Read CHUYA QELLQA La Biblia en Quechua de Ayacucho 2012 Juan 13 Bible Online

Juan 13 - CHUYA QELLQA La Biblia en Quechua de Ayacucho 2012 bible

Juan 13

¹Pascua fiestapa ñawpaqnintaraqmi Jesusqa yacharqaña kay pachamanta Taytanpa kasqanman kutinanta. Kay pachapi paypa kaqkunatam kuyarqa, tukupaykamam kuyarqa.

²Jesusmi discipulonkunawan cenachkarqa, diabloqa Simonpa churin Judas Iscariotetam umacharurqaña Jesusta traicionananpaq.

³Jesusqa yacharqam tukuy imatapas Taytan payman qoykusqanta, yacharqataqmi paymanta hamuspa payman kasqallan kutinantapas.

⁴Jesusmi cenasqanmanta hatariykuspan capanta hurqokuykurqa, hinaspam toallata weqawninman watakuykurqa.

⁵Lavatorioman yakuta talliykuspanñataqmi discipulonkunapa chakinta mayllaspan weqawninpi toallawan chakichirqa.

⁶Simón Pedrota mayllananpaq kaptinmi payñataq nirqa: Señorlláy, ¿qamraqchu ñoqapa chakiyta mayllawankiman? nispa.

⁷Jesusñataqmi nirqa: Kunanqa manaraqmi entiendenkichu kay ruwasqaykunataqa, qepatañam chaytaqa entiendenki, nispa.

⁸Chaymi Pedroñataq nirqa: Chakiytaqa manapunim haykapipas mayllawaqchu, nispa. Jesusñataqmi nirqa: Mana mayllaptiyqa manam discipuloyqa kawaqchu, nispa.

⁹Chaymi Simón Pedroñataq nirqa: Amayá chakillaytachu mayllawayqa, aswanqa umaytawan makiytawanyá, nispa.

¹⁰Jesusñataqmi nirqa: Pipas bañasqañaqa manam necesitanñachu mayllanataqa, aswanqa chakillantañam, qamkunaqa limpio-ñam kachkankichik, ichaqa manam llapaykichikchu.

¹¹Jesusqa yacharqañam pim traicionananta chaymi nirqa: “Manam llapaykichikchu kankichik limpioqa”, nispa.

¹²Discipulonkunapa chakinta may-llaruspanmi capanta churakuykuspa kasqallan tiyaykurqa mesaman, hinaspam nirqa: ¿Qamkunawan kay ruwasqayta en-tiendenkichikchu?

¹³Qamkunam sutichawankichik: “Yachachikuq hinaspa Señor”, nispa, chaytaqa allintam nin-kichik, arí chaynam kani.

¹⁴Ñoqa Señornikichik hinaspa yachachiqniki-chik kachkaspaymi chakikichikta may-llaruykichik, qamkunapas chaynayá chakikichikta mayllanakuychik.

¹⁵Ejem-plotam qamkunaman qoykichik qamkunawan ruwasqayta hina qamkunapas ruwanaykichikpaq.

¹⁶Cheqaptapunim nikichik, sirvienteqa manam maschu patronninmantaqa, nitaqmi willakuq riqpas maschu kachaqninmantaqa.

¹⁷Kaykunata entienderuspa ruwaspaykichikqa kusisqam kankichik.

¹⁸Manam llapallaykichikmantachu ñoqaqa rimachkani, reqsinim pikunam akllasqaytaqa. Qellqapa nisqanpi hina: “Mikuqmasiypas contraypim hatarirun” nisqanmi cumplikunan.

¹⁹Manaraq imapas pasakuchkaptinmi kunan nichkaykichik, ña pasakuruptinmi ichaqa creenkichik rimapayasuqnikichikqa pim kasqayta.

²⁰Cheqaptapunim nikichik, ñoqapa kachasqayta pipas chaskiqqa ñoqatapunim chaskiwan, ñoqa chaskiwaqniyñataqmi kachamuwaqniy Taytayta chaskin.

²¹Kaykunata nispanmi Jesusqa hukmanyarurqa hinaspam nirqa: Cheqaptapunim qamkunamanta huknikichik traicionawanqa, nispa.

²²Discipulonkunañataqmi qawana-kurqaku: Mayqanninchikmantaraq nichkan, nispanku.

²³Huknin discipulonmi karqa Jesuspa llumpay kuyasqan, paymi waqtanpi kachkarqa.

²⁴Paytam Simón Pedro señascharqa pimantas Jesús chayna nisqan tapunanpaq.

²⁵Jesuspa waqtanpi kaqñataqmi Jesús lawman aswanraq waqtapaykuspa tapurqa: Señorlláy, ¿pitaq chay traicionasuqnikiqa? nispa.

²⁶Chaymi Jesusñataq nirqa: Chay runaqa tantata mikuyman challpuykuspa qosqaymi, nispa. Tantata challpuykuspanmi qoykurqa Simonpa churin Judas Iscarioteman.

²⁷Chayta mikuykuptillanmi Judasman Satanás yaykururqa. Chaymi Jesús nirqa: Chay ruwanaykita utqayman ruway, nispa.

²⁸Mesapi mikuqkunaqa manam may-qanninpas entienderqakuchu Judasman nisqantaqa.

²⁹Qollqeta Judas waqay-chasqanraykum wakiqnin piensarqaku Jesusqa: “Rantipakaramuy fiestapaq imapas munasqanchikta otaq imallatapas wakchakunaman qomuy”, nispa nisqanta.

³⁰Tantata mikuruspa Judas lloqsiptinqa tutañam karqa.

³¹Judas lloqsiruptinmi Jesús nirqa: Kunanmi hatunchasqa kanqa runapa Churinqa, paypitaqmi Diospa hatunchakuyninpas qawachikunqa.

³²Sichum Dios hatunchakun paypi, hinaspaqa hatunchanqataqmi kikinpipas, payqa chayllam hatunchaykunqa.

³³Churillaykuna, manam unayñachu qamkunawanqa kasaq, chaymi maskawankichik. Imaynam judiokunaman nisqayta hinallam qamkunatapas nikichik: Ñoqapa risqaytaqa qamkunaqa manam riyta atiwaqchikchu, nispa.

³⁴Musoq kamachikuytam qoykichik, huknikichikmanta huknikichikkama kuyanakuychik. Imaynam ñoqa kuyaykichik chaynatayá qamkunapas huknikichikmanta huknikichikkama kuyanakuychik.

³⁵Sichum qamkunapura kuyanakuptikichikqa llapallan runakunam discipuloykuna kasqaykichikta yachanqaku.

³⁶Simón Pedrom nirqa: Señorlláy, ¿maytataq rinkiqa? nispa. Jesusñataqmi nirqa: Ñoqapa risqaytaqa manam kunanqa qatiwankimanchu, ichaqa qepatañam qatiwankiqa, nispa.

³⁷Chaymi Pedroñataq nirqa: Señorlláy, ¿imanasqataq kunanqa mana qatikimanchu? Vidaytapas qamraykuqa qosaqmi, nispa.

³⁸Jesusñataqmi nirqa: ¿Vidaykitachu ñoqapaq qonki? Cheqap-tapunim niki, manaraqpas utulu waqach-kaptinmi kimsa kutikama negawanki, nispa.