Read CHUYA QELLQA La Biblia en Quechua de Ayacucho 2012 Deuteronomio 4 Bible Online

Deuteronomio 4 - CHUYA QELLQA La Biblia en Quechua de Ayacucho 2012 bible

Deuteronomio 4

¹Israelpa mirayninkuna, kay yachachisqay kamachikuykunatawan yachachikuykunatayá kasukuychik. Kasukuspaykichikqa manam wañun-kichikchu, hinaspam ñawpaq taytaykichikkunapa yupaychasqan Tayta Diospa qosunaykichik allpaman yaykunkichik.

²Kay kamachikuykunamanqa amam imatapas yapankichikchu nitaqmi qechunkichikpaschu. Señornikichik Tayta Diospa kamachikuyninkunatam kasukunkichik, chaykunataqa ñoqam kamachikichik.

³Qawarqankichikmi Baal-peorpi Tayta Diospa imam ruwasqanta. Chaypim idolokuna yupaychaq runakunata qamkuna ukumanta Señornikichik Tayta Dios chinkachirqa.

⁴Señornikichik Tayta Diosman hapipakuqkunam ichaqa kawsachkankichikraq.

⁵Señorninchik Tayta Diospa kama-chikuyninkunatawan yachachikuyninku-natam yachachirqaykichik, chaynapi yachanaykichik allpaman yaykuspa kasukunaykichikpaq.

⁶Kasukuspa ruwaptikichikqa wakin nacionpi runakunam reqsisunkichik qamkunaqa allin yachayniyuq hinaspa allin yuyayniyuq runakuna kasqaykichikta. Paykunapas kay kamachikuykunata yachaspankum ninqaku: “¡Cheqaptapunipas allin yachayniyuq hinaspa allin yuyayniyuq hatun nacionmi kay nacionqa!” nispanku.

⁷¿Mayqan hatun nacionpa diosninkunataq hichpallanpi kachkan, ñoqanchik sapa kutilla qayakuptinchik uyariwaqninchik Señorninchik Tayta Dios hinaqa?

⁸¿May-qan hatun nacionpa kamachikuyninwan yachachikuynintaq kanman qamkunaman kunan yachachisqay kamachikuykunawan yachachikuykuna hinaqa?

⁹Amam ima rikumusqaykichikman-tapas qonqarunkichikchu, kawsanaykichikkamaqa amam sonqoykichikmantapas chinkarachinkichikchu, chay-kunataqa churikichikkunamanpas willkaykichikkunamanpas yachachinkichikmi.

¹⁰Horeb orqopi, Señornikichik Tayta Diospa qayllanpi kasqaykichik punchawpim Tayta Dios niwarqa: “Kay nisqaykunata uyarinankupaq runakunata huñumuy, chaynapi kay pachapi kawsananku punchawkama kasuwanankupaq hinaspa llapa churinkumanpas yachachinankupaq”, nispa.

¹¹Chaynapim qamkuna, chay orqopa sikinman asuykamuspa chaypi sayarqankichik, hinaptinmi chay orqomanta ratachkaq nina lloqsimuspan alto-altokamaraq chutarikuspan rakta puyumanraq tikrakururqa.

¹²Chay ninapa ukunmantam Tayta Dios rimapayasurqankichik. Qamkunaqa rimasqallantam uyarirqankichik, ichaqa manam ima rikchaytapas rikurqankichikchu.

¹³Kikin Tayta Diosmi qamkunawan pacto ruwasqanta willasurqankichik. Chay pactoqa iskay tabla rumikunapi qellqasqa chunka kamachikuykunam karqa. Chaykunataqa ruwayman churanaykichikpaqmi kamachikurqa.

¹⁴Ñoqatapas Tayta Diosmi kamachiwarqa qamkunaman kay kamachikuykunata hinaspa yachachikuykunata yachachinaypaq, chaynapi maymi yachanaykichik allpapi ruwayman churanaykichikpaq.

