Read CHUYA QELLQA La Biblia en Quechua de Ayacucho 2012 Deuteronomio 17 Bible Online

Deuteronomio 17 - CHUYA QELLQA La Biblia en Quechua de Ayacucho 2012 bible

Deuteronomio 17

¹Señornikichik Tayta Diosman ofrecespaqa sano torotawan sano ovejatam ofrecenkichik, mana chayna kaspanqa Señornikichik Tayta Diospa millakusqanmi.

²Sichum Señornikichik Tayta Diospa qosusqaykichik hukkaqnin llaqtapi tariruwaqchik qaritapas otaq warmitapas Señornikichik Tayta Diospa mana munasqanta ruwachkaqta, pactontapas qepanchachkaqta,

³chaynataq idolokunata yupaychaspa ñawpaqninpi qonqorachkaqta; intita, killata, chaskakunata yupaychachkaqta, chaykuna ruwaytaqa manam Tayta Diosqa kamachikurqachu.

⁴Sichum chaykunata yacharuspaykichikqa allintam qatipaykunkichik. Israel nacionpi chay millakuypaq ruwasqanku cheqap kaptinqa,

⁵chay ruwaqtam qari kaptin otaq warmi kaptinpas llaqtapa punkunpi kamachikuqkunaman pusaspaykichik rumiwan choqapaspa wañuchinkichik.

⁶Iskay otaq kimsa testigokunapa declarakusqanwanmi wañunanpaq sentenciasqa kanqa. Chullalla testigopa declarakusqanwanqa manam pipas wañunqachu.

⁷Chay testigokunam wañuchinankupaq rumiwan chamqayta qallarinqaku. Chaymantañam llapallan runakunapas chamqapanqaku. Chaynatam qamkunamanta tukuy mana allin ruwaqkunata chinkachinkichik.

⁸Sichum llaqtaykichikpi kanqa wañuchinakuymanta, quejanakuymanta, maqanakuymanta otaq imamantapas sasa arreglana kaqkuna, hinaptinqa Señornikichik Tayta Diospa akllasqan sitiomanmi rinkichik.

⁹Chaypim Leví ayllu sacerdotekunaman chaynataq chay tiempopi juezkunaman sasachakuynikichikta willakunkichik, hinaptinmi paykunaña nisunkichik imaynam arreglanaykichiktapas.

¹⁰Tayta Diospa akllasqan sitiopi kamachikuqkunapa nisusqaykichikman hinallam ruwankichik.

¹¹Chay kamachikuqkunapa sentenciasqanman hinallam qamkunaqa ruwankichik. Amam imayniraqllatapas paykunapa nisqantaqa qewinkichikchu.

¹²Señornikichik Tayta Diospa qayllanpi servikuq sacerdoteta otaq juezta mana kasukuq runataqa wañuchinkichikmi. Chaynata ruwaspaykichikmi Israelpa mirayninkunamanta tukuy mana allin ruwaqkunata chinkachinkichik.

¹³Chayta yachaspankum llapallan runakuna manchakunqaku, chaynapim manaña hatun tukunqakuñachu.

¹⁴Señornikichik Tayta Diospa qosunaykichik allpaman yaykuruspa, chay allpapiña yachaspañataq niwaqchik: “Muyuriqniykupi llapallan nacionkuna hinam ñoqaykupas kamachiwanankupaq reyniyuq kayta munaniku”, nispaykichik.

¹⁵Hinaptinqa Señornikichik Tayta Diospa akllasqallantam reynikichikpaqqa churankichik, qamkunapa castamasikichikmi payqa kanqa. Amam churankichikchu huklaw llaqtayuqtaqa nitaq mana castaykichikmanta kaqtapas.

¹⁶Chay reyqa amam achka caballokunataqa huñukunqachu, amataqmi runakunatapas caballokuna rantiqqa Egipto nacionman kachanqachu. Tayta Diosmi nisurqankichik: “Egipto nacionmanqa amam haykapipas kutinkichikchu”, nispa.

¹⁷Amataqmi achka warmiwanpas casarakunqachu, chaynapi Tayta Diosmanta ama karunchakurunanpaq. Qoritapas qollqetapas amataqmi huñukunqachu.

¹⁸Kamachikuyta qallaykuspanqa, Leví ayllu sacerdotekunapa hatallisqan libromantam kay yachachikuykunata kikinpaq qellqachinqa.

¹⁹Hinaspam kawsanankama hatallispa sapa punchaw leenqa, chaynapi Señornikichik Tayta Diosta manchakuspa yachachikuyninkunata hinaspa kamachikuyninkunata ruwayman churananpaq,

²⁰chaynapim llaqtamasinkunapaqpas mana hatun tukunqachu, nitaqmi kamachikuykunamantapas karunchakunqachu. Chaynata ruwaspanqa paypas chaynataq mirayninkunapas unay watam Israel nacionpi munaychakunqaku.