Read CHUYA QELLQA La Biblia en Quechua de Ayacucho 2012 Lucas 2 Bible Online

Lucas 2 - CHUYA QELLQA La Biblia en Quechua de Ayacucho 2012 bible

Lucas 2

¹Chay punchawkunapim rey César Augusto kamachikurqa llapallan llaqtakunapi runakuna censasqa kanankupaq.

²Kay punta kaq censom apakurqa Siria nacionpi Cirenio gobernador kachkaptin.

³Chaynapim nacesqanku llaqtaman padronachikuq sapakama rirqaku.

⁴Chaymi Davidpa mirayninmanta kaq Joseypas rirqa Galilea lawpi Nazaret llaqtamanta Judea lawpi Belén llaqtaman. Chay llaqtatam “Davidpa Llaqtan” nispa suticharqaku.

⁵Joseymi padronachikunanpaq rirqa warmin Mariawan kuska. Mariaqa wiksayuqmi kachkarqa.

⁶Belenpi kachkaptinkum Mariapa wachakunan punchaw chayaramurqa,

⁷hinaptinmi piwi qari wawanta wachakururqa, hinaspanmi pañalkunawan maytuykuspan animalman qarana artesapi siriykachirqa. Chaynataqa ruwarqa samapakuna wasipi manaña sitio kasqanraykum.

⁸Belén llaqtapa hichpanpim michiqkuna kachkarqaku, ovejankuta purunpi tukuy tuta cuidaspanku.

⁹Paykunamanmi qonqaymanta Señorpa angelnin riku-riykurqa, hinaptinmi muyuriqninkuta Diospa achkiynin kanchariykurqa, chaymi anchallataña mancharikurqaku.

¹⁰Angelñataqmi nirqa: Ama manchakuychikchu, allin willa-kuytam apamuchkaykichik, chaywanmi llapa runakunapas kusikunqaku.

¹¹Salvaqnikichikmi “Davidpa Llaqtanpi” nacerapusunkichik, payqa Cristom hi-naspa Señormi.

¹²Kaymi qamkunapaq señal kanqa: Wawatam pañalkunawan aytisqata tariykunkichik animalman qarana artesapi puñuchkaqta, nispa.

¹³Hinaptinmi qonqaymanta chay angelwan kuska hanaq pachamanta achkallaña angelkuna rikuriykamurqaku, paykunam Diosta yupaychaspanku kaynata takirqaku:

¹⁴¡Diosyá hanaq pachapi yupaychasqa kachun! ¡Kay pachapipas Diospa kuyasqan runakunapaqyá hawkayay kachun! nispanku.

¹⁵Llapa angelkuna hanaq pachaman kutikuptinkum michiqkunañataq ninakurqaku: Rispanchikyá Señorpa willachi-wasqanchikman hina Belén llaqtapi imam pasakusqanta qawamusunchik, nispanku.

¹⁶Hinaspam chaylla pasaspanku Ma-riatawan Joseyta tariykurqaku chay-nataq wawatapas animalman qara-na artesapi puñuchkaqta.

¹⁷Qaway-kuspankum wawamanta angelpa tukuy imam nisqanta willakurqaku.

¹⁸Chaymi llapa uyariqkunapas michiqkunapa willakusqankuwan admirakurqaku.

¹⁹Mariam ichaqa tukuy chaykunata sonqollanpi hatallispan yuyaymanarqa.

²⁰Michiqkunañataqmi imaynam angelpa nisqanman hina tukuy ima pasakusqanta qawaykuspanku chaynataq uyariykuspanku Diosta yupaychastin kusisqallaña kutikurqaku.

²¹ Pusaq punchawninmanmi wawata señalarqaku qari kayninpa qarachanta kuchuspa, hinaspam Jesuswan suticharqaku, imaynam Mariaman manaraq wiksayakuchkaptin angelpa nisqanman hina.

²²Moisespa kamachisqanman hina chuyanchakunanku punchawkuna cumplikuruptinmi, wawata Jerusalén llaqtaman aparqaku Señorman presentamunankupaq.

²³Chaynataqa ruwarqaku Señorpa kamachikuyninpi: “Punta naceq qari wawaqa Señorpaq sapaqchasqam kanqa”, nisqanraykum.

²⁴Rirqakuqa Señorpa kamachikuyninman hina, iskay qoqñukunata otaq iskay mallqo palomakunata ofrecemunankupaqmi.

²⁵Jerusalenpim Simeón sutiyuq runa yacharqa, payqa allin kaqkunata ruwaspa kuyapayakuq runam karqa. Paymi Israel nación salvasqa kananta suyachkarqa. Payqa Chuya Espiritupa huntasqanmi karqa.

