Read CHUYA QELLQA La Biblia en Quechua de Ayacucho 2012 Lucas 4 Bible Online

Lucas 4 - CHUYA QELLQA La Biblia en Quechua de Ayacucho 2012 bible

Lucas 4

¹Jesusmi Jordán mayumanta Chuya Espiritupa huntasqan kutimuchkarqa, hinaptinmi Chuya Espíritu purunman aparurqa.

²Chaypim tawa chunka punchaw kamurqa, hinaptinmi diabloñataq tentarqa. Jesusqa manam chay punchawkunapiqa imatapas mikurqachu, chayraykum yarqarachikurqa.

³Chaymi diabloñataq nirqa: Diospa Churin kaspaykiqa kay rumitayá kamachiy tantayarunanpaq, nispa.

⁴Hinaptinmi Jesús nirqa: Qellqasqam kachkan: “Runaqa manam tantallawanchu kawsanqa”, nispa.

⁵Chaymantam diabloqa alto orqoman pusaruspan, huk ñawi qemchiykuyllapi, kay pachapi llapallan nacionkunata qawachispan

⁶nirqa: Kay pachapi munaychakuykunatawan suma-sumaq kaynintam qosqayki. Chaykunaqa ñoqaman qosqam karqa, chayraykum pimanpas munasqayman qosaq.

⁷Kaykunam qampaq kanqa sichum qonqorakuykuspa yupaychawaptikiqa, nispa.

⁸Chaymi Jesusñataq nirqa: Qellqasqam kachkan: “Señor Dios-llaykitam yupaychankiqa, payllatataqmi servinkipas” nispa.

⁹Chaymantam Jerusalenman pusaruspan templopa hawanpi sayaykachispan nirqa: Diospa Churin kaspaykiqa kaymanta pawaykuy.

¹⁰Chuya Qellqam nin: “Diosmi angelninkunata waqaychasunaykipaq kamachimunqa,

¹¹Paykunam makinkupi chaskiykusunki rumiman mana takakunaykipaq”, nispa.

¹²Jesusñataqmi nirqa: Qellqasqam kachkan: “Señor Diosni-kitaqa amam pruebaman churankichu”, nispa.

¹³Chaymi diabloqa mañana imawanpas wichichiyta atispan huk punchawkama asurikurqa.

¹⁴Chuya Espiritupa huntaykusqanmi Jesusqa Galilea lawman kutirqa, chaymi muyuriqnin llaqtakunapipas anchallataña paymanta rimarqaku.

¹⁵Huñunakunanku sinagogakunapi yachachiptinmi llapa runakunañataq hatuncharqaku.

¹⁶Yachasqan Nazaret llaqtaman Jesús kutiruspanmi samana punchawpi costumbrenman hina sinagogaman yaykuykurqa. Qellqata leenanpaq sayariykuptinmi,

¹⁷profeta Isaiaspa libronta qoykuptinku kichaykuspan leerqa:

¹⁸“Tayta Diospa Espiritunmi ñoqapi kachkan, Tayta Diosmi sapaqchawaspan kamachiwarqa, wakchakunaman allin noticiata willakamunaypaq, llakisqa sonqoyuqkunata sanoyachimunaypaq, presokuna kacharisqa kanankupaq willamunaypaq, ñawsakunata ñawinta kichamunaypaq, ñakarichisqakunata libramunaypaq,

¹⁹Tayta Diospa kuyapayakuynin watamanta willakamunaypaq”, nispa.

²⁰Chaymantam Jesusqa librota wichqaykuspan sinagogapi yanapakuqman haywaykuspan tiyaykurqa. Llapa runakuna qawarayaptinkum

²¹paykunata nirqa: Kunanmi kay leesqay qellqa cumplikurun, nispa.

²²Jesusmanta allinta rimaspankum sumaqllaña yachachikuyninkunata uyarispanku admirasqallaña karqaku, hinaspam ninakurqaku: ¿Payqa manachum Joseypa churin? nispanku.

²³Hinaptinmi Jesusñataq nirqa: Ichapas nisqankupi hina niwankichikmanpas: “Yaw médico, kikikiraq hampikuruy, Capernaúm llaqtapi ruwasqaykita hinayá kay llaqtaykipipas ruway”, nispaykichik.

