Read CHUYA QELLQA La Biblia en Quechua de Ayacucho 2012 Juan 14 Bible Online

Juan 14 - CHUYA QELLQA La Biblia en Quechua de Ayacucho 2012 bible

Juan 14

¹Amayá songoykichikqa hukmanyachunchu. Diospiyá creeychik, creeychiktaqyá ñoqapipas.

²Taytapa kasqanpiqa achkam yachanapaq kachkan, mana chayna kaptinqa nikichikmanchá karqa, rispaymi qamkunapaq maypi yachanaykichikpaq allichamusaq;

³allicharamuspayñataqmi huktawan kutimusaq qamkuna pusanaypaq, chaynapi maymi kasqaypi qamkunapas kanaykichikpaq;

⁴Qamkunaqa yachankichikmi mayman risqaytapas, reqsinkichiktaqmi ñantapas, nispa.

⁵Tomasñataqmi nirqa: Señorlláy, manam yachanikuchu mayman risqaykitapas chaynaqa, ¿imay-nataq ñantaqa reqsiymanku? nispa.

⁶Jesusñataqmi nirqa: Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqantakamaqa.

⁷Reqsiwaspaykichikqa Taytaytapas reqsiwaqchikchá, kunanmi reqsiykunkichik hinaspa rikuykunkichik, nispa.

⁸Felipeñataqmi nirqa: Señorlláy, Taytata qawaykachiwaptikikuqa chayllapaqñam kaniku, nispa.

⁹Jesusñataqmi nirqa: Felipe, unayñam qamkunawanqa kachkani. ¿Manaraqchu reqsiwanki? Ñoqata rikuwaqniyqa Taytatapas rikuykunñam. ¿Imanasqamá niwanki “Taytata rikuykachiwayku”, nispaykiqa?

¹⁰¿Manachu creenki Taytaywanqa huklla kasqayta? Imatapas nikichikqa manam kikillaymantachu, ñoqawan kaq Taytam kikinpa ruwanantaqa ruwan.

¹¹¿Manachu creenkichik ñoqaqa Taytapi kasqayta, Taytañataq ñoqapi kasqanta? Mana chayqa imakuna ruwasqaykunawanyá creewaychik.

¹²Cheqaptapunim nikichik, ñoqapi creeqqa ruwanqam ñoqapa ruwasqaykunata, payqa ñoqapa ruwasqaymantapas aswan hatun kaqkunataraqmi ruwanqa, chaynataqa ruwanqa Taytamanña risqayraykum.

¹³Imatapas sutiypi Taytata mañakuptikichikqa ruwasaqmi, chaynapi Taytapas Churinpi hatunchasqa kananpaq.

¹⁴Sichum imatapas sutiypi mañakuptikichikqa ruwasaqmi.

¹⁵Kuyawaspaykichikqa kamachikuyniykunatayá kasukuychik.

¹⁶Hinaptinqa mañakusaqmi Taytata huk kallpanchaqnikichikta kachamusunaykichikpaq. Paymi qamkunawan tukuy tiempo kanqa.

¹⁷Cheqap Espiritutaqa kay pachapi kaqkunaqa manam chaskinmankuchu, paykunaqa manam rikunkuchu nitaqmi reqsinkuchu. Qamkunam ichaqa reqsinkichik qamkunawan kasqanrayku, payqa qamkunapitaqmi kanqa.

¹⁸Manam sapallaykichiktachu saqerusqaykichik, qamkunamanmi kutimusaq.

¹⁹Asllatawanqa kay pachapi runakunaqa manañam rikuwanqañachu, qamkunam ichaqa rikuwankichikraq, qamkunaqa kawsasqayraykum kawsankichik.

²⁰Chay punchawpim yachankichik Taytaypi kasqayta, qamkunañataq ñoqapi, ñoqañataq qamkunapi.

²¹Kamachikuyniykunata yachaspa kasukuq runaqa kuyawanmi, Taytaypas kuyanqam chayna kuyaqniytaqa. Ñoqapas kuyaspaymi reqsichikusaq paywan.

²²Chaymi Judas (mana Iscariote kaqchu) nirqa: Señorlláy, ¿imanasqataq ñoqaykumanqa reqsichikunki aswanqa mana wakin runakunamanchu? nispa.

²³Chaymi Jesusñataq nirqa: Kuyawaqniyqa palabraykunatam kasukun, paytaqa Taytaypas kuyanqam, Taytaywan hamuspaymi kuyawaqniywanqa yachasaqku.

²⁴Mana kuyawaqniyqa manam palabraykunatapas kasukunchu. Qamkunaman nisqaykuna uyarisqaykichikqa manam ñoqapachu aswanqa kachamuwaqniy Taytaypam.

²⁵Kaykunataqa nikichik qamkunawan kaspayraqmi.

²⁶Kallpanchakuq Chuya Espíritu ñoqapa sutiypi Taytaypa kachamusqanmi ichaqa qamkunaman tukuy imata yachachisunkichik, hinaspam tukuy ima nisqaykunata yuyachisunkichik.

²⁷Hawkayaytam saqekichik, hawkayayniytam qoykichik, kay hawkayay qosqayqa manam runakunapa qosqan hinachu. Amayá hukmanyaychikchu nitaq manchakuychikpaschu.

²⁸Ñam uyarirqankichikña: “Riruspaymi kasqallan kutimusaq qamkunawan kanaypaq nisqayta”. Cheqapta kuyawaspaykichikqa Taytaman risqaywanqa kusisqachá kawaqchik, ñoqamantaqa payqa mayormi.

²⁹Kaykunataqa nikichik manaraq imapas pasakuchkaptinmi, pasakuruptinñataq creenaykichikpaq.

³⁰Qamkunawanqa manañam unay-ñachu rimasaq, ñam hamuchkanña kay pachapi kamachikuq. Payqa manam imaniraqllatapas ñoqamantaqa munaychakunchu.

³¹Ichaqa hinam chayna kanan, chaymi runakuna yachanqa Tay-tapa kuyawasqanta, yachanqakutaqmi ñoqaqa paypa kamachiwasqan ruwas-qaytapas. Hatariychik, kaymanta hakuchik.