Read CHUYA QELLQA La Biblia en Quechua de Ayacucho 2012 Deuteronomio 23 Bible Online

Deuteronomio 23 - CHUYA QELLQA La Biblia en Quechua de Ayacucho 2012 bible

Deuteronomio 23

¹Tayta Diospa qayllanpi huñunakuymanqa amam yaykunqachu runtun capasqapas nitaq qari kaynin kuchusqapas.

²Tayta Diospa qayllanpi huñunakuymanqa amam pipapas churyapakuyninqa yaykunqachu, chunka mirayninkamapas amam yaykunqachu.

³Tayta Diospa qayllanpi huñunakuymanqa amam amonitakunawan moabitakunaqa yaykunqachu, chunka mirayninkamapas amam yaykunqachu.

⁴Paykunaqa Egipto nacionmanta lloqsimuspa allpanku waqtanta pasamuptikichikpas manam yakullankuwanpas nitaq mikuyllankuwanpas taripamusurqankichikchu. Aswanraqmi Mesopotamia law Petor llaqtamanta hamuq Beorpa churin Balaamman ñakasunaykichikpaq pagarqaku.

⁵Icha-qa Señornikichik Tayta Diosmi Balaam-ta mana uyarirqachu, aswanqa Ba-laampa ñakasunaykichiktam bendi-cionmanña tikrarurqa.

⁶Chaynaqa, ama-punim haykapipas munankichikchu paykunapa hawkalla kayninkutawan allinlla kawsakuyninkutapas.

⁷Edomitakunatam ichaqa ama cheqninkichikchu, paykunaqa castaykichikmi. Egipto runakunatapas amataqmi cheqninkichikchu, paykunapa allpanpim qamkuna yacharqankichik.

⁸Paykunapa willkankupa churinkunam ichaqa Tayta Diospa qayllanpi huñunakuyman yay-kunqaku.

⁹Enemigoykichikwan peleaq lloqsispaqa, amam millakuypaq kaqkunataqa ruwankichikchu.

¹⁰Sichum tuta puñunankama qari kayninmanta muhun kikillanmanta lloqsiruptinqa, chay runaqa millakuypaqmi kanqa, payqa campamentomanta lloqsispam tukuy punchaw hawapi kamunqa.

¹¹Hinaspam manaraq inti seqaykuyta mayllakuspan tutaykuqta campamentoman kutiykunqa.

¹²Ispakunaykichikpas campamentomanta hawapim kanqa.

¹³Sapakamam estacaykichikta apankichik, chaywan allpata toqospam hatun ispayta ispakuruspa allpawan pampankichik.

¹⁴Señornikichik Tayta Diosmi campamentoykichikpi purichkan, waqaychasuspaykichik enemigoykichikta vencechisunaykichikpaq, chayraykum campamentoykichikqa chuyanchasqa kanan, mana chayqa Diosmi qamkuna ukupi ima qachatapas rikuspan qamkunamanta asurikunman.

¹⁵Patronninmanta ayqekamuspan amparakamusuqniki esclavotaqa amam patronninmanqa kutichinkichu.

¹⁶Qamkunawanmi llaqtaykichikpi akllakusqan sitiopi yachanqa. Amam pipas paytaqa ñakarichinqachu.

¹⁷Israel castakunamantaqa amam warmi churikichikpas idolokunata yupaychananpaqqa chuchumikaqa kanqachu, nitaqmi qari churikichikpas qaripura qachakuspaqa idolokunata yupaychanqachu.

¹⁸Chayna millakuypaq ruwasqanwan ganakamusqanmanta Tayta Diospa templonman apamunankutaqa amam munankichikchu. Chayqa Señornikichik Tayta Diospa qayllanpiqa hatun millakuypaqmi.

¹⁹Qollqetapas, kawsaykunatapas otaq imatapas aylluykiman prestaspaqa, amam mirayninta mañankichu.

²⁰Huklaw llaq-tayuqkunamantam ichaqa mañawaq. Aylluykimantaqa amam mañankichu. Hinaptinqa yaykunaykichik allpapim tukuy ima ruwasqaykipi Tayta Dios bendecisunkichik.

²¹Señornikichik Tayta Diosman prometespaqa utqayllamanmi cumplinki. Mana chayqa pay cuentata mañaykusuptikim huchayuq kawaq.

²²Mana imatapas prometekuspaqa manam huchallikunkichu.

²³Kikikimanta Tayta Diosman prometekuspaqa qonkipunim.

²⁴Runamasikipa uvas huertanman yaykuspaqa saksanaykikamallam mikunki, amam canastaykimanqa pallankichu.

²⁵Runamasikipa trigo cosechanman yaykuspaqa makillawanmi pallapakunki, amam rutunawanqa rutunkichu.