Read CHUYA QELLQA La Biblia en Quechua de Ayacucho 2012 Lucas 23 Bible Online

Lucas 23 - CHUYA QELLQA La Biblia en Quechua de Ayacucho 2012 bible

Lucas 23

¹Chaymantam llapallanku hatarispanku Jesusta Pilatoman pasachirqaku.

²Hinaspankum Jesusta acusaspa nirqaku: Kay runatam tariramuniku nacionniykupi chaqwa hatarichichkaqta, hinaspanmi “ñoqam Reypas, Cristopas kani” nispan Cesarman impuesto paganaykutapas harkakuchkan, nispanku.

³Chaymi Pilato tapurqa: ¿Qamchu kachkanki judiokunapa reynin? nispa. Jesusñataqmi nirqa: Arí, qanmi nirunki, nispa.

⁴Hinaptinmi sacerdotekunapa kamachiqninkunatawan runakunata Pilato nirqa: Paypiqa manam ima huchatapas tarinichu sentencianaypaq hinaqa, nispa.

⁵Paykunañataqmi astawanraq hikutakuspanku nirqaku: Kay runaqa yachachikuyninwanmi lliw Judeapi chaqwata hatarichichkan, Galileamanta qallaykuspa kay llaqtakama, nispanku.

⁶Pilatoñataqmi chayta uyariruspan tapukurqa: ¿Galileamanta kaqchu kay runa? nispa.

⁷Chaymi Pilatoqa Herodespa munaychakusqan lawmanta kasqanta yacharuspan, Jesusta Herodesman pusachirqa. Chay punchawkunapim Herodesqa Jerusalenpi kachkarqa.

⁸Herodesmi Jesusta rikuykuspan anchallataña kusikurqa, Jesusmanta llumpayta uyarisqanraykum unayña reqsiykuyta munarqa, munarqataqmi ima milagro ruwasqantapas qawaykuyta.

⁹Herodesmi achka tapukuykunata tapurqa, Jesusmi ichaqa mana imatapas rimarirqachu.

¹⁰Chaypitaqmi sacerdotekunapa kamachiqninkunawan Diospa leynin yachachiqkunapas kachkarqaku, paykunam piñakuyninkuwanña Jesusta acusarqaku.

¹¹Herodesmi soldadon-kunapiwan Jesusta despreciarqaku, hinaspam reyta hinaraq burlakunankupaq suma-sumaq pachawan pacharachirqaku. Chaymantam Pilatoman kutirichirqa.

¹²Chay punchawkunapim Herodeswan Pilatoqa cheqninasqa kachkaspankupas allinyanakururqaku.

¹³Pilatoñataqmi sacerdotekunapa kamachiqninkunata, judiokunapa kamachiqninkunata hinaspa llapa runakunata huñuruspan

¹⁴paykunata nirqa: Kay runatam pusamuwarqankichik: “Llaqtapi runakunata umachaspam chaqwata hatarichichkan” nispaykichik. Ichaqa qayllaykichikpi tapuspaymi, acusasqaykichikman hinaqa mana ima huchantapas tarinichu.

¹⁵Manataqmi Herodespas tarimurqachu, chayraykum kutirachimun. Qawasqaykichikpi hinapas, payqa manam imatapas wañu-nanpaq hinaqa ruwarqachu.

¹⁶Azote-ruspallaymi kachaykusaq, nispa.

¹⁷[5][Sapa Pascua fiestapim huk presota kachariq].

¹⁸Ichaqa llapa runakunam lliw qaparirqaku: Jesusta wañuchispayki Barrabasta kacharipuwayku, nispanku.

¹⁹Barrabastaqa Romapa contranpi runakunata hatarirachisqanmanta hinaspa runa wañuchisqanmantam carcelman wichqarurqaku.

²⁰Pilatoñataqmi Jesusta kachaykuyta munaspan paykunata huktawan rimapayamurqa.

²¹Paykunam ichaqa aswanraq qaparispanku nirqaku: ¡Chakatay, chakatay! nispanku.

²²Hinaptinmi Pilatoñataq kaqllamanta nirqa: ¿Ima mana allintañataq payqa ruwa-rurqa? Manam paypiqa ima huchatapas wañunanpaq hinaqa tarinichu. Azoteruspallaymi kachaykusaq, nispa.

²³Paykunam ichaqa chakatananpaq mañakuspanku astawanraq qaparirqaku. Chaynata mañakuspankum aswan-aswanraq qaparirqaku.

²⁴Chaynapim Pilatoqa paykunapa mañakusqanta ruwarqa.

²⁵Hinaspam mañakusqankuman hina Romapa contranpi llapa runakunata hatarichisqanmanta hinaspa runa wañuchisqanmanta carcelpi kaq Barra-basta kachaykurqa, Jesustañataqmi munasqankuta ruwanankupaq paykunaman entregaykurqa.

²⁶Jesusta chakatanankupaq pusachkaspankum, chakramanta kutimuchkaptin Cirene llaqtayuq Simonta hapirurqaku, hinaspam cruzta hombrochispanku Jesuspa qepanta apachirqaku.

²⁷Jesuspa qepantam achkallaña runakuna rirqaku, warmikunapas paymanta qaparillawanña waqakustinmi qatirqaku.

