Read CHUYA QELLQA La Biblia en Quechua de Ayacucho 2012 Deuteronomio 10 Bible Online

Deuteronomio 10 - CHUYA QELLQA La Biblia en Quechua de Ayacucho 2012 bible

Deuteronomio 10

¹Chaymantam Tayta Dios niwarqa: “Iskay tabla rumikunatayá labramuy punta kaqkunaman rikchakuqta, ruwankitaqmi tablamanta Arcatapas, hinaspam ñoqapa kasqay orqoman hamunki.

²Chay ñuturusqayki tabla rumikunapi qellqasqay kamachikuykunatam yapamanta chay rumikunapiña qellqasaq, hinaptinmi Arcaman churanki”, nispa.

³Chaymi acacia tablamanta Arcata ruwarqani, labrarqanitaqmi iskay tabla rumikunatapas punta kaqkunaman rikchakuqta. Chaymantam chay iskay tabla rumikunata aparikuspay orqoman qespirqani.

⁴Hinaptinmi chay rumikunapi Tayta Dios chunkantin kamachikuyninkunata qellqarqa, imaynam puntata qellqasqanman hina chaynataq huñunakusqanchik punchawpi ratachkaq orqomanta rimamusqanman hina. Qoykamuwaptinñataqmi

⁵orqomanta uraykamuspay chay tablakunata Arca ruwasqayman churarqani, Tayta Diospa kamachiwasqanman hina. Chaypim kunankama kachkan.

⁶Beerot-bene-jaacán lawmanta lloq-sispankum Israelpa mirayninkuna Mo-sera lawkama chayarurqaku. Chaypi Aarón wañukuptinmi pamparurqaku. Hinaptinmi churin Eleazarña taytanpa rantinpi sacerdote karqa.

⁷Mosera lawmantam Gudgoda lawman rirqaku, Gudgoda lawmantañataqmi Jotbata lawman, chay allpapiqa yakukunapas kachkanmi.

⁸Chay tiempopim Leví aylluta Tayta Dios akllarqa, paykunaña pacto Arcata apanankupaq chaynataq payta servispa paypa sutinpi bendicionninta mañakunankupaq. Kunankamapas hina chaynallatam ruwachkanku.

⁹Chay-raykum Leví ayllupaqa wakin ayllukunapa hinaqa tupaqninku allpaqa mana karqachu. Kikin Tayta Diosmi paykunapa herencianqa, Señornikichik Tayta Diospa nisqanpi hina.

¹⁰Punta risqaypi hinam qepa riyniypipas orqopi tawa chunka punchaw hinaspa tawa chunka tuta kamurqani. Chaypipas Tayta Diosqa uyariykuwaspanmi manaña wañuchisurqankichikchu.

¹¹Aswanqa paymi niwarqa: “Runakunata pusanaykipaq alistakuy, chaynapi ñawpaq taytaykichikkunaman jurasqay allpaman yaykunaykichikpaq”, nispa.

¹²Israelpa mirayninkuna, ¿imatataq Señornikichik Tayta Dios qamkunamanta munan? Payqa munan kasukuspaykichik munasqanman hina kawsanaykichiktam, tukuy sonqoykichikwan chaynataq tukuy vidaykichikwan kuyaspa yupaychanaykichiktam.

¹³Payqa munan kunan kamachisqay kamachikuyninkunata hinaspa yachachikuykunata kasukunaykichiktam, chaynapi allinlla kanaykichikpaq.

¹⁴Amayá qonqaychikchu, hanaq pachapas, chaypi tukuy ima kaqkunapas, kay pachapas hinaspa chaypi tukuy ima kaqkunapas yupaychasqanchik Señornikichik Tayta Diospam.

¹⁵Chaywanpas Tayta Diosqa kuyaspam ñawpaq taytaykichikkunataqa akllarqa, chaymantam kunan qawasqaykichikpi hinapas paykunapa mirayninkunata akllasurqankichik, wakin nacionkunatam ichaqa mana akllarqachu.

¹⁶Sonqoykichikpi millakuypaq kaqkunata wischuspa chuyanchakuychik, amañayá rumi sonqoqa kaychikchu.

¹⁷Señornikichik Tayta Diosqa dioskunapapas Diosninmi, señorkunapapas Señorninmi, Payqa hatun munayniyuqmi, Tukuy Atiyniyuqmi, kasukuna Diosmi. Manam pimanpas sayapakunchu nitaqmi sobornotapas chaskikunchu,

¹⁸mana tayta-mamayuqkunapaqpas chaynataq viudakunapaqpas allin arreglotam ruwaykapun, huklaw llaqtayuqkunatapas kuyaspanmi mikuykachin hinaspa pachaykachin.

¹⁹Chaynaqa, qamkunapas huklaw llaqtayuqkunatam kuyankichik, qamkunapas mana llaqtayuqmi Egipto nacionpi karqankichik.

²⁰Señornikichik Tayta Diosta kasukuspa payllata yupaychaychik, payllata qatiychik, paypa sutillanpi juraychik.

²¹Qamkunaqa payllatam yupaychankichik, Diosnikichikqa qamkunaraykum hatun manchakuypaq kaqkunata ruwarqa, qawachkaptikichikmi chaykunataqa ruwarqa.

²²Ñawpaq taytaykichikkunaqa qanchis chunka runakunallam Egipto nacionman yaykurqaku, ichaqa Señornikichik Tayta Diosmi yaqa cielopi chaskakunata hinaña mirarachisunkichik.