Read CHUYA QELLQA La Biblia en Quechua de Ayacucho 2012 Deuteronomio 6 Bible Online

Deuteronomio 6 - CHUYA QELLQA La Biblia en Quechua de Ayacucho 2012 bible

Deuteronomio 6

¹Kaykunam chay kamachikuykuna, estatutokuna chaynataq decretokuna, qamkunaman yachachinaypaq Señornikichik Tayta Diospa kamachiwasqankuna, chaykunatam yachanaykichik allpaman yaykuspa ruwayman churankichik.

²Chaynata ruwaspam Señornikichik Tayta Diosta respetankichik, hinaspam kawsanaykichik punchawkama kasukunkichik. Qamkunapas, churikichikkunapas chaynataq willkaykichikkunapas kasukuspa unay watakuna kawsakunaykichikpaq.

³Chaynaqa, Israelpa mirayninkuna, kasukuspayá ruwayman churaychik, chaynapi tukuy imapa qespinan chaynataq tukuy imapa kanan allpapi achkallataña miranaykichikpaq. Chay allpataqa ñawpaq taytaykichikkunapa yupaychasqan Tayta Diosmi prometewarqanchik.

⁴Israel, uyariy: ¡Señorniki Tayta Diosqa sapallan Diosmi!

⁵Señorniki Tayta Diostam tukuy sonqoykiwan, tukuy vidaykiwan hinaspa tukuy kallpaykiwan kuyanki.

⁶Kay kamachisqaykunatam sonqoykipi waqaychanki,

⁷hinaspam churikikunaman sapa kutilla yachachinki wasipi kaspa, ñanpi purispa, puñuq yaykuspa chaynataq hatarispaykipas.

⁸Kay kamachikuykunataqa señalta hinam brazoykipi chaynataq urkuykipipas watakunki.

⁹Wasikipa punkunpa pilarninkunapiwan chakankunapim qellqanki.

¹⁰ Ñawpaq taytanchik Abrahamman, Isaacman hinaspa Jacobman prometesqan allpamanmi Señornikichik Tayta Dios pusasunkichik. Chay allpaqa hatun llaqtayuqkunam kachkan; chay llaqtakunataqa manam qamkunachu hatarichirqankichik.

¹¹Chay allpapiqa, wasikunapas llapa imakunapa huntasqanmi kachkan, chaykunataqa manam qamkunachu huntachirqankichik. Chaypiqa kachkantaqmi pozokunapas, chaykunataqa manam qamkunachu toqorqankichik, kachkantaqmi mana tarpusqaykichik uvaskunawan olivos sachakunapas; chaykunatam saksanaykichikkama mikunkichik.

¹²Tayta Diostaqa amam qonqarunkichikchu, paymi Egipto nacionpi esclavo kachkaptinchik hurqomuwarqanchik.

¹³Señornikichik Tayta Diostam kasukuspa servinkichik, paypa sutillanpitaqmi jurankichikpas.

¹⁴Muyuriqnikichik nacionkunapi runakunapa yupaychasqanku idolokunataqa amam qatinkichikchu.

¹⁵Qamkunawan kaq Señornikichik Tayta Diosqa paylla kuyanata munaqmi, mana chayqa con-traykichikpi piñakuspanmi kay pacha-manta pasaypaqta chinkarachisunki-chikman.

¹⁶ Masah lawpi pruebaman churasqaykichikta hinaqa amam yupaychasqaykichik Tayta Diostaqa pruebaman churankichikchu.

¹⁷Señornikichik Tayta Diospa kamachikuyninkunata, estatutonkunata hinaspa decretonkunatam kasukunkichik.

¹⁸Tayta Diospa qayllanpiyá allin kaqkunatawan agradonpaq kaqkunata ruwaychik, chaynapi allin kanaykichikpaq hinaspa ñawpaq taytaykichikkunaman Tayta Diospa juraspa qosqan sumaq allpapi yachanaykichikpaq,

¹⁹chaynapi prometewasqanchikman hina enemigoykichikkunatapas qayllaykichikmanta Tayta Dios qarqonanpaq.

²⁰Sichum hamuq punchawkunapi miraynikichikkuna tapusunkichik: “¿Ima-paqtaq Señorninchik Tayta Diosqa kay kamachikuykunata, estatutokunata hinaspa decretokunata qosurqankichik?” nispanku,

²¹hinaptinqa qamkunam ninkichik: “Ñoqaykum Egipto nacionpi rey Faraonpa esclavonkuna karqaniku, hinaptinmi Tayta Dios hatun atiyninwan hurqomuwarqaku.

²²Ñoqaykum Egipto nacionpi Faraonpa chaynataq castankunapa contranpi Tayta Diospa hatun hinaspa mancharikuypaq milagrokuna ruwasqanta rikurqaniku, rikurqanikutaqmi admirakuypaq kaqkuna ruwasqankunatapas.

²³Chaynatam hurqomuwarqanchik ñawpaq taytanchikkunaman prometesqan allpaman pusamuwananchikpaq.

²⁴Señorninchik Tayta Diosmi llapallan kay yachachikuykunata cumplinanchikpaq kamachiwarqanchik hinaspa payta kasukunanchikpaq, chaynapi tukuy ima ruwasqanchikpas allinlla kaptin, imaynam kunan punchawkama kawsachiwasqanchikta hina kawsachiwananchikpaq.

²⁵Kamachiwasqanchikman hina Señorninchik Tayta Diospa qayllanpi tukuy kay kamachikuykunata kasukuspaqa allintam ruwachkanchik”, nispaykichik.