Read CHUYA QELLQA La Biblia en Quechua de Ayacucho 2012 Lucas 20 Bible Online

Lucas 20 - CHUYA QELLQA La Biblia en Quechua de Ayacucho 2012 bible

Lucas 20

¹Huk punchawmi runakunata templopi Jesús yachachispan allin noticiata willachkarqa, hinachkaptinmi sacerdotekunapa kamachiqninkunawan Diospa leynin yachachiqkuna hinaspa judiokunapa kamachiqninkuna chayaruspa

²tapurqaku: Niwayku, ¿ima atiywantaq kaykunata ruwachkanki? ¿Pitaq kay atiyta qosurqanki? nispanku.

³Chaymi Jesusñataq nirqa: Ñoqapas tapusqaykichikyá:

⁴¿Pitaq bautizananpaq Juanta kachamurqa, Dioschu icha runakunachu? nispa.

⁵Chaynata Jesús tapuptinmi kikinkupura kutipanakurqaku: “Sichum Diosmi kachamurqa” niptin-chikqa, “¿imanasqataq manaqa creerqankichikchu?” niwasunchiki.

⁶Manataqmi nichwanchu “Runakunallam kachamurqa” nispapas, chaynata niptinchikqa llapa runakunam rumiwan chamqaparuwachwan, Juantaqa profetapaqmi hapinku, nispanku.

⁷Chaymi Jesusta nirqaku: Manam pipa kachamusqantapas yachanikuchu, nispanku.

⁸Hinaptinmi Jesusñataq nirqa: Manataqmi ñoqapas nisqaykichikchu ima atiywanmi kaykuna ruwasqaytapas, nispa.

⁹Chaymantam Jesusqa rikchanachiywan runakunata yachachispan nirqa: Huk runam chakranpi uvasta plantarurqa, hinaspam llamkaqkunaman arriendakuruspan unaypaq illarurqa.

¹⁰Cosecha tiempo chayaramuptinmi runanta kacharqa arriendakusqan runakunamanta tupaqninta mañamunanpaq, paykunañataqmi maqaparuspanku mana imayuqta kutirichirqaku.

¹¹Yapatawanmi huknin runanta kacharqa, ichaqa pay-tapas insultaspankum maqaparuspanku mana imayuqta kutirichirqaku.

¹²Kaqllamantam huk runantañataq kacharqa, ichaqa paytapas maqaparuspankum chakramanta wischururqaku.

¹³Chakrayuqñataqmi nirqa: “¿Imatataq ruwasaq? Kuyasqay churiytañayá kachasaq, paytaqa yaqaraqmi respetanqaku”, nispa.

¹⁴Ichaqa chay llamkaqkunam payta rikuruspanku ninakurqaku: “Paymi herencia chaskiqqa, chaynaqa wañurachisunchik chakran ñoqanchikpaqña kananpaq”, nispanku.

¹⁵Hinaspankum chakramanta hawaman hurqoruspanku wañurachirqaku. Chaynaqa, ¿imatataq paykunata chakrayuq ruwanqa?

¹⁶Payqa rispanmi llamkaqkunata wañurachinqa, hinaspam chakranta hukkunamanña arriendakunqa, nispa. Jesuspa chayna nisqanta uyariruspankum nirqaku: Amayá Diospas chaytaqa munachunchu, nispanku.

¹⁷Jesusmi ichaqa paykunata qawarispan nirqa: Chaynaqa, ¿ima ninantataq Qellqa nichkan: “Perqaqkunapa wischupakusqanku rumim cimientopa esquinan hapiq rumiña rikurirun”, nispaqa?

¹⁸Pipas chay rumiman wichiqqa paki-pasqam kanqa, pipas rumipa hapisqanñataqmi ñutusqa kanqa, nispa.

¹⁹Diospa leynin yachachiqkunawan sacerdotekunapa kamachiqninkunaña-taqmi, Jesuspa rikchanachiy rimas-qanqa paykunapa contranpi kasqan-ta musyakururqaku, hinaspam chay ratollapi presocharuyta munarqaku, ichaqa runakunata manchakuspankum mana atirqakuchu.

²⁰Chaymi wateqaqkunata kacharqaku, allin runapaq tukuspanku imaynata ruwas-papas pantarachimunankupaq, chay-napi chayman sumlla acusaspa gober-nadorman entregaykunankupaq.

²¹Pay-kunam Jesusta nirqaku: Yachachikuq, yachanikum yachachisqaykikunawan rimasqaykiqa mana pantayniyuq kasqanta, qamqa mana pimanpas sayapakuspam, Diospa ñanninmanta cheqap kaqta yachachinki.

