Read CHUYA QELLQA La Biblia en Quechua de Ayacucho 2012 Juan 12 Bible Online

Juan 12 - CHUYA QELLQA La Biblia en Quechua de Ayacucho 2012 bible

Juan 12

¹Pascua fiestapaq soqta punchawllaña faltachkaptinmi Jesús rirqa Lazaropa yachasqan Betania llaqtaman. Paytam wañusqamantaña Jesús kawsarirachirqa.

²Jesuspaq convidota ruwaptinkum Marta servirqa, Lazaroñataqmi Jesuswan mesapi tiyachkarqa.

³Mariañataqmi achka precioyuq nardomanta ruwasqa perfumeta yaqa huk botellata aparamuspa Jesuspa chakinman talliykuspan chukchanwan chakichirqa. Chaymi wasi huntata miskillataña asnarirqa.

⁴Discipulonkunamanta traicionaqnin kaq Judas Iscarioteñataqmi nirqa:

⁵Kay perfumetaqa huk wata jornalpa chanin qollqepichiki rantikurunmanku karqa hinaspa wakchakunata yana-panmanku karqa, nispa.

⁶Judasqa chaynataqa nirqa manam wakchakunata llakipayasqanraykuchu, aswanqa suwa kaspanmi, paymi qollqe waqaychaq karqa, hinaspanmi qollqe qosqankumanta hurqokuq.

⁷Chaymi Jesusñataq nirqa: Ama harkakuychu, kaytaqa pampakunay punchawpaqmi waqaycharqa.

⁸Wakchakunaqa qamkunawanmi haykapikamapas kanqaku, ñoqam ichaqa mana tukuy tiempochu qamkunawan kasaq, nispa.

⁹Achkaq judiokunam yacharurqaku Betaniapi Jesús kasqanta, hinaspam rirqaku Jesustawan wañusqanmanta kawsarimuq Lazarota qawamunankupaq.

¹⁰Llapa sacerdotekunapa kamachiqninkunaqa tanteanakururqakutaqmi Lazarotapas wañurachinankupaq,

¹¹Lazaropa causanpi achka judiokuna paykunamanta rakikuspanku Jesusman iñikusqankurayku.

¹²Paqarinnintintam Pascua fiesta-man achkallaña riqkuna yacharurqa-ku Jerusalenman Jesuspa risqanta.

¹³Paykunam palmerapa kallmanku-nata kuchuspanku Jesusta chaskinankupaq rirqaku, hinaspankum kaynata qaparirqaku: ¡Yupaychasunchik! ¡Qapaqchasqayá kachun Señorpa sutinpi hamuq Israelpa Reyninqa! nispanku.

¹⁴Jesusmi malta asnota tariramuspa sillakaramurqa, Chuya Qellqam kaynata nin:

¹⁵“Sión llaqtapi yachaqkuna, ama manchakuychikchu, Reynikichikmi malta asnopi sillada hamuchkan”, nispa.

¹⁶Discipulonkunaqa manaraqmi entienderqakuchu chaykunataqa. Hanaq pachaman Jesús kutikuptinñam yuyarirqaku chaykunaqa ñawpaqmantaraq qellqasqaña kasqanta, yuyarirqakutaqmi Jesuspaq chaykuna ruwasqankutapas.

¹⁷Lazarota Jesuspa kawsarirachis-qan rikuqkunam willakurqaku sepul-turamanta qayaykuspa kawsarirachis-qanta.

¹⁸Chayraykum runakuna tari-parqaku Jesusman chay milagro ru-wasqanta yachaspanku.

¹⁹Fariseo-kunañataqmi ninakurqaku: Manam ima ruwaytapas atichwanchu, qawaychik llapa runakunam payta qatichkanku, nispanku.

²⁰Pascua fiestaman riqkunam karqa wakiqnin Grecia nacionmanta kaqkuna.

²¹Paykunam Felipeman asuykurqaku, Felipeqa yacharqa Galilea lawpi Betsaida llaqtapim. Paytam ruegakurqaku: Señor, reqsiykuytam munaniku Jesusta, nispanku.

²²Felipeñataqmi rirqa Andresman willaq, hinaptinmi iskayninku Jesusman willaq rirqaku.

²³Jesusmi nirqa: Ñam tiempoña runapa Churin hatunchasqa kananpaq.

²⁴Cheqaptapunim nikichik, allpaman huk trigo wichispa mana wañuspanqa hina kaqllam kanqa, wañuspanmi ichaqa achkallataña rurunqa.

²⁵Pipas vidallan kuyaqqa wiñaypaqmi pierdenqa, pipas kay pachapi vidan cheqniqñataqmi wiñay kawsananpaq waqaychasqa kanqa.

²⁶Pipas serviwayta munaspaqa qatiwachunyá, payqa ñoqapa kasqaypim kanqa, serviwaqniytaqa Taytaymi ancha reqsisqata ruwanqa.

