Read CHUYA QELLQA La Biblia en Quechua de Ayacucho 2012 Deuteronomio 22 Bible Online

Deuteronomio 22 - CHUYA QELLQA La Biblia en Quechua de Ayacucho 2012 bible

Deuteronomio 22

¹Sichum llaqtamasikipa chinkasqa toronta otaq ovejanta tariruspaqa amam upallakuykunkichu, aswanqa llaqtamasikimanmi pusarapunki.

²Sichum chay animal mana vecinoykipa kaptinqa, nitaq pipa kasqantapas yachawaqchu, hinaptinqa dueñon maskamunankamam wasikiman pusaspa uywanki; chaymantam qoykapunki.

³Chaynatam ruwankichik runamasikichikpa chinkaruq asnonwanpas, wischurusqan pachanwanpas; llaqtamasikichikpa imantapas tarikuspaqa amam upallakuykunkichikchu.

⁴Sichum llaqtamasikipa asnonta otaq toronta ñanpi kumpakuruqta rikuspaqa, amam qawayllaqa-qawakunkichikchu aswanqa hatarichiypim yanapaykunkichik.

⁵Warmiqa amam qaripa pachanwanqa pachakunqachu, nitaqmi qaripas warmipa pachanwanqa pachakunqachu. Pipas chayna ruwaqqa Tayta Diospa millakusqanmi.

⁶Sichum purichkaspayki sachapipas otaq pampapipas tariruwaq qesanpi mallqochata otaq runtuta oqllachkaq urpichata hinaspaqa amam mamantawan mallqochankunataqa apakunkichu.

⁷Mallqochankunallata apakuspam mamantaqa kachaykunki. Chaynata ruwaspaqa kusikuspam unayta kawsakunki.

⁸Musoq wasita ruwakuspaykiqa qatanpa muyuriqninpim perqanta ruwanki. Mana chayqa pipas wichiykamuspa wañuruptinmi wasipi kaqkuna huchayuq kawaqchik.

⁹Uvas chakrapiqa amam huk rikchaq muhutaqa tarpunkichu, chaynata ruwaspaqa lliwtam Tayta Diosman qonki.

¹⁰Asnotawan torota tinkispaqa amam yapunkichu.

¹¹Linotawan millwata chaqruykuspa awasqa pachawanqa amam churakunkichu.

¹²Capaykipa tawan puntankunamanmi watuyuq kipukunata siranki.

¹³Sichum pipas warmita casararuspa, paywan puñuruspanñataq manaña kuyanmanchu,

¹⁴hinaspa warmita penqayman churayta munaspan kaynata ninman: “Kay warmitam casararqani, ichaqa paywan puñuptiymi qari reqsiqña kasqa”, nispa.

¹⁵Chayna kaptinqa chay sipaspa tayta-mamanmi, manaraq qari reqsiq kasqanta qawachinanpaq, churinpa chayllaraq casarakuykuspan puñusqan pachata llaqtapi ancianokunaman apanqa.

¹⁶Sipaspa taytanmi ancianokunaman kaynata ninqa: Ñoqam churiyta kay runawan casarachirqani, ichaqa kunanmi churiyta cheqnipakurun.

¹⁷Penqayman churayta munaspanmi nichkan: “Churikiqa qari reqsiqñam kasqa”, nispa. Kunanmi churiyqa manaraq qari reqsiq kasqanta qawankichik; chaynata nispanmi, churin casarakuykuspa llampuchakusqan pachata llaqtapi ancianokunaman qawachinqa.

¹⁸Hinaptinmi ancianokuna chay qarita presocharuspa azotenqaku.

¹⁹Sipaspa taytanmanñataqmi huk kilo qollqeta pagachinqaku, chaynataqa multanqaku Israelpa mirayninkuna ukupi manaraq qari reqsiq sipasta yanqa penqayman churasqanmantam. Chay casarasqan warmiqa kawsanankamam warmin kanqa, manam rakikuyta atinmanchu.

²⁰Sichum cheqaptapuni chay sipas qari reqsiqña kaptinmi ichaqa

²¹taytanpa wasinmanta hurqoruspanku llaqtapi runakuna rumiwan chamqapaspa wañuchinqaku, Israelpa mirayninkuna ukupi chaynataq taytanpa wasinpi chuchumika hina millakuypaqta ruwasqanmanta. Chaynatam qamkunamanta chay mana allin ruwayta chinkachinkichik.

²²Sichum pitapas casada warmiwan huchapakuchkaqta tariruspaykichikqa iskaynintam wañuchinkichik. Chaynata ruwaspam qamkunamanta mana allin ruwayta chinkachinkichik.

²³Sichum manaraq qari reqsiq sipas casarakunanpaq rimapayasqaña kachkaptin, huk qariñataq llaqtapi tariruspan chay sipaswan puñuruptinqa,

²⁴iskaynintam llaqtapi ancianokunaman pusankichik, hinaspam rumiwan chamqapaspa wañuchinkichik. Sipasqa wañunqa llaqtapi kachkaspan mana qaparisqanraykum. Qariñataqmi wañunqa runamasinpa casaranan warmita penqayman churasqanrayku. Chaynata ruwaspam qamkunamanta mana allin ruwaqkunata chinkachinkichik.

²⁵Sichum casarakunanpaq rimapayasqa sipasta, pipas campopi tariruspan abusaruptinqa, qarillam chay ruwasqan-manta wañunqa,

²⁶sipastaqa amam imanankichikchu, payqa manam huchayuqchu. Chayqa pipas runamasinta qonqaymanta wañurachiq runamanmi rikchakun.

²⁷Chay runaqa sipasta campopi sapallanta tariruspanmi abusarurqa. Sipas qayaykachakuptinpas manam pipas libraqnin karqachu.

²⁸Sichum casarakunanpaq manaraq rimapayasqa sipasta abusachkaqta pitapas tariruptinkuqa,

²⁹chay abusaqmi sipaspa taytanman parte kilo qollqeta qonqa. Abusasqanraykum chay sipaswan casarakunqa. Chay runaqa kawsanankamam chay warmimanta mana rakikunqachu.

³⁰Taytanpa warmillanwanqa amam pipas kakunqachu. Chaynata ruwaspaqa taytantam penqayman churachkan.