Read CHUYA QELLQA La Biblia en Quechua de Ayacucho 2012 Lucas 11 Bible Online

Lucas 11 - CHUYA QELLQA La Biblia en Quechua de Ayacucho 2012 bible

Lucas 11

¹Huk sitiopim Jesús mañakuchkarqa, chaymi tukuykuptin huknin discipulon nirqa: Señor, imaynam Bautizaq Juanpas discipulonkunata yachachisqanta hinayá qampas Diosta imaynam mañakuyta yachachiwayku, nispa.

²Chaymi Jesusñataq nirqa: Diosta mañakuspaqa kaynatam ninkichik: Hanaq pachapi kaq Taytayku, sutiki hatunchasqa kachun, munaychakuyniki hamuchun, munasqayki ruwasqa kachun, kay pachapi chaynataq hanaq pachapipas.

³Sapa punchawyá tantaykuta qowayku.

⁴Huchaykutayá pampachawayku, imaynam ñoqaykupas mana allin ruwawaqniykuta pampachasqaykuta hina. Amayá tentacionmanqa kachaykuwaykuchu, mana allinmantayá hurqoykuwayku, nispa.

⁵Jesusqa nirqataqmi: Sichum hukkaqnikichikpa amistadnikichik kanman, hinaptinñataq chawpi tutataña rispaykichik kaynata ruegakuwaqchik: “Vecino, ama hina kaspayá kimsa tantaykita aynikuykuway,

⁶Amistadniymi chayaramuwan, chaymi mikuykachinaypaq mana imallaypas kanchu”, nispaykichik.

⁷Hinaptin payñataq ukumanta nimusunkichikman: ¡Ama churmichawaychu! Punkuytapas wichqaramuniñam, ñoqapas chaynataq warmaykunapas puñuchkanikuñam manam hatarimuymanñachu, nispa.

⁸Ichaqa nikichikmi, amistadnikichik kasqanrayku manaña qosunaykichikpaq hatarimuyta munachkaspapas, mana penqaypi kananraykum hatarimuspan tukuy ima mañakusqaykichikta qoykusunkichik.

⁹Nikichikmi: Mañakuspaqa chaskinkichikmi, maskaspaqa tarin-kichikmi, qayakuptikichikqa kichaykamusunkichikmi.

¹⁰Chaynaqa, pipas mañakuqqa chaskinmi, maskaqqa tarinmi, qayakuqtaqa kichaykamunqam.

¹¹¿Ima taytataq qamkunamanta tantata churikichik mañakusuptikichik rumita qoykuwaqchik? ¿Challwata mañakusuptikichikñataq maqta uruta qoykuwaqchik?

¹²¿Otaq runtuta mañakuptin atoq-atoqta qoykuwaqchik?

¹³Sichum qamkuna mana allin runakuna kachkaspa churikichikman allin kaqkunata qochkaptikichikqa, ¿mana-chum hanaq pachapi kaq Taytaykichikqa Chuya Espiritunta mañakuptikichikqa qoykusunkichikman? nispa.

¹⁴Huk kutipim mana rimachikuq demoniota Jesús qarqochkarqa, chaymi chay demoniota qarqoruptin mana rimaq runaqa rimarqaña. Chayta rikuykuspankum llapa runakuna admirasqallaña karqaku.

¹⁵Ichaqa wakinmi nirqaku: Kay runaqa demoniokunataqa qarqon demoniokuna kamachiq Beelzebupa atiyninwanmi, nispanku.

¹⁶Wakinñataqmi Jesusta imawanpas wichichiypi rispanku, hanaq pachamanta milagrota ruwananpaq mañarqaku.

¹⁷Ichaqa Jesusmi paykunapa piensasqanta yachaspan nirqa: Ima nacionpas kikillanpura rakinasqa kaspaqa purmarunqam, huk ayllupas kikillanpura rakinasqa kaspaqa chinkarunqam.

¹⁸Sichum Satanás kikinpa contranpi kaptinqa, ¿imaynataq munaychakuyninqa takyanman? Chaynataqa nikichik “kay runaqa demoniokunataqa qarqon Beelzebupa atiyninwanmi” nisqaykichikraykum.

