Read CHUYA QELLQA La Biblia en Quechua de Ayacucho 2012 Lucas 6 Bible Online

Lucas 6 - CHUYA QELLQA La Biblia en Quechua de Ayacucho 2012 bible

Lucas 6

¹Jesusmi tarpusqa chakrapa chawpinta samana punchawpi richkarqa, hinaptinmi discipulonkunañataq trigopa espigankunata rachuspanku makinkupi qaqospa mikurqaku.

²Chaymi fariseokuna: ¿Imanasqataq qamkunaqa samana punchawpi mana ruwana kaqkunata ruwachkankichik? nispanku.

³Jesusñataqmi nirqa: ¿Manachum qamkuna leerqankichik Davidwan puriqmasinkuna yarqaymanta kaspanku imam ruwasqankuta?

⁴Da-vidmi Diospa wasinman yaykuruspan Diospaq sapaqchasqa tantakunata sacerdotekunapa mikunallan kachkaptinpas hurqoramuspan mikururqa, hinaspam puriqmasinkunamanpas qoykurqa.

⁵Runapa Churinqa samana punchawpapas Señorninmi, nispa.

⁶Huk kutipim, samana punchawpi sinagogaman Jesús yaykuspan yachachiyta qallaykurqa; chaypim kachkarqa alleq makin chakisqa runa.

⁷Diospa leynin yachachiqkunawan fariseokunañataqmi Jesusta qawarqaku samana punchawpi pitapas sanoyarachiptinqa chaywan acusanankupaq.

⁸Chayna piensasqankuta Jesús yachaspanmi chakisqa makiyuq runata nirqa: Hatarispayki chawpinkupi sayay, nispa. Chawpinkupi sayaykuptinmi,

⁹chaypi kaqkunata Jesús nirqa: Tapusqaykichikyá: ¿Imatataq samana punchawpi ruwachwan? ¿Allin kaq ruwaytachu icha mana allin kaq ruwaytachu? ¿Runa kawsachiytachu icha wañurachiytachu? nispa.

¹⁰Chaymantam muyuriqninpi runakunata qawarispan onqoqta kamachirqa: Makikita haywariy, nispa. Haywariykuptillanmi makin sanoyarurqa.

¹¹Paykunañataqmi llumpayta piñakuspanku Jesusta imatapas ruwarunankupaq tanteanakurqaku.

¹²Chay punchawkunapim Jesusqa orqoman qespirqa Taytanta mañakunanpaq, hinaspam chaypi tukuy tuta mañakurqa.

¹³Achikyaramuptinmi discipulonkunata qayaykuspan paykunamanta chunka iskayniyuqta akllarqa. Paykunatam apostolwan suticharqa.

¹⁴Paykunam karqa: Pedrowan sutichasqan Simón, Pedropa wawqen Andrés, Jacobo, Juan, Felipe, Bartolomé,

¹⁵Mateo, Tomás, Alfeopa churin Jacobo, Zelotewan sutichasqanku cananista Simón,

¹⁶Jacobopa wawqen Judas hinaspa Judas Iscariote, paymi Jesusta traicionarurqa.

¹⁷Jesusmi paykunawan orqomanta uraykamuspan huk pampapi sayaykurqa. Chaypim llapa discipulonkunawan achkallaña runakuna huñunakururqaku, chay runakunam Judea lawmanta, Jerusalenmanta hinaspa lamar qochapa patanpi kaq Tiro llaqtamantawan Sidón llaqtamanta hamurqaku. Hamurqakuqa Jesuspa yachachisqanta uyarinankupaq hinaspa onqoyninkumanta sanoyachisqa kanankupaqmi.

¹⁸Chaymi mana allin espiritukunapa ñakarichisqan runakunapas sanoyarqaku.

¹⁹Onqoqkunata atiyninwan sanoyachiptinmi llapa runakunañataq Jesuspa pachallantapas llapchaykuyta munarqaku.

²⁰Jesusñataqmi discipulonkunata qawarispan nirqa: Mayna kusisqam wakchakunaqa kankichik, Diospa munaychakuyninpas qamkunapaqmi.

²¹Mayna kusisqam kankichik kunan yarqaymanta kaqkunaqa, qamkunaqa saksachisqam kankichik. Mayna kusisqam kankichik kunan waqaqkunaqa, qamkunaqa asikun-kichikmi.

²²Mayna kusisqam kankichik runapa Churinrayku, cheqnisqa, qarqosqa, kamisqa hinaspa sutikichiktapas mana kaqpaq hapiptinkuqa.

²³Chaynata ruwasuptikichikqa kusikuymantayá pawaykachaychik, qamkunaqa hanaq pachapim hatun premiota chaskinkichik. Kay runakunapa ñawpaq taytankunapas chaynatam llapa profetakunata ñakarichirqaku.

²⁴¡Ay, imaynaraq kankichik llapa apukuna! Qamkunaqa ñam kusikurunkichikña.

²⁵¡Ay, imaynaraq kankichik llapa saksasqa runakuna! Qamkunapas yar-qaymantam kankichik. ¡Ay, imaynaraq kankichik kunan asikuqkuna! Qamkunapas llakimantam waqankichik.

