Read CHUYA QELLQA La Biblia en Quechua de Ayacucho 2012 Deuteronomio 15 Bible Online

Deuteronomio 15 - CHUYA QELLQA La Biblia en Quechua de Ayacucho 2012 bible

Deuteronomio 15

¹Sapa qanchis watam debesuqnikichikta pampachankichik.

²Debekuqkunawanqa kaynatam ruwankichik: Runamasikichikman imatapas prestaykuspaqa pampachaykuspam amaña mañankichikñachu. Israelpa mirayninkuna kaptinpas otaq aylluykichik kaptinpas amañam mañankichikñachu. Chay watapim Tayta Diospa sutinpi kaynata willakunkichik: “Kunan wataqa debekuqkunata pampachana watam”, nispaykichik.

³Huklaw llaqtayuq kaptinmi ichaqa prestasqaykichiktaqa mañawaqchik. Castaykichikmantam ichaqa amaña mañankichikchu.

⁴Chaynapim qamkuna ukupiqa wakchakunapas mana kanqachu, aswanqa Señornikichik Tayta Diosmi qosusqaykichik allpapi bendecisunkichik,

⁵bendecisunkichikqa Señornikichik Tayta Diosta uyarispa, kunan kamachisqankunata kasukuspaykichik ruwayman churaptikichikmi.

⁶Arí, Señornikichik Tayta Diosqa nisusqaykichikman hinam bendecisunkichik, chaymi achka nacionkunaman prestankichik. Qamkunam ichaqa mana paykunamanta prestakunkichikchu. Achka nacionkunapim munaychakunkichik. Qamkunapim ichaqa pipas mana munaychakunqakuchu.

⁷Sichum Señornikichik Tayta Diospa qosunaykichik allpapi, hukkaqnin yachasqaykichik llaqtapi qamkuna castamanta wakcha runa kanqa, hinaptinqa sonqoykichikta ama rumiyaykachispam yanapaykunkichik.

⁸Llaki-payaspaykichikmi nisqanman hina prestaykunkichik.

⁹Yanqañataq sonqoykichikpi mana allinkunata tanteawaq-chik hinaspa “debekuqkunata pam-pachana qanchis kaq watam hich-pamuchkanña” nispaykichik castamasikichikmanta wakchakunata mana allin ñawikichikwan qawaspa imallawanpas mana yanapaykuwaqchikchu; chayna kaptinqa contraykichikpi Tayta Diosta mañakuptinmi chay ruwasqaykichikwan huchallikuwaqchik.

¹⁰Amam maqllaqa kankichikchu, chayllam yanapaykunkichik. Chaynata ruwaptikichikqa Señor-nikichik Tayta Diosmi astawan tukuy ruwasqaykichikpi bendecisunkichik.

¹¹Kay pachapiqa manam wakchakunaqa faltanqachu. Chayraykum ñoqa kamachikichik, castamasikichikmanta wakchayaspa yarqaymanta kaqkunawan llakipayakuq kanaykichikpaq.

¹²Hebreomanta kaq llaqtamasikichik qaripas otaq warmipas criadoykichik kananpaq kikinta rantikurususpay-kichikqa, soqta watallam servisunki-chik. Qanchis kaq watamanmi ichaqa libre lloqsikunqa.

¹³Libreta kachay-kuspaykichikpas amataqmi mana imayuqtaqa kachaykunkichikchu.

¹⁴Aswanqa animalnikichikmantam, cosechaykichikmantam chaynataq vinoykichikmantam qoykunkichik. Señornikichik Tayta Diospa tukuy qosusqaykichiktam rakiykunkichik.

¹⁵Egipto nacionpi esclavo kasqaykichik-manta Señornikichik Tayta Dios hurqomususqaykichiktam yuyarinkichik. Chayraykum chaynata kunan kamachikichik.

¹⁶Sichum chay criadoykichik qamtapas chaynataq aylluykitapas kuyasqanrayku qamkunawan yachakakuruspa mana lloqsiyta munaptinqa,

¹⁷punkuykiman asuykachispam alesnawan rinrinta uchkurunki, hinaptinmi wañukunan punchawkamaña servisunki. Chaynallatam criadaykichikwanpas ruwankichik.

¹⁸Criado-ykichikta libre kachaykuytaqa amam llakikunkichikchu. Llamkapakuqpa parte pagollanpaqmi payqa soqta watantin servisurqankichik. Chaynapim Señornikichik Tayta Diospas tukuy ruwasqaykichikpi bendecisunkichik.

¹⁹Vacaykikunapa ovejaykikunapa punta kaq orqo uñantam Señornikichik Tayta Diospaq sapaqchanki. Vacaykikunapa punta wawan torochataqa amam llamkachinkichu, nitaqmi ovejaykikunapa punta wawan carnerochapa millwantapas rutunkichu.

²⁰Señornikichik Tayta Diospa qayllanpim chay animalkunata sapa wata, aylluykikunawan kuska paypa akllasqan sitiopi mikunkichik.

²¹Sichum chay sapaqchasqayki animal, ñawsapas, weqrupas otaq imaynapas kaptinqa, amam Señornikichik Tayta Diosmanqa ofrecenkichu.

²²Aswanqa maymi yachasqayki llaqtapim chayna animaltaqa mikunki, chuya kaspa mana chuya kaspapas; tarukapa otaq luwichupa aychanta hinam mikunki.

²³Chay animalkunapa yawarnintam ichaqa ama mikunkichu, yakuta hinam pampaman tallirunki.