Read CHUYA QELLQA La Biblia en Quechua de Ayacucho 2012 Deuteronomio 5 Bible Online

Deuteronomio 5 - CHUYA QELLQA La Biblia en Quechua de Ayacucho 2012 bible

Deuteronomio 5

¹Israelpa llapallan mirayninkunata huñuruspanmi Moisés nirqa: Israelpa mirayninkuna, yachachisqay kamachikuykunatawan yachachikuykunatayá uyariychik. Chaykunata sumaqta yachaspaykichikyá ruwayman churaychik.

²Señorninchik Tayta Diosmi Horeb orqopi ñoqanchikwan pactota ruwarqa.

³Chay pactotaqa manam ñawpaq taytanchikkunallawanchu ruwarqa aswanqa ñoqanchikkunapiwanmi otaq kaypi llapallanchik huñunasqa kaqkunapiwanmi.

⁴Tayta Diosqa kikinpunim orqopi rupachkaq nina ukumanta rimapayawarqanchik.

⁵Chaypiqa ñoqam karqani Tayta Diospa hinaspa qamkunapa chawpikichikpi, chaynapi Tayta Diospa imam nimuwasqanta qamkunaman willanaypaq. Qamkunaqa rupachkaq ninata manchakuspaykichikmi orqoman mana seqarqankichikchu. Chaypim Tayta Dios nirqa:

⁶Ñoqam kani Señorniki Tayta Diosqa, Egipto nacionpi esclavo kasqaykimanta hurqomusuqniki.

⁷Amam ñoqamanta sapaq diosqa kapusunkichu.

⁸Amam ima idolotapas ruwakunkichu, nitaq hanaq pachapi kaqman, kay pachapi kaqman, allpa ukupi kaqman hinaspa yakupi kaqman rikchakuqtapas.

⁹Chaykunapa ñawpaqninpiqa amam qonqorakunkichu, amataqmi yupaychankichu. Ñoqa Señorniki Tayta Diosllam Diosnikiqa kani. Manam munanichu sapaq dioskuna yupaychanaykitaqa; cheqniwaqniy runataqa tayta-mamanmanta qallaykuspam willkanpa willkankama castigasaq.

¹⁰Kamachikuyniyta kasukuspa kuyawaqniy runatam ichaqa waranqantin mirayninkama kuyapayasaq.

¹¹Ñoqa Señorniki Tayta Diospa sutiytaqa amam yanqaqa rimankichu. Sutiyta yanqa rimaqtaqa castigasaqpunim.

¹²Ñoqa Señorniki Tayta Diospa kama-chisqaypi hinam samana punchawtaqa waqaychanki.

¹³Soqta punchaw llamkaspaykim tukuy ruwaynikikunata ruwanki,

¹⁴qanchis kaq punchawpim ichaqa samanki, chay punchawqa punchawniymi. Chay punchawpiqa amam imatapas ruwankichu. Qari churikipas, warmi churikipas, criadoykipas, criadaykipas, toroykipas, asnoykipas, ima animalnikipas, qanwan yachaq huklaw llaqtayuqpas amam imatapas ruwanqakuchu. Qam samaptiki criadaykiwan criadaykipas samanankupaq.

¹⁵Egipto nacionpi esclavo kasqaykitayá yuyariy, chaymantam ñoqa Señorniki Tayta Dios hatun atiyniywan chaynataq hatun castigowan hurqomurqayki. Chayraykum ñoqa Señorniki Tayta Dios kamachiki samana punchawta waqaychanaykipaq.

¹⁶ Ñoqa Señorniki Tayta Diospa kamachisqaypi hinam tayta-mamaykita respetaspa kasukunki, chaynapi ñoqapa qosqay allpapi unay wata kusisqa kawsakunaykipaq.

¹⁷Amam pitapas wañuchinkichu.

¹⁸Amam waqllikunkichu.

¹⁹Amam suwakunkichu.

²⁰Amam runamasikipa contranpiqa llullakunata rimankichu.

²¹Amam runamasikipa warmintaqa munapayankichu, nitaq wasintapas, allpantapas, criadontapas, criadantapas, torontapas, asnontapas nitaq imantapas, nispa.

²²Kay kamachikuykunatam lenwachkaq nina ukumanta chaynataq tutayaq puyu ukunmanta Tayta Dios hatunmanta rimarirqa, orqopa ñawpaqnin pampapi huñunasqa kachkaptikichik. Chaymantam iskay tabla rumikunapi qellqaspan ñoqaman qowarqa.

²³Tutayay ukumanta lloqsimuq rimariyta uyarispaykichikmi chaynataq orqotapas rupachkaqta rikuspaykichikmi, qamkunapas, kamachikuqkunapas chaynataq ancianokunapas ñoqaman hamuspa niwarqankichik:

²⁴“Cheqaptapunipas Señorninchik Tayta Diosmi kanchaynintawan atiyninta qawaykachiwanchik. Ninapa chawpinmanta lloqsimuq rimaynintam uyarirunchik. Kunanmi yacharuniku Tayta Dios rimapayachkaptinpas runakunaqa mana wañurusqanta.

²⁵Chaywanpas, ¿imamantamá kay mancharikuypaq ninapa rupasqanqa chinkasaqku? Sichum Señorninchik Tayta Diospa rimamusqanta yapatawan uyarispaqa wañurusaqkum.

²⁶Kawsaq Diospa ninapa chawpinmanta rimamusqanta ñoqayku hina uyarispaqa manam pipas kawsanmanchu.

²⁷Chaynaqa, qamllayá Señorninchik Tayta Diosman asuykuspa tukuy nimususqaykita uyarimuy hinaspa willawanaykikupaq, chaynapi kamachimususqaykita kasukunaykupaq”, nispa.

²⁸Ichaqa Tayta Diosmi chaykuna niwasqaykichikta uyarispan niwarqa: “Kay runakunapa imam nisusqaykitam uyariruni, chay nisqankuqa allinpunim.

²⁹Amalaya chayna sonqoyuqlla kanmanku, kasuwaspanku llapallan kamachikuyniykunata sapa punchaw ruwayman churanankupaq, chaynapi paykunapas chaynataq mirayninkupas allin kanankupaq.

³⁰Rispaykiyá carpankuman kutinankupaq nimuy.

³¹Qanmi ichaqa ñoqawan qepanki kamachikuyniykunata, yachachikuyniykunata chaynataq reglamentoykunata qoptiy yachachinaykipaq, chaynapi yachanankupaq qosqay allpapi ruwayman churanankupaq”, nispa.

³²Chaynaqa, Señornikichik Tayta Diospa tukuy kamachisusqaykichikta ama pantaspa kasukuychik.

³³Señornikichik Tayta Diospa kamachisusqaykichikman hina allinta kawsaychik, chaynapi yachanaykichik allpapipas unay watakuna kawsanaykichikpaq.