Read CHUYA QELLQA La Biblia en Quechua de Ayacucho 2012 Deuteronomio 34 Bible Online

Deuteronomio 34 - CHUYA QELLQA La Biblia en Quechua de Ayacucho 2012 bible

Deuteronomio 34

¹Moisesmi Moab lawpi Nebo orqoman rirqa, hinaspam Pisga orqopa puntanman qespirqa, chay orqokunaqa Jericó llaqtapa chimpanpim kachkan. Chaymantam Tayta Dios qawachirqa Galaad lawpi allpamanta qallaykuspa Danpa,

²Neftaliypa, Efrainpa, Manasespa chaynataq Judapa allpankunatapas Mediterráneo lamar qochakama.

³Qawachirqataqmi Neguev lawtapas, Jordán mayupa qechwantawan palmera sachakunapa kasqan Jericó llaqta lawpi pampatapas, Zoar llaqtakama.

⁴Hinaspam Moisesta Tayta Dios nirqa: Kay allpatam Abrahamman, Isaacman hinaspa Jacobman jurarqani, chaynapi paykunapa mirayninkunaman qonaypaq. Qawaykunaykitam munarqani, ichaqa manam yaykunkichu, nispa.

⁵Chaymi Tayta Diospa serviqnin Moisés, Moab allpapi wañukurqa Tayta Diospa nisqanpi hina.

⁶Moab runakunapa allpanpim, Bet-peor llaqtapa chimpan qechwapi Tayta Dios pamparurqa. Chay sepulturataqa manam pipas kunan punchawkama reqsinchu.

⁷Moisesqa pachak iskay chunka watanpim wañukurqa, wañukusqan punchawkamam ñawinkunapas allintaraq qawakurqa, kallpanpas manam pisirqachu.

⁸Hinaptinmi Israelpa mirayninkuna kimsa chunka punchaw Moab law pampapi waqarqaku. Chaynapim cumplikurqa Moisesmanta lutokuspa waqasqanku punchawkuna.

⁹Nunpa churin Josueymi yachayniyuq kananpaq Diosmanta atiyta chaskirqa, chaypaqmi paypa hawanman kawsachkaspallaraq makinta Moisés churaykurqa. Chaymi Israelpa mirayninkuna Josueyta kasukurqaku, hinaspam Moisesman Tayta Diospa kamachisqanman hina ruwarqaku.

¹⁰Israelpa mirayninkunapiqa manañam haykapipas Diospa profetan Moisés hinaqa karqachu. Paywanqa Tayta Diospas uyapuram rimarqa.

¹¹Manataqmi Moisés hinaqa pipas Diospa atiyninta qawachispa, Egiptopi rey Faraonpa, serviqninkunapa chaynataq lliw runankunapa contranpi admirakuypaq milagrokunata ruwaq runaqa karqachu.

¹²Atiyniyuq kayninpipas, hatun kaqkunatawan manchakuypaq kaqkunata ruwasqanpipas manataqmi pay hinaqa pipas karqachu. Chaykunatam Israelpa mirayninkunapa qawasqanta Moisés ruwarqa.