Read CHUYA QELLQA La Biblia en Quechua de Ayacucho 2012 Juan 15 Bible Online

Juan 15 - CHUYA QELLQA La Biblia en Quechua de Ayacucho 2012 bible

Juan 15

¹Ñoqam kani cheqap uvas planta, Taytayñataqmi chakrapi llamkaq.

²Ñoqapi kaq kallmakuna mana ruruqtaqa paymi kuchurunqa, ruruq kallmatañataqmi aswanraq rurunanpaq rawmapaykunqa.

³Qamkunaqa rimapayasqay palabraykunawanmi limpioña kachkankichik.

⁴Ñoqapiyá takyaychik ñoqañataq qamkunapi. Kall-maqa kikillanmantaqa manam rurunmanchu mana yuranpi kaspaqa, qamkunapas manataqmi ruruwaqchikchu mana ñoqapi takyaspaqa.

⁵Ñoqam kani uvas planta, qamkunañataqmi kallmaykuna kankichik. Ñoqapi takyaqqa achkatam rurunqa. Ñoqamanta sapaqchakuruspam ichaqa mana imatapas ruwayta atiwaqchikchu.

⁶Pipas ñoqapi mana takyaqqa qorusqa kallma hinam wischusqa kanqa, chakiruspanmi ninapi rupananpaq wischusqa kanqa.

⁷Sichum ñoqapi takyaspaykichik chaynataq palabraykunapas qamkunapi takyaptinqa, tukuy ima munasqaykichikta mañakuychik, hinaptinqa qosunkichikmi.

⁸Taytaqa hatunchasqa kanqa achkata ruruptikichikmi, chaynapim qamkunaqa cheqap discipuloykuna kankichik.

⁹Imaynam Taytaypas ñoqata kuyawan chaynam ñoqapas qamkunata kuyaykichik, kuyakuyniypiyá takyaychik.

¹⁰Sichum kamachikuyniykunata kasukuspaqa kuyakuyniypiyá takyaychik, imaynam ñoqapas Taytaypa kamachikuyninkunata kasukuspay paypa kuyakuyninpi takyasqayta hina.

¹¹Kaykunataqa nikichik kusikuyniy qamkunapi kananpaqmi, chaynapi kusikuynikichik qespisqa kananpaq.

¹²Kaymi kamachikuyniyqa: Huknikichikmanta huknikichikkamayá kuyanakuychik, imaynam ñoqapas qamkuna kuyasqayta hina.

¹³Pipas hatun kuyakuyniyuqqa amistadninkunapa rantinpi wañuqmi.

¹⁴Sichum kamachisqayta ruwaspaykichikqa amistadniykunam kankichik.

¹⁵Manañam serviqniykuna nisqaykichikñachu, sirvienteqa manam yachanchu patronninpa ruwasqankunataqa. Qamkunaqa amistadniyñam kankichik, chaymi Taytapa niwasqankunata yachachirqaykichik.

¹⁶Manam qamkunachu ñoqataqa akllawarqankichik, ñoqam qamkunataqa akllarqaykichik, hinaspam achkata rurunaykichikpaq churarqaykichik, chaynapi rurusqaykichik takyananpaq. Chaynaqa, Taytam ñoqapa sutiypi tukuy ima mañakusqaykichikta qosunkichik.

¹⁷Kaytam kamachikichik: Huknikichikmanta huknikichikkamayá kuyanakuychik.

¹⁸Runakuna cheqnisuptikichikqa yuyariychikyá qamkunamantapas puntataqa ñoqata cheqniwasqankuta.

¹⁹Kay pachapaq kaptikichikqa runakunachá kuyasunkichikman kikinkuta hina, ichaqa manam kay pachapi kaqñachu kankichik, aswanmi kay pachamanta akllakurqayki-chik, chayraykum runakunaqa cheq-nisunkichik.

²⁰Palabraykunatayá yuya-riychik: Sirvienteqa manam patron-ninmanta aswan munayniyuqchu. Ño-qata qatikachawachkaspankuqa qam-kunatapas qatikachasunkichikmi; pala-braykunata kasukuptikichikqa qamkunapa nisqaykichiktapas kasukunqakum.

²¹Tukuy chaykunataqa ñoqaraykum ruwasunkichik, kachamuwaqniyta mana reqsisqankurayku.

²²Sichum mana hamuymanchu karqa nitaq rimaymanchu karqa, hinap-tinqa mana huchayuqchá kanmanku karqa, kunanmi ichaqa manaña imapas huchankumantaqa ninankupaq kanñachu.

²³Ñoqata cheqniqniykunaqa Taytatapas cheqninmi.

²⁴Sichum paykuna ukupi mana pipapas ruwas-qanta mana ruwaptiyqa manam huchayuqchu kanmanku karqa, ichaqa chay ruwasqaykunata rikuchkaspankupas cheqniwankuraqmi, cheqninkutaqmi Taytaytapas.

²⁵Kaykunaqa pasakuchkan leypa “yanqamantam cheqniwarqaku” nisqan cumplikunanpaqmi.

²⁶Ichaqa kallpanchasuqnikichik cheqap Espiritutam Taytaypa rantinpim kachamusaq, paymi ñoqamanta willasunkichik.

²⁷Qamkunapas ñoqamantam willakunkichik, qamkunaqa qallariyninmantapunim ñoqawan karqankichik.