Read CHUYA QELLQA La Biblia en Quechua de Ayacucho 2012 Juan 6 Bible Online

Juan 6 - CHUYA QELLQA La Biblia en Quechua de Ayacucho 2012 bible

Juan 6

¹Chaymantam Galilea qochapa waklawninman Jesús rirqa, chay qochapa huknin sutinmi karqa Tiberias.

²Chaymi achkallaña runakuna qatirqaku, onqoqkuna sanoyachisqanta qawasqankurayku.

³Jesusñataqmi moqoman seqaruspan discipulonkunawan tiyaykurqa.

⁴Ñam judiokunapa Pascua fiestan hichpamuchkarqaña.

⁵Achkallaña runakuna qatimusqanta qawarispanmi Felipeta nirqa: ¿Maymantataq kaynaña runapaqqa mikuyta rantimusun? nispa.

⁶Chaynataqa nirqa Felipeta pruebananpaqmi, Jesusqa ñam yacharqaña ima ruwaytapas.

⁷Chaymi Jesusta Felipe nirqa: Iskay pachak jornalpa chanin tantapas manachá haypanmanchu sapakama asninkallaña mikuptinkupas, nispa.

⁸Jesuspa huknin discipulonmi karqa Simón Pedropa wawqen Andrés. Paymi nirqa:

⁹Kaypim huk warma kachkan, paypam kachkan iskay challwawan cebadamanta pichqa tantankuna. Chaywanpas, ¿imaynataq chayllaqa kaynaña runamanqa haypanman? nispa.

¹⁰Jesusñataqmi nirqa: Llapa runakunata tiyachiychik, nispa. Chaypim sumaqllaña pastokuna karqa, hinaptinmi chaypi tiyachirqaku. Llapallan tiyaqkunam karqa yaqa pichqa waranqa qarikuna.

¹¹Jesusñataqmi tantata hapiykuspan Diosman graciasta qorqa, hinaspam discipulonkunaman qoykurqa tiyaqkunaman aypumunankupaq; hina chaynallatam challwakunatapas aypuchirqa, chaymi saksanankukama mikurqaku.

¹²Saksaruptinkum discipulonkunata Jesús nirqa: Puchuqkunata hoqariychik ama usu-nanpaq, nispa.

¹³Chay pichqa cebada tantamanta puchuqkunatam huñurqaku chunka iskayniyuq canasta huntata.

¹⁴Jesuspa milagro ruwasqanta qawaykuspankum llapa runakuna nirqaku: Payqa cheqaptapunim kay pachaman hamuq profeta kasqa, nispanku.

¹⁵Jesusñataqmi musyakururqa hapiruspanku rey kananpaq churaruy munasqankuta, chaymi orqoman sapallan pasakurqa.

¹⁶Inti seqaykuruptinmi Jesuspa discipulonkuna lamar qochaman urayka-murqaku.

¹⁷Hinaspam barcaman qespispanku lamar qocha chimpayta qallarirqaku Capernaúm llaqtaman chayanankupaq. Ñam tutayaramurqaña, Jesusmi ichaqa paykunapa kasqanman mana hamurqaraqchu.

¹⁸Sinchita wayramusqanraykum lamar qochapa olankuna hoqarikamuyta qallaykurqa.

¹⁹Yaqa soqta kilómetro nisqataña richkaspankum, Jesusta rikururqaku yaku hawantakama paykuna lawman hamuchkaqta, hinaspam mancharikurqaku.

²⁰Jesusmi ichaqa nirqa: “Ñoqam kani, ama manchakuychikchu”, nispa.

²¹Chaymi kusikuymanta paykuna barcaman qespichirqaku, hinaspam chaylla maymi risqankuman chayarurqaku.

²²Paqarinnintintam lamar qochapa waklawninpi kaq runakuna yacharurqaku huk barcallaña chaypi kasqanta, paykunaqa rikurqakum Jesusqa discipulonkunawan kuska barcapi mana chimpasqanta.

²³Chaymanmi Tiberias llaqtamanta barcakuna chayaramurqa, chaypim Jesús graciasta qospa tantata runakunaman mikuchirqa.

²⁴Chaymi runakunaqa Jesusta chaynataq disci-pulonkunatapas manaña chaypi tarispanku, maskamunankupaq barcakunaman qespispanku Capernaúm llaqtaman rirqaku.

