Read CHUYA QELLQA La Biblia en Quechua de Ayacucho 2012 Hechos 12 Bible Online

Hechos 12 - CHUYA QELLQA La Biblia en Quechua de Ayacucho 2012 bible

Hechos 12

¹Chay tiempopim rey Herodes wakin iñiqkunata ñakarichinanpaq qatikachayta qallaykurqa.

²Juanpa wawqen Jacobotapas espadawan wañuchinankupaqmi kamachikurqa.

³Chaymi Judiokunapa gustonpaq kasqanta qawaspan Pedrotapas presocharurqa. Chayqa pasakurqa mana levadurayuq tantata mikunanku fiesta punchawpim.

⁴Pedrota presocharuspanmi carcelman wichqarurqa, hinaspam chunka soqtayuq soldadokunata tawaman rakinaruspan turnonpi cuidachirqa. Payqa Pascua fiesta pasaruptinñam Pedrota juzgananpaq runakunapa qayllanman hurqomuyta munarqa.

⁵Chaynapim Pedroqa carcelpi allin cuidasqa karqa, llapa iñiqkunañataqmi paypaq tukuy sonqonkuwan Diosta mañakurqaku.

⁶Chay tutam Pedroqa iskay cadenawan watasqa hinaspa iskay soldadokunapa chawpinpi puñuchkarqa, wakin soldadokunañataqmi punkupi kachkarqaku carcelta cuidaspanku. Chayqa karqa llapa runakunaman Pedrota Herodespa hurqomunan punchawpa ñawpaqnin tutatam.

⁷Hinaptinmi qonqayllamanta Señorpa angelnin chaypi rikuriykuspan chay carcelta kanchayninwan huntaykurqa. Chay angelmi Pedrota waqtanpi llapchaykuspan rikcharichirqa, hinaspanmi nirqa: Utqayman hatariy, nispa. Hinaptinmi Pedropa makinmanta cadenakuna wichirurqa.

⁸Angelñataqmi nirqa: “Weqawnikita allinta watakuy hinaspa usutaykiwan churakuy”, nispa. Chaynata Pedro ruwaruptinmi chay ángel nirqa: Capaykiwan wankukuspayki qatiway, nispa.

⁹Pedroñataqmi lloqsiruspan angelta qatirqa, ichaqa manam yacharqachu angelpa ruwasqanqa cheqap kasqanta, aswanqa piensarqa visionlla kasqantam.

¹⁰Ichaqa iskay punkupi kaq soldadokunapa ñawpaqninta pasaruspankum calleman lloqsiq fierro punkuman chayarurqaku, hinaptinmi chay punku kikillanmanta kichakuykurqa. Lloqsiruspanku huk calletaña richkaptinkum chay angelqa qonqayllamanta sapallanta saqerurqa.

¹¹Hinaptinmi Pedroqa musyakuruspan nirqa: Kunanmi ichaqa cheqappuni kasqanta yacharuni. Señormi angelninta kachamuwarqa Herodesmanta hinaspa llapa judiokunapa makinmanta librawananpaq, nispa.

¹²Chaynata yuyaymanastinmi Pedroqa Juan Marcospa maman Mariapa wasinman rirqa. Chay wasipim achka runakuna huñunakuspanku Diosta mañakuchkarqaku.

¹³Hawa punkuta Pedro takaykuptinmi Rode sutiyuq sipascha lloqsiramurqa.

¹⁴Ichaqa Pedropa rimasqanta musyaruspanmi kusikuyllawanña mana punkutapas kichaspan ukuman kallparqa, hinaspam nirqa: ¡Pedrom punkupi kachkan! nispan.

¹⁵Chaymi sipaschata nirqaku: ¡Icha locayarunki! nispanku. Payñataqmi nirqa: ¡Pedropunim! nispa. Paykunañataqmi aswanraq nirqaku: ¡Manam payqa kanmanchu, angelninchá! nispanku.

¹⁶Pedroñataqmi punkuta takay-takachkarqa, hinaptinmi kichaykuspa pay kasqanta rikuykuspanku llumpayta hukmanyarurqaku.

¹⁷Pedroñataqmi makinwan señaschaspan upallachirqa, hinaspam paykunaman willarqa, Señorpa imaynam carcelmanta hurqomusqanta. Nirqataqmi: Kaytayá willaychik Jacobomanwan iñiqmasinchikkunaman, nispa. Chaymantam lloqsiruspan huklawman pasakurqa.

¹⁸Achikyaruptinmi soldadokuna llumpay chaqwapi karqaku, imaynanpim Pedro chinkarusqanta mana yachaspanku.

¹⁹Herodesñataqmi Pedrota maskachimuspan mana tarimurqakuchu, hinaptinmi cuidaq soldadokunata allinta tapuykuspan paykunataña wañuchinankupaq kamachirqa. Chaymantam Herodesqa ripukurqa Judeamanta Cesarea llaqtapi yachananpaq.

²⁰Tiro llaqtapi hinaspa Sidón llaqtapi runakunam Herodespa llaqtanmanta kawsaykunata chaskiqku; ichaqa Herodesmi paykunapaq piñakuruspan manaña apachirqañachu, chaymi paykuna tanteanakuruspanku rey Herodespa confianza serviqnin Blastowan amistadta armarurqaku, chaynapi paypa yanapakuyninwan Herodeswan allinyanakuyman yaykunankupaq.

²¹Chaymi Herodesqa paykunata qayachirqa huk punchaw rimanakunankupaq. Chay punchaw chayaramuptinmi rey pachanwan pachakuruspan trononpi tiyaykuspan llapa runakunaman rimarirqa.

²²Hinaptinmi chay runakuna qaparispanku nirqaku: ¡Kayqa diospa rimayninmi, manam runapachu! nispanku.

²³Chayllamanmi Señorpa angelnin hamuruspan Herodesta onqorachirqa, Diosta mana hatunchasqanmanta. Hinaptinmi urukunapa mikusqan wañu-rurqa.

²⁴Diospa palabranmi ichaqa tukuy hinastinpi willakuptinku mirarqa.

²⁵Bernabeywan Sauloñataqmi yana-pakuyninkuta tukuruspanku Jerusa-lenmanta kutikurqaku Marcoswan sutichasqa Juanta pusarikuspanku.