Read CHUYA QELLQA La Biblia en Quechua de Ayacucho 2012 Juan 3 Bible Online

Juan 3 - CHUYA QELLQA La Biblia en Quechua de Ayacucho 2012 bible

Juan 3

¹Karqam huk fariseo Nicodemo sutiyuq runa, payqa judiokunamanta ancha reqsisqam karqa.

²Paymi tutallan hamuspan Jesusta nirqa: Yachachikuq, yachanikum yachachiwanaykikupaq Dios kachamususqaykita, milagrokunataqa manam pipas qam hinaqa ruwayta atinmanchu, sichum mana paywan Dios kaptinqa, nispa.

³Chaymi Jesusñataq nirqa: Cheqaptapunim niki, pipas mana musoqmanta nacespaqa manam rikunqachu Diospa munaychakusqantaqa, nispa

⁴Hinaptinmi Nicodemo tapurqa: ¿Imaynataq huk runa machuña kachkaspanqa musoqmanta nacemunman? ¿Icha atinmanchu mamanpa wiksanman kutiykuspa musoqmanta nacemuyta? nispa.

⁵Jesusñataqmi nirqa: Cheqaptapunim niki, pipas yaku-mantawan Espiritumanta mana naceqqa Diospa munaychakuyninmanqa manam yaykunqachu.

⁶Aychamanta nacemuqqa aychallam, Espiritumanta nacemuqmi ichaqa espíritu.

⁷Amayá admirakuychu “musoqmantam nacenanku” nisqaywanqa.

⁸Wayraqa munasqanmantam pukumun, chaymi qaparisqanta uyarinki, ichaqa manam yachankichu maymantam hamusqanta nitaq maymanmi risqantapas. Chaynam Espiritumanta nacemuqkunapas, nispa.

⁹Chaymi Nicodemo huktawan tapurqa: ¿Imaynataq chaykunaqa kanman? nispa.

¹⁰Jesusñataqmi nirqa: Qamqa Israelpi runakuna yachachiqmi kanki, ¿hinachkaspachu kaykunata mana yachanki?

¹¹Cheqaptapunim niki, yachasqayku kaqtam rimaniku, rikusqayku kaqtataqmi willakunikupas, qamkunam ichaqa willasqaykuta mana creenkichikchu.

¹²Kay pachapi kaqkunamanta willachkaptiy mana creespaykichikqa, ¿imaynataq creewaqchik hanaq pachapi kaqkunamanta willaptiyqa?

¹³Manam pipas hanaq pachataqa rirqachu, aswanqa runapa Churillanmi, paymi hanaq pachamanta uraykamurqa.

¹⁴Imaynam Moisespas maqta uruta broncemanta ruwaspa chunniqpi hoqarirqa, chaynam runapa Churinpas hoqarisqa kanqa.

¹⁵Chaynapi pipas paypi iñiqqa wiñay kawsayniyuqña kananpaq.

¹⁶Diosqa ancha-anchatam runakunata kuyarqa, chaymi sapallan Churinta qomurqa, pipas paypi iñiqqa mana wañunanpaq, aswanqa wiñay kawsayniyuq kananpaq.

¹⁷Diosqa manam churintaqa kay pachamanqa kachamurqa runakunata condenananpaqchu, aswanqa salvananpaqmi.

¹⁸Diospa Churinpi iñiqqa manam condenasqachu kanqa, mana iñiqmi ichaqa Diospa sapallan Churinpi mana iñisqanrayku condenasqaña kachkan.

¹⁹Condenasqaqa kachkanku, kay pachaman achkiy hamuchkaptin, tukuy mana allinkunata ruwaspanku tutayaytaraq kuyasqankuraykum.

²⁰Mana allinkunata ruwaq runakunaqa achkiytaqa cheqninkum, mana allinkuna ruwasqankuta mana qawachikunankurayku.

²¹Cheqap kaqman hina kawsaqkunam ichaqa, achkiyman asuykamunku, Diospa munasqanman hina ruwasqankuta qawachikunankupaq.

²²Kaykunapa qepantam Jesuswan discipulonkuna Judea lawman rirqaku. Chaypi paykunawan kaspanmi bautizarqa.

²³Juanpas Salim llaqtapa hichpan Enón lawpim bautizarqa, chaypi achka yaku kasqanrayku, chaymi llapa runakuna rispa bautizachikurqaku.

²⁴Chaykunaqa pasakurqa Juanta manaraq carcelachkaptinkum.

²⁵Ichaqa Juanpa discipulonkunam wakin judiokunawan chuyanchakuymanta atipanakurqaku.

²⁶Chaymi Juanman rispa nirqaku: Yachachikuq, Jordán mayupa wak-lawninpi qanwan kaq runapas bautizachkanmi, hinaptinmi llapa runakuna payman richkanku. Paymantaqa allintam willakurqanki, nispanku.

²⁷Juanñataqmi nirqa: Runaqa manam imatapas chaskinmanchu, sichum hanaq pachapi kaq Dios mana qoptinqa.

²⁸Qamkunaqa uyarirqankichikmi: “Ñoqaqa manam Cristochu kani, aswanqa paypa ñawpaqninta kachamusqallanmi kani”, nisqaytaqa.

²⁹Huk casamientopiqa noviollam noviayuqqa, noviopa ladonpi kaq amistadninñataqmi noviopa rimasqanta uyarispan kusikun. Chaynam ñoqapas kunan anchata kusikuni.

³⁰Cristoqa aswan-aswan reqsisqam kanan, ñoqañataqmi aswan-aswan taksayanay.

³¹Hanaq pachamanta hamuqqa llapallankupa hawanpim kachkan; kay pachamanta kaqqa kay pachapi kaqllam, rimanpas kay pachapi kaqkunallamantam. Hanaq pachamanta hamuqmi icha-qa llapallankupa hawanpi kachkan,

³²rikusqanmantawan uyarisqanmantataqmi willakunpas, ichaqa manam pipas paypa willakusqantaqa chaskinchu.

³³Pipas willakusqanta chaskiqmi ichaqa Diospa rimasqanqa cheqap kasqanta willakun.

³⁴Diospa kachamusqanqa Diospa palabrantam willakun, Diosmi paymanqa Espiritunta chaninpi mana pisisqata qon.

³⁵Taytaqa Churinta kuyaspanmi tukuy imatapas makinman churaykun.

³⁶Churipi iñiqqa wiñay kawsayniyuqmi, paypi mana iñiqmi ichaqa wiñay kawsaytapas mana haypanqachu, aswanqa Diospa sinchi piñakuynintam chaskinqa, nispa.