²⁶Paymanmi Chuya Espíritu revelarqa Señorpa kachamusqan Cristota rikuykuspaña wañukunanpaq.

²⁷Paymi temploman rirqa Chuya Espiritupa kallpanchasqan. Jesuspa tayta-mamanmi leypa nisqanta cumplinankupaq wawata temploman aparqaku.

²⁸Hinaptinmi Simeonñataq wawata marqakuykuspan Diosta kaynata yupaycharqa:

²⁹Señorlláy, prometewasqaykim cumplikurun, chaynaqa hawkañayá wañukusaq.

³⁰Salvaqniykutam rikuykuniña,

³¹paytaqa qanmi kachamurqanki, chaytam lliw runakuna rikunqaku,

³²Paymi llapa nacionkunapaq achkiy kanqa, llaqtayki Israelpaqñataqmi hatunchakunan kanqa, nispa.

³³Jesuspa tayta-mamanñataqmi, wawamanta Simeonpa nisqankunata uyariykuspanku admirasqallaña karqaku.

³⁴Simeonñataqmi paykunata bendeciykuspan Jesuspa maman Mariata nirqa: Kay wawam Israelpi runakunapaq kanqa wakinpaq urmachiqnin, wakin-paqñataq hatarichiqnin. Paymi huk señal kanqa, achkaqmi contranpi hatarinqaku.

³⁵Chaynapim achkaq runakunapa imaynam piensasqanku yachasqa kanqa. Tukuy chaykunam espada hina sonqoykita llakichinqa, nispa.

³⁶Chaypitaqmi kachkarqa Aserpa mirayninmanta kaq Fanuelpa churin profetisa Anapas, payqa ancha yuyaqñam karqa. Paymi warmallaraq kachkaspan casarakururqa, ichaqa qanchis watallam qosanwan kawsarqa.

³⁷Viudayaruspam pusaq chunka tawayuq watanpiña karqa. Payqa manam templomanta lloqsiqchu, aswanqa tuta punchawmi ayunowan hinaspa oracionwan Señorta servirqa.

³⁸Chayllamanmi pay chayaramurqa, hinaspanmi Diosman graciasta qospan Jerusalén salvasqa kananta suyaqkunaman Jesusmanta willakuyta qallaykurqa.

³⁹Señorpa kamachikuyninkunata cumpliruspankum, Galilea lawpi Naza-ret llaqtankuman kutikurqaku.

⁴⁰Wawañataqmi wiñasqanman hina kallpata hapirqa, yachaypa huntasqanmi karqa, Diospa kuyakuyninpas paywanmi karqa.

⁴¹Jesuspa tayta-mamanmi Pascua fiestaman sapa wata Jerusalenta riqku.

⁴²Chunka iskayniyuq watanpiña Jesús kachkaptinmi, costumbrenkuman hina Jerusalenta fiestaman rirqaku.

⁴³Fiesta tukuytam wasinkumanña kutirqaku, Jesusñataqmi tayta-mamanpa mana yachasqallanta Jerusalenpi qeparurqa.

⁴⁴Runakunawan kuska hamusqanta piensaspankum tayta-mamanqa huk punchaw puriytaña rirurqaku, ichaqa watukuykuspankum ayllunkunata hinaspa reqsinakusqankunata tapukachakurqaku.

⁴⁵Manaña tarispankum Jerusalén llaqtaman kutirqaku maskamunankupaq.

⁴⁶Kimsa punchawmantañam templopi tarirurqaku Diospa leynin yachachiqkunata uyarispan hinaspa tapuspan paykunawan tiyachkaqta.

⁴⁷Llapa uyariqninkunapas yachay-niyuq kasqanwan hinaspa tapukuykuna kutichisqanwanmi admirakurqaku.

⁴⁸Tayta-mamanñataqmi tariruspanku admirakurqaku. Chaymi maman nirqa: Wawalláy, ¿imanasqataq kayta ruwa-ruwankiku? Taytaykiwan ñoqam llakis-qallaña maskamuchkaykiku, nispa.

⁴⁹Chaymi Jesusñataq nirqa: ¿Imanasqataq maskawarqankichik? ¿Manachu yacharqankichik Taytaypa kaqninkunapi kanayta? nispa.

⁵⁰Paykunam ichaqa chay nisqanta mana entienderqakuchu.

⁵¹Chaymantam Jesusqa taytama-manwan Nazaretman kutirqa, hi-naspam paykunata kasukuspan chay-pi yacharqa. Mamanñataqmi tukuy chaykunata sonqollanpi waqaychar-qa.

⁵²Jesusmi wiñarqa yachayninpi, sayayninpi chaynataq Diospa hinaspa runakunapa allin qawasqan kaw-sayninpi.