¹⁹Sichum nisqaykichikpi hina, demoniokunata Beelzebupa atiyninwan ñoqa qarqoptiyqa ¿pipa atiyninwantaq churikichikkunaqa demoniokunata qarqonku? Chaynaqa, paykunam juzgasunkichik.

²⁰Sichum demoniokunata Diospa atiyninwan qarqoptiyqa, Diospa munaychakuyninmi chayaramusunkichik.

²¹Allin armasqa, kallpasapa runa wasinpi kapuqninkunata waqaychaptinqa, tukuy imankunapas hawkam kanqa.

²²Sichum paymanta aswan kallpasapa runa hamuruspanqa, venceruspanmi armankunatapas qechuruspan tukuy imankunatapas munasqanta ruwarunqa.

²³Pipas mana ñoqawan kaqqa contraypim kachkan. Ñoqawan kuska mana huñuqñataqmi usuchichkan.

²⁴Runamanta demonio lloqsiruspanqa, chunniq chaki allpakunapim samaykuyta maskastin purin, mana tarispanñataqmi nin: “Lloqsimusqay wasiyman kutikusaq”, nispan.

²⁵Chayaruspanñataqmi sumaq pichasqata hinaspa allichasqata tariykun.

²⁶Hinaspanmi kutirispan kikinmantapas aswan mana allin qanchis espiritukunataraq pusaramurqa, chay runaman usturuspan yachakunankupaq. Chaynapim chay runaqa ñawpaq kasqanmantapas aswan mana allinña rikurirun, nispa.

²⁷Chaynata Jesús rimachkaptinmi, runakunapa chawpinmanta huk warmi qaparimurqa: ¡Mayna kusisqaraq wachakusuqniki hinaspa ñuñusuqniki warmiqa! nispa.

²⁸Chaymi Jesusñataq nirqa: Aswan kusisqaqa Diospa palabranta uyarispa kasukuqkunam, nispa.

²⁹Jesuspa muyuriqninman llapa runakuna huñunakaramuptinmi paykunata nirqa: Kay miraykunaqa mana allin runa-kunam, milagro ruwanaytaraqmi maña-kunkupas. Ichaqa manam ruwasqachu kanqa, qawaspaqa qawachisaq Jonasta imam pasasqallantam.

³⁰Imaynam Nínive llaqtapi runakunapaq Jonás señal hina karqa, chaynam runapa Churinpas kunan tiempo miraykunapaq señal kanqa.

³¹Sur lawpi reinapas juicio punchawpim kay miraykunapa contranpi hatarimunqa, hinaspam paykunata condenanqa. Payqa karu-karu llaqtamantaraqmi hamurqa rey Salomonpa yachaynin uyariq. Kaypiqa tarikun Salomonmantapas aswan masraqmi.

³²Nínive llaqtapi runakunapas juicio punchawpi kawsarimuspam kay miraykunata condenanqaku. Paykunaqa Jonaspa willakusqanwanmi huchankumanta wanakurqaku, kaypiqa tarikun Jonasmantapas aswan masraqmi.

³³Mecherotaqa manam pakarunapaqchu ratachina, nitaqmi cajonpa ukunman churarunapaqchu, aswanqa altoman churanapaqmi, chaynapi wasiman yaykuqkunata achkinanpaq.

³⁴Ñawiqa cuerpopa achkiyninmi. Sichum ñawiki allin kaptinqa cuerpoykipas achkipa huntasqanmi kachkan. Ñawiki mana allin kaptinmi ichaqa cuerpoykipas tutayaypi kachkan.

³⁵Chaynaqa, cuidakuyá, qampi achkiy ama tutayarunanpaq.

³⁶Sichum cuerpoyki achkiypa huntasqan kaspan mana imaniraqllapas tutayayniyuq kaptinqa, tukuy imatam sutillata rikunki imaynam mecherowan rikusqaykita hina.