¹⁵Horeb orqopi rupachkaq nina ukumanta Tayta Diospa rimapayamususqaykichik punchawpiqa manam ima rikchaytapas rikurqankichikchu. Chaynaqa, huchaman urmanaykichikmanta waqaychakuychik, yanqañataq qariman otaq warmiman rikchakuq idolokunata ruwaspa huchallikuwaqchik.

¹⁶

¹⁷Amam ruwankichikchu animalkunaman, alton pawaqkunaman, qasqonpa puriq animalkunaman otaq challwakunaman rikchakuqtapas.

¹⁸

¹⁹Yanqañataq cielopi intita, killata, chaskakunata hinaspa cielopi tukuy ima kaqkunata qawaspaykichik yupaychawaqchik. Tukuy chaykunataqa Señornikichik Tayta Diosmi kay pachapi llapa runakunapaq churarqa.

²⁰Qamkunatam ichaqa metal chulluchina hornomanta hurqomuchkaq hina Egipto nacionmanta Tayta Dios hurqomusurqankichik, chaynapim kunanqa paypa runankunaña kankichik.

²¹Ichaqa qamkunaraykum ñoqapa contraypi Señornikichik Tayta Dios piñakururqa, hinaspam Jordán mayutapas manaña chimpanaypaq chaynataq qosunaykichik allin allpamanpas manaña yaykunaypaq jurarqa.

²²Kay allpapi wañukuspay Jordán mayuta mana chimpaptiypas, qamkunam ichaqa chay allin allpata hapimunaykichikpaq chimpankichik.

²³Qamkunawan Señornikichik Tayta Diospa pacto ruwas-qantaqa amam qonqarunkichikchu. Señornikichik Tayta Diosqa manam munanchu imaman rikchakuq idolotapas ruwakunaykichiktaqa.

²⁴Señornikichik Tayta Diosqa paylla kuyanatam munan. Payqa tukuy imapas ruparuq nina hinam.

²⁵Churikichikpas chaynataq willkaykichikpas karuptinqa hinaspa qamkunapas chay allpapi machuyaruspaykichikqa yanqañataq tukuy imaman rikchakuq idolokunatapas ruwaspa Señornikichik Tayta Diospa contranpi huchallikuspa payta piñachiwaqchik.

²⁶Kunanmi cielotawan kay pachata testigopaq churani, sichum chayta ruwaspaykichikqa Jordán mayupa waklaw chimpanpi yachanaykichik allpamantam chinkachisqa kankichik. Manam unaychu chaypiqa kankichikpas, aswanqa chinkachisqapunim kankichik.

²⁷Huklaw nacionkunaman Tayta Dios cheqerachisuptikichikmi chay nacionkunapi asllaña puchunkichik.

²⁸Chay nacionkunapim, runakunapa ruwasqan mana qawakuq, mana uyariq, mana mikuq, mana muskiq, kullumanta chaynataq rumimanta idolokunataña servinkichik.

²⁹Sichum maymi kasqaykichikmanta Señornikichik Tayta Diosta tukuy sonqoykichikwan, tukuy yuyaynikichikwan maskaspaykichikqa tarinkichikmi.

³⁰Tukuy ñakariykunapi kaspaykichik Señornikichik Tayta Diosman kutirikuspa payta kasukuptikichikqa,

³¹Señornikichik Tayta Diospas llakipayakuq Dios kasqanraykum manapuni saqesunkichikchu, nitaqmi chinkachisunkichikchu. Ñawpaq taytaykichikwan juraspan pacto ruwasqantapas manam qonqanqachu.

³²Ñawpaq tiempokunata tapukachakuychik, runata kay pachapi Diospa unanchasqanmantapuni tapukachakuychik, tukuy hinastinpi tapukachakamuychik: “¿Yaqachum kayna hatu-hatun kaqkuna pasakurqa? ¿Yaqachum kayna hatu-hatun kaqkunamanta uyarirqankichik?”

³³¿Ima llaqtataq qamkuna hina, Tayta Diospa ratachkaq ninapa chawpinmanta rimapayamusqanta uyarichkaspa mana wañururqachu?