²⁵Chimparuspankum Jesusta lamar qochapa waklaw patanpi tarirurqaku, hinaspam nirqaku: Yachachikuq, ¿haykapitaq kayman hamurqanki? nispanku.

²⁶Chaymi Jesusñataq nirqa: Cheqaptapunim nikichik, qamkunaqa saksanaykichikkama tantata mikusqaykichikraykum maskawachkankichik, manam milagrokuna qawasqaykichikraykuchu.

²⁷Amayá llamkaychikqa tukuruqlla mikuyraykuchu, aswanqa wiñay kawsay qokuq mikuypaqyá llamkaychikqa. Chay mikuytaqa runapa Churinmi qosunkichik, paytam Dios Tayta chaypaq akllarqa, nispa.

²⁸Chaymi runakuna nirqaku: ¿Imatataq ruwasaqku Diospa munasqanta ruwanaykupaq? nispanku.

²⁹Jesusñataqmi nirqa: Diospa munasqan ruwayqa paypa kachamusqanpi iñiymi, nispa.

³⁰Hinaptinmi nirqaku: ¿Ima milagrotataq qowankiku chayta qawaspa qanman iñinaykupaq? ¿Imatataq ruwayta atiwaq?

³¹Ñawpaq taytaykuqa “maná” sutiyuq tantatam chunniqpi mikurqaku. Chuya Qellqam nin: “Diosmi hanaq pachamanta tantata qomurqa”, nispa.

³²Chaymi Jesusñataq nirqa: Cheqaptapunim nikichik, manam Moiseschu hanaq pachamanta hamuq tantataqa qosurqankichik, aswanqa Taytaymi hanaq pachamanta cheqap tantataqa qosuchkankichik.

³³Diospa qosqan tantanqa hanaq pachamanta uraykamuqmi, chay tantaqa runakunamanmi kawsayta qon, nispa.

³⁴Hinaptinmi chay runakunañataq nirqaku: Señor, tukuy tiempoyá chay tantata qowayku, nispanku.

³⁵Chaymi Jesusñataq nirqa: Ñoqam kani kawsay qokuq tanta, pipas ñoqaman hamuqqa manam hay-kapipas yarqachikunqachu, pipas ñoqa-pi iñiqqa manataqmi haykapipas yakuna-yachikunqachu.

³⁶Ichaqa nisqaypi hina riku-wachkaspaykichikpas, manam creenkichikchu.

³⁷Taytapa qowasqankunaqa llapallanmi ñoqaman hamunqa, ñoqaman hamuqtaqa manam qarqonichu.

³⁸Hanaq pachamantaqa hamurqani manam kikiy-pa munasqayta ruwanaypaqchu, aswanqa kachamuwaqniypa munasqanta ruwanaypaqmi.

³⁹Kachamuwaqniypa munasqanqa kaymi: Paypa qowasqanta mana mayqannintapas chinkachispay tukupay punchawpi kawsarichiyniymi.

⁴⁰Taytapa munasqanqa kaymi: Diospa Churinta rikuspa payman iñiqqa wiñay kawsayniyuqñam, chayna iñiqtaqa tukupay punchawpim kawsarichimusaq, nispa.

⁴¹“Ñoqam kani hanaq pachamanta uraykamuq tanta” nispa Jesuspa nisqanmantam llapa judiokuna paypa contranpi kaynata rimapakurqaku:

⁴²¿Manachum kay Jesusqa Joseypa churin? Tayta-mamantapas reqsinchikmi, ¿imaynamá hanaq pachamantam uraykamurqani nichkanqa? nispanku.

⁴³Chaymi Jesusñataq nirqa: Amañayá wachachachaychikchu.

⁴⁴Manam pipas ñoqamanqa hamunmanchu kachamuwaqniy Taytay mana pusamuptinqa, chay hamuqtaqa tuku-pay punchawpim kawsarichisaq.

⁴⁵Pro-fetakunapa qellqasqan libropim nichkan: “Diosmi yachachin llapallanta”, nispa. Chaynaqa, pipas Taytayta uyarispa paymanta yachaqkunaqa ñoqamanmi hamunqaku.

⁴⁶Taytataqa manam pipas rikurqachu, aswanqa Diosmanta hamuqllam, payllam Taytataqa rikurqa.

⁴⁷Cheqaptapunim nikichik, pipas ñoqapi iñiqqa wiñay kawsayniyuqñam.