³⁷Rimayta Jesús tukuruptillanmi, huk fariseoñataq wasinman convidarqa mikuykamunanpaq, chaymi rispan mikunanpaq tiyaykurqa.

³⁸Ichaqa paykunapa costumbrenman hina makinta Jesús mana mayllakuptinmi chay fariseoqa hukmanyasqallaña qawarayarqa.

³⁹Chaymi Jesusñataq nirqa: Yaw fariseokuna, qamkunaqa vasotawan platotapas hawallantam mayllankichik, ukuykichikmi ichaqa suwakuywan hinaspa mana allin ruwaywan huntasqa kachkan.

⁴⁰¡Mana yachayniyuqkuna! ¿Manachum hawanta ruwaqqa ukuntapas ruwarqa?

⁴¹Kapusuqnikichikmantayá limosnatapas qoychik, chaynapi tukuy imapas limpio kapusunaykichikpaq.

⁴²¡Ay, imaynaraq kankichik! Llapa fariseokuna qamkunaqa hierbabuenamanta, rudamanta hinaspa tukuy rikchaq yuyukunamantam diezmota qonkichik. Allin ruwaytawan Diosta kuyaytam ichaqa qonqarunkichik. Kaytayá ruwaychik diezmo qoytapas ama qonqaspa.

⁴³¡Ay, imaynaraq kankichik! Llapa fariseokuna qamkunaqa sinagogakunapipas ñawpaqllapi tiyaytaraqmi munankichik, plazakunapipas hatun respetowan rimaykusunaykichiktam munankichik.

⁴⁴¡Ay, imaynaraq kankichik! Qamkunaqa mana rikuriq sepulturakuna hinam kachkankichik, chayraykum runakunapas mana yachaspa hawanta purinku, nispa.

⁴⁵Hinaptinmi Diospa leynin yacha-chiqkunamanta hukkaqnin nirqa: Yachachikuq, chaynata rimaspaykiqa ñoqaykutapas insultawachkankikum, nispa.

⁴⁶Chaymi Jesusñataq nirqa: Diospa leynin yachachiqkuna, ¡qamkunapas imaynaraq kankichik! Qam-kunaqa runakunamanmi mana apay atinanku llasaq qepita qepirachinki-chik, qamkunam ichaqa mana llap-chayllapas-llapchaykunkichikchu.

⁴⁷¡Ay, imaynaraq kankichik! Qamku-naqa ñawpaq taytaykichikkunapa wa-ñuchisqan profetakunapa sepulturankunatam hatarichinkichik.

⁴⁸Chaykunata ruwaspaqa ñawpaq taytaykichikkunapa imam ruwasqantam allinmi nichkankichik, paykunam wañuchirqaku qamkunañataqmi sepulturanta hatarichinkichik.

⁴⁹Chayraykum Diosqa yachayninpi nir-qaña: “Profetakunatawan apostolkunatam kachasaq, wakintam wañuchinqa-ku wakintañataqmi qatikachanqaku”, nispa.

⁵⁰Chayraykum kay miraykunamanta cuentata Dios mañanqa, kay pachapa qallariyninmantapuni llapa profetakunapa yawarnin chaqchusqankumanta,

⁵¹Abelpa wañusqanmanta qallaykuspa Zacariaskama, Zacariastam altarmanta santuarioman rinapi wañurachirqaku. Chayraykum nikichik, paykunapa wañusqanmantam kunan miraykunata cuentata Dios mañanqa.

⁵²¡Ay, imaynaraq kankichik! Diospa leynin yachachiqkuna, qamkunaqa yachaypa llaventam hapikurunkichik, manam yaykuyta munankichikchu, nitaqmi hukkuna yaykukunantapas munankichikchu, nispa.

⁵³Chaymanta Jesús lloqsiruptinmi, Diospa leynin yachachiqkunawan fariseokuna llumpayta piñakuruspanku tukuy rikchaq tapukuykunawanña hapirqaku,

⁵⁴rimas-qanpi imapipas pantaruptinqa chay rimasqallanwan wichirachispa acusanankupaq.