Read CHUYA QELLQA La Biblia en Quechua de Ayacucho 2012 Hechos 11 Bible Online

Hechos 11 - CHUYA QELLQA La Biblia en Quechua de Ayacucho 2012 bible

Hechos 11

¹Judeapi kaq iñiqkunam apostolkunapiwan yacharurqaku mana judío kaq runakunapas Diospa palabran chaskisqankuta.

²Jerusalenman Pedro kutiramuptinñataqmi iñiq judiokuna paywan atipanakuspanku

³nirqaku: ¿Imanasqataq qamqa mana judío runakunapaman rirqanki, hinaspa paykunawan mikumurqanki? nispanku.

⁴Chaymi Pedro qallariyninmanta imaynam pasakusqanta willakuspan nirqa:

⁵Jope llaqtapim Diosta mañakuchkarqani, chaymi visionta rikurqani hanaq pachamanta tawan puntanmanta warkusqa hatun sabanasta ñoqapa kasqaykama uraykamuqta.

⁶Chayta qawaykuspaymi rikurqani tawa chakiyuq animalkunata, purun animalkunata, qasqonpa puriq animalkunata hinaspa alton pawaq urpikunata.

⁷Chaymantam kayna nimuwaqta uyarirqani: “Pedro hatariy, wañuchiy hinaspa mikuy” niqta.

⁸Chaymi ñoqañataq nirqani: “Señor manapunim mikuymanchu, ñoqaqa haykapipas manam mikurqanichu mana mikuna kaqkunataqa”, nispay.

⁹Chaymi hanaq pachamanta huktawan rimapayamuwarqa: “Diospa chuyanchasqantaqa amayá millakuypaqmi niychu”, nispa.

¹⁰Chaynallam kimsakama pasakurqa, hinaptinmi chaykunaqa hanaq pachaman kaqlla hoqarikururqa.

¹¹Chay ratollapim kimsa runakuna chayaramurqa chay samapakusqay wasiman, Cesarea llaqtaman pusawanankupaq.

¹²Chaymi Chuya Espíritu kamachiwarqa: “Paykunawan riy ama iskayrayaspayki”, nispa. Ñoqawantaqmi rirqaku kay soqta iñiqmasinchikkunapas, lliwmi chay runapa wasinman yaykurqaniku.

¹³Chay runam willawarqaku wasinpi huk ángel rikuriykuspan kayna nisqanta: “Kunanyá runakunata Jope llaqtaman kachay Pedrowan sutichasqa Simonta pusamunankupaq.

¹⁴Paymi nisunki imaynam qampas hinaspa aylluykikunapas salvasqa kanaykichikmanta”, nispa.

¹⁵Paykunata rimapayachkaptiyraqmi ñoqanchikman imaynam ñawpaqta hamusqanpi hina Chuya Espíritu paykunaman uraykamurqa.

¹⁶Chaymi yuyarirurqani Señorninchik Jesucristopa nisqanta, paymi nirqa: “Cheqaptam Juanqa yakuwan bautizarqa, qamkunañataqmi Chuya Espirituwan bautizasqa kankichik”, nispa.

¹⁷Chaynaqa, Señor Jesucristopi iñiqkunaman ñoqanchikman hina Espiritunta Dios qochkaptinqa, ¿pitaq ñoqaqa karqani Diosta harkakunaypaqqa? nispa.

¹⁸Chaynata Jerusalenpi kaq iñiqkuna uyariruspankum manaña Pedropa contranpichu karqaku, hinaspam Diosta yupaycharqaku: Chaynaqa, mana judío runakunamanpas Diosmi wanakuytaña qoykun wiñay kawsanankupaq, nispanku.

¹⁹Estebanta wañurachispankum wakin iñiqkunatapas ñakarichinankupaq qatikacharqaku, chaymi Fenicia, Chipre hinaspa Antioquía lawkunaman wakiqnin ayqekurqaku. Chaykunapim judío runakunallaman Jesucristomanta willakurqaku.

²⁰Ichaqa Chipre lawmantawan Cirene llaqtamantam wakin iñiqkuna Antioquía llaqtaman chayarurqaku, paykunam mana judío kaq runakunaman Señor Jesusmanta allin noticiata willakurqaku.

²¹Diospa atiyninmi paykunata yanaparqa, chaymi achka runakuna Jesucristoman iñikurqaku.

²²Jerusalén llaqtapi iñiqkunam kaykunata yacharuspanku, Antioquía llaqtaman Bernabeyta kacharqaku.

²³Chayaruspanmi chay llaqtapi iñiqkunapaq Diospa kuyakuyninta qawaykuspan llumpayta kusikurqa, hinaspanmi paykunata kallpancharqa qaqa hina sayaspanku tukuy sonqowan Señorta qatinankupaq.

²⁴Bernabeyqa karqa allin runam, Chuya Espiritupa huntasqanmi, hinaspa allin iñiyniyuqmi. Chaynapim achka runakuna Señorman iñikurqaku.

²⁵Chaymantam Bernabé pasarqa Tarso llaqtaman Saulota maskamunanpaq, tariruspanñataqmi Antioquiaman pusarqa.

²⁶Chaypim Antoquía iglesiapi huk watapuni karqaku achka iñiqkunata yachachistin. Antioquía llaqtapim Jesucristoman iñiqkunata “cristianokuna” nispa sutichayta qallaykurqaku.

²⁷Chay punchawkunapim profetakuna Jerusalenmanta Antioquiaman rirqaku.

²⁸Paykunamantam hukninku Agabo sutiyuq sayarispan, Chuya Espiritupa yanapakuyninwan nirqa: Tukuy kay pachapim hatun yarqay kanqa, nispa. Chaymi cheqaptapuni pasakurqa emperador Claudiopa tiemponpi.

²⁹Hi-naptinmi Antioquía llaqtapi iñiqkuna rimanakurqaku Judea lawpi iñiqkunaman atisqankuman hina yanapakuyta apachinankupaq.

³⁰Chaynapim Judea lawpi iñiqkunapa kamachiqninkunaman yanapakuyninkuta Bernabeywan hinaspa Saulowan apachirqaku.