²⁴Cheqaptapunim nikichik, manam mayqan profetapas llaqtanpiqa allin chaskisqachu.

²⁵Profeta Eliaspa punchawninkunapim kimsa wata parten mana para kasqanrayku hatun muchuy karqa. Chay watakunapi Israel nacionpi achkallaña viudakuna kachkaptinpas,

²⁶manam paykunamanchu Eliasqa kachasqa karqa, aswanqa Sidón law Sarepta llaqtapi yachaq viudallamanmi.

²⁷Profeta Eliseopa tiemponpi achkallaña leprawan onqoqkuna Israel nacionpi kachkaptinpas, manam paykunachu sanoyachisqaqa karqaku, aswanqa Siria nacionmanta kaq Naamanllam, nispa.

²⁸Chayta uyariruspankum sinagogapi huñunasqa runakuna llumpayta piñakururqaku,

²⁹hinaspam hatarispanku llaqtapa hawa lawninpi qaqa patankama Jesusta aysarurqaku chaymanta tanqaykunankupaq.

³⁰Jesusmi ichaqa paykunapa chawpintakama lloqsiruspan pasakurqa.

³¹Galilea lawpi Capernaúm llaqtaman chayaruspanmi, llapa runakunaman samana punchawpi yachachirqa.

³²Chaymi atiywan rimasqanta uyarispanku llapa runakuna admirakurqaku.

³³Sinagogapim kachkarqa demoniopa huntasqa runa, paymi kallpawan qaparispan nirqa:

³⁴¡Nazaret llaqtayuq Jesús! ¿Imata-taq ñoqaykuwan munanki? ¿Tuñichiwa-naykikupaqchu hamurqanki? Ñoqaqa yachanim pim kasqaykita, qamqa Diospa Churinmi kanki, nispa.

³⁵Jesusñataqmi demoniota qaqchaspan nirqa: ¡Upallay hinaspa kay runamanta lloqsiy! nispa. Hinaptinmi demonioñataq chay runata llapa runakunapa chawpinman wikutiruspan mana imanaspalla lloqsirurqa.

³⁶Runakunañataqmi mancharikuspanku ninakurqaku: ¿Ima rimaytaq kayqa? ¡Kay runaqa atiywanmi llapa demoniokunatapas lloqsinanpaq kamachin, hinaptinmi lloqsinku! nispanku.

³⁷Chaymi Capernaumpa muyuriqnin llaqtakunapipas Jesusmanta anchallaña rimariy cheqerirqa.

³⁸Jesusmi sinagogamanta lloqsiruspan Simonpa wasinman rirqa. Simonpa suegranñataqmi llumpay calenturawan kachkarqa, chaymi Jesusta paypaq valekurqa.

³⁹Hinaptinmi Jesusñataq onqoqman asuykuspan calenturata qaqcharuptin chaypunilla tanirurqa. Chaymi Pedropa suegranqa utqayman hatarispan paykunata servirqa.

⁴⁰Inti seqaykuchkaptinmi, tukuy rikchaq onqoyniyuqkunata Jesusman pusamurqaku, hinaptinmi sapakamaman makinta churaykuspan sanoyachirqa.

⁴¹Achkaqmantam demoniokunapas qaparillawanña lloqsirqaku: ¡Qamqa Diospa Churinmi kanki! nispanku. Jesusmi ichaqa demoniokunata qaqchaspan rimanankuta mana munarqachu; demoniokunaqa yacharqakum payqa Cristo kasqanta.

⁴²Achikyaramuptinmi Jesusqa chunniqman pasakurqa, hinaptinmi runakuna maskaspanku tarirurqaku, chaymi hinapi qepananpaq harkayta munaptinku

⁴³paykunata Jesús nirqa: Diospa munaychakuyninmanta allin noticiatam wakin llaqtakunapipas willakamunay, chaypaqmi ñoqataqa kachamuwarqa, nispa.

⁴⁴Chaynatam Jesusqa sinagogakunapi willakustin purirqa.