²⁶¡Ay, imaynaraq kankichik llapallan runakunapa hatunchasqan runakuna! Kay llapa runakunapa ñawpaq taytankupas chaynatam llapa llulla profetakunata hatuncharqaku.

²⁷Haykam uyariwaqniykunatam ichaqa nikichik: Enemigoykichikkunatayá kuyaychik, cheqnisuqnikichik runakunapaqpas allin kaqtayá ruwaychik,

²⁸ñakasuqnikichiktayá bendeciychik, kamisuqnikichik runakunapaqpas Diostayá mañapuychik.

²⁹Sichum pipas huknin uyaykipi laqyasuptikiqa, huknin uyaykitawanyá qoykuy. Pipas capaykita qechusuptikiqa tunicaykitawan qoykuy.

³⁰Pipas mañakuqnikimanqa qoykuyá, sichum pipas imaykitapas qechusuptikiqa amañayá mañaychu.

³¹Chaynaqa, imaynam qamkunapaq runamasikichik ruwananta munankichik, chaynatayá qamkunapas paykunapaq ruwaychik.

³²Sichum kuyasuqllaykichikta kuyas-paqa, ¿ima allintataq ruwachkankichik? Huchasapakunapas kuyaqnintaqa kuyanmi.

³³Sichum allin ruwaqllaykichikta allinta ruwaspaqa, ¿ima allintataq ruwachkankichik? Huchasapakunapas chaytaqa ruwanmi.

³⁴Sichum pimanpas imatapas chaskinaykichikraykulla qospaqa, ¿ima allintataq ruwachkankichik? Huchasapakunapas imatapas chaskirunanraykuqa prestanmi.

³⁵Ene-migoykichiktapas kuyaspayá paykunapaq allin kaqkunata ruwaychik, imatapas mana imallapaqyá prestaychik. Chaynapim hatun premiota chaskinkichik, hinaspam hanaq pachapi Diospa churinkuna kankichik; payqa mana reqsikuqninkunatapas chaynataq huchasapakunatapas kuyapayanmi.

³⁶Qamkunapas Dios Taytanchik hina kuyapayakuqyá kaychik.

³⁷Amayá runamasikichiktaqa juzgaychikchu chaynapi mana juzgasqa kanaykichikpaq. Amayá pitapas condenaychikchu chaynapi mana condenasqa kanaykichikpaq. Runamasikichiktaqa pampachaychikyá chaynapi pampachasqa kanaykichikpaq.

³⁸Runamasikichikman qospaykichikqa, tupuman hinam llimpay-llimpayta hinaspa huntay-huntayta chaskikunkichik. Imaynam runamasikichikwan ruwasqaykichikta hinallam qamkunawanpas Dios ruwanqa, nispa.

³⁹Chaynata niruspanmi kay rikchanachiyta nirqa: ¿Yaqachu huk ñawsa ñawsamasinta pusayta atinman? ¿Manachum iskayninku uchkuman wichiykunqaku?

⁴⁰Discipuloqa manam yachachiqninmanta aswan yachayniyuqchu, chaywanpas allin yachaykunata chaskiruspanqa yachachiqnin hinam kanqa.

⁴¹¿Imanasqataq wawqekipa ñawinpi qopataraq qawanki, kikikipa ñawikipi kaspita mana qawakuchkaspaqa?

⁴²Ñawikipi kaspi kachkaptinqa, ¿imaynataq wawqekita niwaq: “Ñawikipi qopata hurqorusqayki” nispaqa? ¡Yaw, iskay uya! puntataqa ñawikipi kaspitaraq hurqokuruy, chaynapi allinta qawakuspa runamasikipa ñawinmanta qopata hurqonaykipaq.

⁴³Manam allin sachaqa mana allin rurutaqa rurunmanchu, nitaqmi mana allin sachapas allin rurutaqa rurunmanchu,

⁴⁴sachataqa reqsinchik ruruyninpim. Kichkaqa manam higostaqa rurunmanchu, nitaqmi tankar kichkamantapas uvastaqa pallachwanchu.

⁴⁵Allinkuna ruwaq runaqa allin kaqkunata sonqonpi waqaychasqanmantam allin kaqkunata hurqomun, mana allin runañataqmi mana allin kaqkunata sonqonpi waqay-chasqanmanta mana allin kaqkunata hurqomun. Runaqa imatapas sonqonpi waqaychasqantam riman.

⁴⁶“Señorlláy, Señorlláy” niwachkas-paykichikqa, ¿imanasqataq nisqaykunataqa mana ruwankichikchu?

⁴⁷Ñoqaman hamuspa nisqaykunata kasukuspa ruwayman churaq runakunataqa tupa-chiyman,

⁴⁸taqrata tarinankama uch-kuspan chaypa hawanpi wasinpa cimientonta hatarichiq runamanmi. Lloqlla chayamuspanpas chay wasitaqa allin ruwasqa kasqanraykum mana tuñichiyta atinchu.

⁴⁹Nisqayta uyarichkaspan mana ruwayman churaqtam ichaqa tupachini, allpapa hawallanpi wasinpa cimientonta hatarichiq runaman. Lloqlla chayaramuspanmi chay wasitaqa chaylla tuñirachispan purmarachirqa, nispa.