²⁷Kunanmi almay hukmanyasqa kachkan. Chaynaqa, ¿imanisaqtaq? ¿Icha: “Taytáy, salvaykuway kay ñakariymanta” nispachu nisaq? Ñoqaqa kaynata ñakarinaypaqmi kunan hamurqani.

²⁸Chaynaqa, Taytáy, ¡sutikitayá hatunchayña! nispa. Chaymantam hanaq pachamanta huk qapariy uyarikamurqa: Ñam hatuncharuniña, chaywanpas huktawanraqmi hatunchasaq, niq.

²⁹Chaypi kaq runakunañataqmi uyarispanku nirqaku: Rayom toqyaramun, nispanku. Wakiqninñataqmi nirqaku: Huk angelmi rimapayaykamun, nispanku.

³⁰Jesusñataqmi nirqa: Kay qayakuytaqa uyarirunkichik manam ñoqaraykuchu aswanqa qamkunaraykum.

³¹Kunanmi kay pachapi kaqkuna juzgasqa kanqa, qarqosqataqmi kanqa kay pachapi kamachikuqpas.

³²Ñoqañataqmi chakatawaptinku llapallanta kikiyman pusamusaq.

³³Kaynata nispanmi entiendechirqa imaynam wañukunanmanta.

³⁴Runaku-nañataqmi nirqaku: Leypiqa uyarirqaniku: “Cristoqa wiñay-paqmi kawsanqa” niqtam. ¿Imaynataq qamqa ninki: “Runapa Churinqa cheqaptapunim chakatasqa wañunqa”, nispaykiqa? ¿Pitaq runapa Churinqa? nispanku.

³⁵Jesusñataqmi nirqa: Achkiyqa as punchawllapas qamkuna-wanraqmi kanqa, chaynaqa achkiypiyá puriychik qamkunawanraq kachkap-tiyqa, chaynapi tutayay mana vencerusunaykichikpaq. Pipas tutayaypi puriqqa mayman risqantapas manam yachanchu.

³⁶Qamkunawanraq achkiy kachkaptinqa achkiymanyá iñiychik, chaynapi achkiypa churinkuna kanaykichikpaq. Kaykunata niruspanmi pasakuspan Jesús paykunamanta pakakururqa.

³⁷Achkallaña milagrokunata ruwach-kaptinpas Jesuspiqa manam creerqakuchu.

³⁸Chaynapim profeta Isaiaspa nisqan cumplikurqa. Paymi nirqa: Señorlláy, willakusqaykutaqa, ¿pitaq creerqa? Señorqa, ¿pimantaq atiynintaqa reqsichirqa? nispa.

³⁹Manam pipas creeyta atirqachu. Isaiasqa qellqarqataqmi:

⁴⁰Runakunatam Dios ñawsayarachirqa, paykunapa sonqontam rumiyachirqa, chaynapi mana rikukunankupaq, chaynapi mana entiendenankupaq, chaynapi mana kutirikamuwanankupaq, chaynapi mana sanoyachinaypaq, nispa.

⁴¹Chaynataqa Isaiasqa nirqa, Jesuspa kanchariyninta rikuspanmi, chaymi paymanta rimarqa.

⁴²Chaywanpas achkaq kamachikuq judiokunam Jesusman iñirqaku. Ichaqa fariseokunata manchakusqankuraykum mana libretachu willakuqku, chaynapi sinagogamanta mana wischusqa kanankupaq.

⁴³Chay kamachikuq judiokunaqa runakunapa alabasqan kaytam munarqaku, manam Diospa hatunchasqan kaytachu.

⁴⁴Jesusmi hatunmanta qaparispa nirqa: Pipas ñoqaman iñiqqa manam ñoqallamanchu iñin, aswanqa kachamuwaqniy Taytaymanwanmi.

⁴⁵Ñoqata rikuwaqniyqa kachamuwaqniytapas rikuntaqmi.

⁴⁶Ñoqa achkiymi kay pachaman hamurqani, chaynapi pipas ñoqapi iñiqqa manaña tutayaypi kananpaq.

⁴⁷Pipas palabraykunata uyarispan mana kasukuqtaqa manam ñoqachu juzgasaq, ñoqaqa hamurqani manam runakunata juzganaypaqchu, aswanqa salvanaypaqmi.

⁴⁸Pipas ñoqata wischupakuwaspa palabraykunata ma-na chaskiqpaqqa ñam juzgaqnin kach-kanña, ñoqapa palabraykunam paytaqa tukupay punchawpi juzganqa.

⁴⁹Ñoqaqa manam kikillaymantachu imatapas rimarqani, kachamuwaqniy Taytaymi kamachiwarqa imam rimanaytawan chaynataq imam yachachinaytapas.

⁵⁰Ñoqaqa yachanim Taytaypa kamachikuyninqa wiñay kawsay kasqanta, chaynaqa ñoqapa nisqaykunaqa Taytaypa kamachiwasqanman hinam, nispa.