Read CHUYA QELLQA La Biblia en Quechua de Ayacucho 2012 Deuteronomio 14 Bible Online

Deuteronomio 14 - CHUYA QELLQA La Biblia en Quechua de Ayacucho 2012 bible

Deuteronomio 14

¹Qamkunaqa Señornikichik Tay-ta Diospa churinkunam kankichik. Pipas wañuruptinqa amam cuerpoykichiktaqa kuchukunkichikchu nitaqmi umaykichiktapas kachiy-kachiytaqa rutukunkichikchu.

²Qamkunaqa Señornikichik Tayta Diospa chuya llaqtanmi kankichik. Kay pachapi llaqtakunamantam payllapaqña kanaykichikpaq akllasurqankichik.

³Millakuypaq animalkunataqa amam mikunkichikchu.

⁴Mikunaykichikpaq animalkunaqa kaykunam: Torokuna, ovejakuna, cabrakuna,

⁵tarukakuna, luwichukuna, monte cabrakuna, monte ovejakuna, corzo sutiyuq animalkuna chaynataq tukuy rikchaq antílope sutiyuq animalkunapas.

⁶Mikunkichiktaqmi pallqa situyuq hinaspa kutipaq animalkunatapas.

⁷Ichaqa amam mikunkichikchu camellota, liebreta nitaq vizcachatapas, chay animalkunaqa kutipaq kaspapas manam pallqa situyuqchu.

⁸Amataqmi mikunkichikchu kuchitapas, pallqa situyuq kaspapas manam kutipanchu, chaytaqa millakuypaqmi hapinkichik. Chay animalkunapa aychantaqa amam mikunkichikchu, nitaqmi wañuruptinpas llapchankichikchu.

⁹Yakupi kaq animalkunamantam mikunkichik llika raprayuq hinaspa escamayuq challwakunata,

¹⁰mana raprayuq otaq mana escamayuq kaptinqa amam mikunkichikchu, chayna animalkunataqa millakuypaqmi hapinkichik.

¹¹Raprayuq limpio animalkunataqa mikuwaqchikmi.

¹²Kay animalkunatam ichaqa raprayuq kaptinpas millakuypaq kasqanrayku ama mikunkichikchu: Ankakunata, aqchikunata, tukuy rikchaq wamankunata, cuervo-kunata, avestruzkunata, chuseqkuna-ta, qewllakunata, tukukunata, cormorankunata, ibiskunata, cisnekunata, pelicanokunata, ullachkukunata, cigüeñakunata, tukuy rikchaq garzakunata, condorkunata, abubillakunata hinaspa masukunatapas.

¹⁹Raprayuq llapa urukunataqa millakuypaqmi hapinkichik, chaykunataqa amam mikunkichikchu.

²⁰Raprayuq mikuna animalkunatam mikunkichik.

²¹Kikillanmanta wañuruq animaltaqa amapunim mikunkichikchu. Chayku-nataqa llaqtaykichikpi yachaq huklaw llaqtayuqkunamanmi mikunanpaq qoy-kunkichik, manachayñataqmi puriqku-naman rantikurunkichik. Señornikichik Tayta Diospaq sapaqchasqa runankunañam qamkunaqa kankichik. Cabra uñataqa amam mamanpa lechenpiqa yanunkichikchu.

²²Cosechaykichikmantam watan-watan mana tipiyta diezmota hurqonkichik:

²³Trigomanta, vinomanta hinaspa aceitemanta rakisqaykichik diezmotawan, vacaykichikmanta hinaspa ovejaykichikmanta hurqosqaykichik punta uñankunatam Señornikichik Tayta Diospa qayllanpi mikunkichik, mikunkichikqa sutin reqsisqa kananpaq akllakusqan sitiopim, chaynapi pay kasukuyta yachanaykichikpaq.

²⁴Sichum Señornikichik Tayta Dios bendecisuptikichik diezmo rakisqaykichikta apanaykichikpaq Señornikichik Tayta Diospa akllasqan sitio, yachasqaykichikmanta karupi kaptinqa,

²⁵rantikuruspaykichikmi qollqenpiña apankichik,

²⁶hinaspam chay sitiopiña tanteasqaykichikman hina torokunata, ovejakunata, vinota, poqosqa aqata otaq ima mikunaykichiktapas rantispa Señornikichik Tayta Diospa qayllanpi mikunkichik, hinaspam aylluykichikkunawan kuska fiestata ruwankichik.

²⁷Llaqtaykichikpi yachaq levitakuna-taqa amam qonqarunkichikchu. Payku-naqa manam allpata qamkuna hinaqa chaskinqakuchu.

²⁸Sapa kimsa watamantam cosechaykichikmanta diezmoykichikta hurqonkichik, hinaspam llaqtaykichikpi waqaychankichik.

²⁹Chaynapim llaqtaykichikpi yachaq mana allpayuq levitakuna saksanankukama mikunqaku, mikunqakutaqmi qamkunawan yachaq huklaw llaqtayuqkunapas, mana tayta-mamayuqkunapas chaynataq viudakunapas. Hinaptinqa Señornikichik Tayta Diosmi tukuy ruwasqaykichikpi bendecisunkichik.