Jesús qespirqa, Pedrota, Jacobota hinaspa Juanta pusarikuspan. Chaypim paykunapa qayllanpi Jesuspa rikchaynin tikrakururqa.

³Pachanmi riti hina kancharichkaq rikurirurqa, manam pipas kay pachapi chayna yuraq-yuraq kanankamaqa taqsayta atinmanchu.

⁴Hinaptinmi Eliastawan Moisesta Jesuswan rimachkaqta rikururqaku.

⁵Chaymi Jesusta Pedro nirqa: ¡Yachachikuq, allinmi kaypi kayniykuqa! Kimsa chukllakunatayá ruwarusaqku, hukta qampaq, hukta Moisespaq, huktañataq Eliaspaq, nispa.

⁶Mancharisqa kasqankuraykum Pedroqa mana musyakustin chaynata rimarurqa.

⁷Hinaptinmi puyu rikuriykamuspa paykunata pampaykurqa, chay puyu ukumantam huk rimay uyarikamurqa: Paymi kuyasqay Churiy, payta uyariy-chik, nispa.

⁸Qonqayta muyuriqninkuta qawarispankum manaña pitapas rikurqakuchu, aswanqa Jesusllatañam.

⁹Orqomanta uraykamuchkaptinkum paykunata Jesús nirqa, qawasqankuta ama pimanpas willakunankupaq, runapa Churin wañusqanmanta kawsarimunankama.

¹⁰Chaynapim paykunaqa mana piman-pas willakurqakuchu, ichaqa kikin-kupuram tapunakurqaku imam chay wañusqamanta kawsarimuy kasqanta.

¹¹Chaymi Jesusta tapurqaku: ¿Imanasqataq Diospa leynin yacha-chiqkuna ninku “puntataqa Eliasmi hamunqa?” nispanku.

¹²Hinaptinmi Jesusñataq nirqa: Arí, Eliasmi puntamunqa hinaspam tukuy imata allichanqa. ¿Manachu Diospa Qellqanpi nin: “Runapa Churinqa ñakarichisqa kaspam despreciasqa kanqa”, nispan?

¹³Ichaqa nikichikmi, Eliasqa ñam hamurunña, aswanqa paymanta Qellqapa nisqanman hinam munasqankuta payta ruwarqaku, nispa.

¹⁴Wakin discipulokunapa kasqanman chayaruspankum, paykunapa muyuriqninpi achkallaña runakunata tariykurqaku, chaypitaqmi Diospa leynin yachachiqkunapas kachkarqaku Jesuspa discipulonkunawan atipanakuspanku.

¹⁵Chaymi Jesusta rikuykuspanku admirasqallaña kallpaspanku rimaykurqaku.

¹⁶Jesusñataqmi discipulonkunata tapurqa: ¿Imamantataq paykunawan atipanakuchkankichik? nispa.

¹⁷Hinaptinmi runakunamanta hukkaqnin nirqa: Yachachikuq, kay churiytam qanman pusamurqani, payman mana allin espíritu yaykuruptinmi mana rimaq rikurirun.

¹⁸Chaymi chay mana allin espirituqa munarispanqa pampakunaman maypipas wischuykun, payñataqmi pusoqollataña atqospan kirunkunatapas kirichichiyllaña kachukun, hinaspam kaskitakun. Discipuloykikunatam chay mana allin espirituta qarqonankupaq nirqani ichaqa manam atirqakuchu, nispa.

¹⁹Jesusñataqmi nirqa: ¡Mana iñiyniyuq runakuna! ¿Hayka-pikamataq qamkunawan kasaq? ¿Hay-kapikamataq aguantasqaykichik? Chay warmata apamuychik, nispa.

²⁰Pusaramuptinkum chay mana allin espirituqa Jesusta rikuruspan warmata taspiparuspan pampaman wikaparurqa, hinaptinmi warmañataq kuchpaykachakuspan pusoqollataña atqorqa.

²¹Jesusñataqmi chay warmapa taytanta tapurqa: ¿Hayka watañataq kaynata churiki ñakarin? nispa. Chaymi nirqa: Taksa kasqanmantaraqmi.

²²Kay mana allin espirituqa achka kutipim wañurachinanpaq ninamanpas otaq yakumanpas wischuykun. Sichum ima ruwaytapas atispaykiqa, ñoqaykumanta llakipayarikuspayá yanapaykullawayku, nispa.

²³Jesusñataqmi nirqa: Sichum creeptikiqa, haykam creeqpaqqa manam imapas sasachu, nispa.

²⁴Hinaptinmi chay warmapa taytanñataq qaparispan nirqa: ¡Creenim, aswanraq creenaypaqyá yanapaykullaway! nispa.

²⁵Jesusñataqmi runakuna aswanraq huñunakamusqanta qawarispan chay mana allin espirituta qaqcharqa: Upayachikuq hinaspa mana rimachikuq espíritu, ñoqam kamachiki, kay warmamanta lloqsiy hinaspa amaña huktawanqa kutiykuyñachu, nispan.