⁴⁸Ñoqam kani kawsay qokuq tanta.

⁴⁹Ñawpaq taytaykichikkunam “maná” sutiyuq tantata chunniqpi mikurqaku, chaywanpas wañururqakum.

⁵⁰Ichaqa kaymi hanaq pachamanta hamuq tanta, pipas paymanta mikuqqa manam wañunqachu.

⁵¹Ñoqam kani hanaq pachamanta hamuq kawsay qokuq tanta, pipas chay tantata mikuqqa wiñaypaqmi kawsanqa. Ñoqapa qosqay tantaqa aychaymi, chaytaqa llapa runakuna kawsananpaqmi qosaq.

⁵²Chaynata niruptinmi llapa judiokuna kikinkupura kaynata atipanakurqaku: ¿Imaynataq kayqa aychantaqa qowach-wan mikunanchikpaqqa? nispanku.

⁵³Jesusñataqmi nirqa: Cheqaptapunim nikichik, runapa Churinpa aychanta mana mikuspaykichikqa chaynataq yawarniytapas mana tomaspaykichikqa manam kawsankichikchu.

⁵⁴Pipas aychayta mikuspa yawarniyta tomaqqa wiñay kawsayniyuqmi, ñoqañataqmi tukupay punchawpi kawsarichimusaq.

⁵⁵Aychayqa cheqap mikuymi, yawarniypas cheqap tomaymi.

⁵⁶Aychay mikuqqa hinaspa yawarniy tomaqqa ñoqapim kachkan, ñoqañataqmi paypi.

⁵⁷Imaynam kachamuwaqniy Taytay kawsan, ñoqapas paypim kawsani, chaynam aychay mikuqpas ñoqapi kawsanqa.

⁵⁸Kaymi hanaq pachamanta hamuq tantaqa. Ñawpaq taytaykichikkunaqa “maná” sutiyuq mikuyta mikuchkaspankupas wañurqakum, pipas kay tantamanta mikuqmi ichaqa wiñaypaq kawsanqa, nispa.

⁵⁹Kaykunataqa rimarirqa Capernaúm llaqtapi kaq sinagogapi yachachispanmi.

⁶⁰Chayta uyariykuspankum qatiqninkunamanta achkaq nirqaku: Kay nisqankunaqa mana aguantay atinam. ¿Pitaq kayta chaskinman? nispanku.

⁶¹Jesusñataqmi rimapakusqankuta musyaruspan paykunata nirqa: ¿Kay nisqaykunawanchu hukmanyarunkichik?

⁶²¿Imaniwaqchiktaq runapa Churinta ñawpaq kasqanman wichariqta rikuspaykichikqa?

⁶³Espiritum kawsay qokuqqa, aychaqa manam imapaqpas valenchu. Kay rimapayasqaykunaqa espiritum hinaspa kawsay qokuqmi.

⁶⁴Ichaqa qamkuna ukupim mana creeqkuna kachkanraq, nispa. Jesusqa chaykunata nirqa, pikunam mana iñisqanta chaynataq pim traicionananta qallariyninmantapuni yachaspanmi.

⁶⁵Jesusqa nirqataqmi: Chayraykum nirqaykichik, manam pipas ñoqamanqa hamunmanchu Dios Tayta mana pusamuptinqa, nispa.

⁶⁶Chaymantapunim achkaq qatiqninkuna qepaman kutikuspanku manaña Jesuswan purirqakuñachu.

⁶⁷Chaymi chunka iskayniyuq discipulonkunata Jesús nirqa: ¿Qamkunapas pasakuytachu munankichik? nispa.

⁶⁸Hinaptinmi Simón Pedroñataq nirqa: Señor, ¿pimantaq risaqku? Qampa rimasqaykiqa wiñay kawsay qokuqmi.

⁶⁹Ñoqaykuqa ñam creenikuña, yachanikutaqmi kawsaq Diospa Churin kasqaykitapas, nispa.

⁷⁰Chaymi Jesusñataq nirqa: ¿Manachum ñoqaqa chunka iskayniyuqta akllarqaykichik? Ichaqa huknikichikmi diablo, nispa.

⁷¹Chaynataqa nirqa Simonpa churin Judas Iscariotemantam. Paymi chunka iskayniyuq discipulokunapa huknin kachkaspapas traicionanan karqa.