³⁴¿Ima diostaq pruebakunata, señalkunata, milagrokunata hinaspa guerrakunata ruwaspan, paypa runankunaña kananchikpaq wakin nacionkunamanta akllawarqanchik? Señornikichik Tayta Diosllam Egipto nacionpi ñoqanchikpa qayllanchikpi chaynataq ñoqanchikrayku hatun atiyninwan hinaspa hatun castigowan mancharikuypaq kaqkunata ruwarqa.

³⁵Tayta Diosllam chaykunataqa qawachisurqankichik cheqap Dios kasqanta yachanaykichikpaq.

³⁶Hanaq pachamantam yachachisunaykichikpaq rimapayamusurqankichik, kay pachapiñataqmi rupachkaq ninata qawachisurqankichik, hinaptinmi chay ninapa ukunmanta rimamusqanta uyarirqankichik.

³⁷Tayta Diosqa ñawpaq taytaykichikkunata kuyasqanraykum mirayninkunata akllarqa, hinaspam Egipto nacionmanta ancha hatun atiyninwan hurqomurqa.

³⁸Ñoqanchikmantapas aswan achka runayuq nacionkunata chaynataq aswan atiyniyuq nacionkunatam qayllanchikmanta qarqorqa, hinaspam kunan qawasqaykichikpi hinapas paykunapa allpanta qamkunamanña qoykusunkichik.

³⁹Chaynaqa, Tayta Diosqa hanaq pachapipas chaynataq kay pachapipas sapallan Dios kasqantam yuyankichik.

⁴⁰Kunan punchawpi kamachisqay yachachikuykunatawan kamachikuykunatayá kasukuychik, hinaspaqa qamkunapas chaynataq miraynikichikpas allintam kawsakunkichik, Señornikichik Tayta Diospa wiñaypaq qosunaykichik allpapim unay watakuna yachankichik, nispa.

⁴¹Moisesmi Jordán mayupa waklawnin intipa qespimunan lawpi kimsa llaqtakunata akllarqa,

⁴²pipas runamasinta ñawpaqmanta mana cheqnichkaspa wañurachiqqa hukkaqnin llaqtaman ayqekuspa mana wañuchisqa kananpaq.

⁴³Chay llaqtakunam kaykuna: Chunniq pampapi Beser llaqtam Rubén ayllukunapaq karqa, Galaad lawpi Ramot llaqtam Gad ayllukunapaq karqa, Basán lawpi Golán llaqtañataqmi Manasés ayllukunapaq karqa.

⁴⁴Kay kamachikuykunatam Israelpa mirayninkunaman Moisés yachachirqa.

⁴⁵Egipto nacionmanta lloqsiramuptinkum Israelpa mirayninkunaman kay kamachikuykunata, yachachikuykunata chaynataq reglamentokunata Moisés yachachirqa.

⁴⁶Jordán mayupa intipa qespimunan lawninpi Bet-peor llaqtapa waqtan qechwapi, chay qechwaqa kachkan amorreokunapa reynin Sehonpa allpanpim. Rey Sehonqa Hesbón llaqtapim yacharqa, paytam vencerurqaku Moiseswan Israelpa mirayninkuna Egipto nacionmanta lloqsiramuspanku.

⁴⁷Hinaspam rey Sehonpa allpanta chaynataq Basán lawpi rey Ogpa allpantapas hapikuykurqaku. Chay iskay reykunam amorreokunapa reyninku karqaku, Jordán mayupa chimpan intipa qespimunan lawpim paykunaqa yacharqaku.

⁴⁸Chay reykunapa allpanqa karqa Arnón mayupa patanpi kaq Aroer llaqtamanta qallarispa Sirión orqokamam (Sirionpa huknin sutinqa Hermón orqom)

⁴⁹hinaspa Jordán mayupa chimpan intipa qespimunan lawpi kaq Pisga orqopa sikinpi Arabá lamar qochakamam otaq Puchqo lamar qochakamam karqa.