²⁶Hinaptinmi chay mana allin espirituqa qaparispanraq chay warmata taspiparuspan lloqsirurqa, hinaspam wañusqata hinaraq saqerurqa; chaymi llapa runakuna nirqaku: “Wañurunmi”, nispanku.

²⁷Jesusmi ichaqa makinmanta hapiykuspan hatariykachiptin warma sayarirurqa.

²⁸Wasiman Jesús yaykuruptinmi discipulonkuna sapaqman qayaykuspanku tapurqaku: ¿Imanasqataq chay mana allin espirituta qarqoyta mana atirqanikuchu? nispanku.

²⁹Chaymi Jesusñataq nirqa: Kayna demoniotaqa [5][ayunowan] hinaspa Diosta mañakuspallam qarqona, nispa.

³⁰Chaymanta lloqsiruspankum Galilea lawninta rirqaku, Jesusmi mana munarqachu chaynin pasasqanta runakuna yachananta,

³¹discipulonkunata yachachisqanrayku. Jesusmi discipulonkunata nirqa: Runapa Churinqa runakunapa makin-man entregasqam kanqa, hinaptinmi wañuchinqaku, ichaqa kimsa punchawmantam kawsarimunqa, nispa.

³²Discipulonkunam ichaqa chay nisqanta mana entienderqakuchu, tapuykuytapas manchakurqakutaqmi.

³³Capernaúm llaqtaman chayaruspa wasipiña kachkaptinkum, discipulonkunata Jesús tapurqa: ¿Imamantataq hamusqanchikpi atipanakurqankichik? nispa.

³⁴Paykunam ichaqa upallalla karqaku, ñanpi kikinkupura pim puntapi kananmanta atipanakamusqankurayku.

³⁵Chaymi Jesusñataq tiyaykuspan chunka iskayniyuq discipulonkunata qayaykuspan nirqa: Pipas puntapi kayta munaspaqa, lliwmanta qepapi kaspam wakiqninpa serviqnin kanan, nispa.

³⁶Chaymantam huk warmachata chawpinkuman sayaykachirqa, hinaspam payta marqakuykuspan discipulonkunata nirqa:

³⁷Pipas sutiypi kayna warmachata chaskiykuqqa ñoqatam chaskiwan, pipas chaskiwaqniyqa manam ñoqallatachu chaskiwan, aswanqa kachamuwaqniy Taytaytam, nispa.

³⁸Hinaptinmi Jesusta Juan nirqa: Yachachikuq, huk runatam rikuramuniku demoniokunata qampa sutikipi qarqochkaqta. Hinaspaykum ñoqanchikwan mana purisqanrayku harkakaramuniku, nispan.

³⁹Jesusñataqmi nirqa: Ama harkakuychikchu, pipas ñoqapa sutiypi milagrota ruwaqqa manam contraypiqa rimanmanchu.

⁴⁰Pipas mana contranchikpi kaspaqa ñoqanchikwanmi kachkan.

⁴¹Ñoqapa kasqaykichikrayku huk vaso yakullatapas ñoqapa sutiypi qoykusuqnikichikqa, cheqaptapunim premionta chaskinqa.

⁴²Ñoqapi iñiq taksakunamanta hukkaqninta pipas huchallichiqtaqa, allinchá kanman molino rumita kunkanman wataruspanku lamar qochaman wischuykuyninku.

⁴³Sichum makiki huchallichisuptikiqa kuchukuruy, allin-qa kanman huknin makiyuqllañapas wiñaypaq kawsakuynikim, iskaynin makintin wiñaypaq rawrachkaq infier-noman wischusqa kanaykimantaqa.

⁴⁴[6][Chaypiqa manam urunkupas wañunchu nitaq ninapas wañunchu].

⁴⁵Sichum chakiki huchallichisuptikiqa qorukuruy, allinqa kanman huknin chakillañapas wiñaypaq kawsakuynikim, iskaynin chakintin wiñaypaq rawrachkaq infiernoman wischusqa kanaykiman-taqa.

⁴⁶[7][Chaypiqa manam urunkupas wañunchu nitaqmi ninapas wañunchu].

⁴⁷Sichum ñawiki huchallichisuptikiqa hurqokuruy, allinqa kanman chulla ñawillañapas Diospa munaychakuyninman yaykuynikim, iskaynin ñawintin wiñaypaq rawrachkaq infiernoman wischusqa kanaykimantaqa.

⁴⁸Chaypiqa manam urukunapas wañunchu nitaqmi ninapas wañunchu.

⁴⁹Lliwmi kachiwan hina ninawan chuyanchasqa kanqaku.

⁵⁰Kachiqa allinmi, sichum kachi qamyayaruspanqa, ¿imapaqtaq valenman? Amayá qamkunapi kachi pisichunchu, chaynapi runamasikichikwanpas hawkalla kawsanaykichikpaq, nispa.