²²Niykuwaykuyá: ¿Allinchu rey Cesarman impuesto pagayninchik icha manachu? nispanku.

²³Jesusñataqmi imawanpas panta-chinankurayku tapusqankuta musya-ruspan nirqa:

²⁴Qollqeta qawachiwaychik. ¿Pipa uyanwan pipa sutintaq kay qollqepi kachkan? nispa. Hinaptinmi paykunañataq nirqaku: Cesarpam, nispanku.

²⁵Chaymi Jesusñataq nirqa: Cesarpa kaqtaqa Cesarman qoychik, Diospa kaqtañataq Diosman qoychik, nispa.

²⁶Runakunapa qayllanpi mana ima rimayninpipas wichichiyta atispankum, imaynam contestasqanwan admirakuspanku upallarurqaku.

²⁷Wañuqkunapa kawsarimuyninpi mana creeq saduceokunam Jesusman asuykuspanku tapurqaku:

²⁸Yachachikuq, Moisespa qellqasqanpim nin: “Casado runa mana churiyuq kachkaspa wañuruptinqa, wawqenmi viudawan casarakunqa, chaynapi wañukuqpa miraynin kananpaq”, nispa.

²⁹Qanchis wawqekunam karqaku. Mayor kaqmi casarakuruspan mana churiyuq wañukurqa.

³⁰Chaymi viudawanqa wañukuqpa sullkanña casarakurqa, ichaqa paypas mana churiyuq kachkaspam wañukurqa.

³¹Kimsa kaq wawqenpas viudawan casarakuruspanmi mana churiyuq wañukurqa. Chaynallam qanchisnintinwan pasakurqa, llapallankum mana churiyuq kachkaspa wañukurqaku.

³²Chaymantam chay warmipas wañukurqa.

³³Chaynaqa, wañuqkuna kawsarimuptinqa, ¿mayqanpa warmintaq kanqa qanchisnintinwan casarakuchkaptinqa? nispanku.

³⁴Chaymi Jesusñataq nirqa: Kay pachapi runakunaqa casarakunkum, hinaspapas casarachinakunkum.

³⁵Hanaq pachaman yaykunankupaq kaqkunamanta kawsarimuqkunam icha-qa manaña casarakunqakuchu, nitaq-mi casarachinakunqakuchu.

³⁶Pay-kunaqa manam wañunqakuñachu, angelkuna hinañam kanqaku, kawsarimusqankuraykum Diospa churinkunaña kanqaku.

³⁷Wañuqkunapa kawsarimunanmantaqa Moisespas yachachirqam, tankar kichkapi imam pasakusqanmanta willakusqanpi. Chaypim Abrahampa, Isaacpa hinaspa Jacobpa Diosninwan Señorta sutichan.

³⁸Diosqa manam wañusqakunapa Diosninchu, aswanqa kawsaqkunapa Diosninmi, paypaqqa llapallanmi kawsanku, nispa.

³⁹Chaymi Diospa leynin yachachiq-kunamanta wakiqnin nirqaku: Yachachikuq, allintam chaytaqa rimarunki, nispanku.

⁴⁰Chayraykum manaña mastaqa tapurqakuñachu.

⁴¹Hinaptinmi Jesusñataq paykunata tapurqa: ¿Imaynanpitaq ninku, Cristoqa Davidpa churinmi nispankuqa?

⁴²Kikin Davidmi Salmos libropi nin: “Diosmi Señorniyta nirqa: Enemigoykikunata chakikipa sarupakunanman churanaykama alleqniypi tiyaykuy”, nispa.

⁴³

⁴⁴Davidpuni “Señorniy” nispa Cristota nichkaptinqa, ¿imaynataq churinqa kanman? nispa.

⁴⁵Llapa runakuna uyarichkaptinkum discipulonkunata Jesús nirqa:

⁴⁶Diospa leynin yachachiqkunamanta cuidakuychik, paykunaqa qoysu pachawan puriytam gustanku, plazakunapipas respetollawanña rimaykunatam munanku, sinagogakunapipas hinaspa convidokunapipas ñawpaqllapi tiyaytam munanku.

⁴⁷Paykunaqa viudakunapa tukuy imankunata qechuruchkaspapas, allin runa tukusparaqmi una-unaytaraq Diostapas mañakunku. Chayraykum paykunaqa wakinmantapas aswan castigasqaraq kanqaku, nispa.