²⁸Paykunata qawarispanmi Jesús nirqa: Jerusalén llaqtayuq warmikuna, ama-yá ñoqamantaqa waqaychikchu, waqas-paqa-waqaychik kikikichikmantawan wawaykichikkunamantayá.

²⁹Hamuch-kanmi punchawkuna: “¡Mayna kusisqam qolluqkunawan mana wachakuqkuna hinaspa mana wawa ñuñuqkunaqa!” nispa ninankupaq.

³⁰Hinaptinmi llapa runakuna orqokunata ninqaku: “Hawaykuman tuñiykamuy” nispanku; moqokunatañataqmi ninqaku: “Pakaykuwayku” nispanku.

³¹Sichum verde sachapi kaykunata ruwaspankuqa, ¿chaki sachapiqa imatachiki mana ruwanqakuchu? nispa.

³²Pusarqakutaqmi mana allin ruwaq iskay runakunatapas Jesustawan kuskata wañuchinankupaq.

³³Calaverawan sutichasqa sitioman chayaruspankum Jesusta chakatarurqaku, chay mana allinkuna ruwaq iskay runakunatapas, huknintam alleq lawninpi, huknintañataqmi ichoq lawninpi chakatarurqaku.

³⁴Jesusñataqmi nirqa: Taytáy, pampachaykuyá, manam ya-chankuchu imam ruwasqankuta, nispa. Llapa soldadokunañataqmi Jesuspa pachanta rakinakunankupaq sortearqaku.

³⁵Llapa runakunañataqmi sayaykuspanku imam pasakusqanta qawachkarqaku, judiokunapa kamachiqninkunapas paymanta asikuspankum nirqaku: Wakin runakunatam librarqa, chaynaqa Diospa akllasqan cheqap Cristo kaspanqa kikinyá librakuchun, nispanku.

³⁶Soldadokunapas burlakurqakum, hinaspam asuykuspanku vinagreta tomananpaq qorqaku,

³⁷hinaspam kaynata nirqaku: Judiokunapa reynin kaspaykiqa salvakuyá, nispanku.

³⁸Cruzpa puntanpipas, “KAYMI JUDIOKUNAPA REYNIN”, niq letrerom karqa.

³⁹Jesuswan kuska chakatasqanku suwakunamantam huknin kamispan nirqa: Sichum Cristo kaspaykiqa salvakuspaykiyá ñoqaykutapas salvawayku, nispa.

⁴⁰Chaymi huknin suwañataq chay insultaqta qaqcharqa: ¿Qampas wañunaykipaq sentenciasqa kachkaspaykichum Diosta mana manchakunki?

⁴¹Ñoqanchikqa mana allinkuna ruwasqanchikmantam kaypi ñakarichkanchik, paymi ichaqa yanqamanta ñakarichkan, nispan.

⁴²Chaynata niruspanmi Jesusta nirqa: Jesús, munaychakunaykipaq hamuspaykim yuyarillawanki, nispa.

⁴³Chaymi Jesusñataq nirqa: Cheqaptapunim niki, kunanpunim ñoqawan paraisopi kanki, nispa.

⁴⁴Yaqa chawpi punchawmanta kimsa hora tardeykuykamam kay pacha tutayarurqa.

⁴⁵Inti tutayaruptinmi templopi kaq velo iskayman llikikururqa.

⁴⁶Jesusñataqmi llapan kallpanwan qaparirqa: Taytáy, espirituytam qomuyki, nispan. Chaynata niruspanmi wañukurqa.

⁴⁷Soldadokunapa capitanninmi chaykunata qawaykuspan Diosta yupaycharqa: Cheqaptapunim kay runaqa mana huchayuq kasqa, nispan.

⁴⁸Chaypi tarikuq runakunapas imam pasakusqanta qawaykuspankum qasqonkuta takakustin kutirqaku.

⁴⁹Jesuspa reqsinakusqankunañataqmi Galilea lawmanta riq warmikunapiwan karullamanta qawachkarqaku.

⁵⁰Karqam Arimatea lawmanta kaq José sutiyuq runa, allin kaqkuna ruwaq, payqa runakunapa allinpaq hapisqanmi hinaspa cortepi autoridadmi karqa.

⁵¹Paypas Diospa munaychakuynintam suyachkarqa, manam cortepi kaqkunapa tanteasqankuwanpas nitaq imam ruwarusqankuwanpas hukllachu karqa.

⁵²Paymi Pilatopata rirqa Jesuspa cuerponta mañananpaq.

⁵³Chaymi cruzmanta uraykachispan fino sabanaswan wankuykurqa, hinas-pam qaqapi toqosqa manaraq pipapas pampakusqan sepulturaman churaykurqa.

⁵⁴Chay punchawqa karqa samana punchawpaq allichakunanku punchawmi, samana punchawqa ñam chayaykamuchkarqaña.

⁵⁵Galilea lawmanta Jesuswan riq warmikunapas sepulturantaqa rikurqakum, rikurqakutaqmi maymanmi cuerpon churasqankutapas.

⁵⁶Chaymi wasiman kutiruspanku, Jesuspa cuerponta llusimunankupaq perfumekunatawan miski asnaq pomadakunata prepararqaku. Ichaqa samana punchaw kasqanraykum samarqaku, Moisespa kamachikuyninman hina.