Read CHUYA QELLQA La Biblia en Quechua de Ayacucho 2012 Hechos 14 Bible Online

Hechos 14 - CHUYA QELLQA La Biblia en Quechua de Ayacucho 2012 bible

Hechos 14

¹Iconio llaqtapim Pablowan Bernabé yaykurqaku judiokunapa sinagoganman, chaypi willakuptinkum Jesucristoman achka judiokuna iñikurqaku, iñikurqataqmi mana judío kaqkunapas.

²Ichaqa Jesucristoman mana iñiq judiokunam, mana judío kaqkunata umacharuspanku iñiqkunapa contranpi hatarirachirqaku.

³Chaywanpas Pablowan Bernabeyqa unaymi chay llaqtapi karqaku, hinaspam Señorman hapipakuspanku mana manchakuspa Diospa kuyakuyninmanta willakurqaku. Señorñataqmi willakusqanku cheqap kasqanta qawachinanpaq, paykunaman atiyta qorqa admirakuypaq milagrokunatawan señalkunata ruwanankupaq.

⁴Chay llaqtapi runakunam iskayman rakinakururqaku, wakinmi judiokunawan karqaku, wakiqninñataq apostolkunawan.

⁵Hinaptinmi llapa judiokunawan mana judío kaqkuna kamachikuqkunawan kuska rimanakururqaku Pablotawan Bernabeyta maqaparuspanku rumikunawan choqaparunankupaq.

⁶Ichaqa Pablowan Bernabeymi yachakuruspanku ayqekurqaku Licaonia lawpi Listra hinaspa Derbe llaqtakunaman, chaynataq muyuriqninpi taksa llaqtakunamanpas.

⁷Tukuy chaykunapim Jesucristomanta allin noticiata willakurqaku.

⁸Listra llaqtapim tiyachkarqa nacesqanmantapuni mana puriy atiq runa.

⁹Paymi Pablopa rimasqanta uyarichkarqa, hinaptinmi Pablo qawariykuspan musyarurqa sanoyananpaq iñiyniyuq kasqanta.

¹⁰Chaymi hatunmanta nirqa: ¡Hatarispa sayariy! nispa. Hinaptinmi chay runaqa hukta pawaris-pa puriyta qallaykurqa.

¹¹Pablopa ruwas-qanta rikuruspankum llapa runakuna, Licaonia rimaypi qayaykachakurqaku: ¡Dioskunam runapa ayrinpi ñoqanchikman uraykaramunku! nispanku.

¹²Bernabeytam diosninku Jupiterwan suticharqaku, Pablotañataqmi willa-kusqanrayku Mercurio diosninkuwan suticharqaku.

¹³Chay llaqtaman yaykuy-kunapim Jupiterpa templon karqa, hinaptinmi Jupiterpa sacerdoten apamurqa torokunatawan waytakunata llaqtapa punkunman, hinaspam llapa runakunawan kuska sacrificiokunata paykunaman ofreceyta munarqaku.

¹⁴Chaymi apóstol Bernabeywan apóstol Pablo chayta uyariruspanku pachankuta llikiparqaku, hinaspam llapa runakunaman kuskanchakuruspanku qaparirqaku:

¹⁵¡Runamasillaykuna! ¿Imanasqataq kayta ruwachkankichik? Ñoqaykuqa qamkuna hina runallam kaniku, hamurqanikuqa cheqap kawsaq Diosmanta willakuqmi, chaynapi tukuy mana allin ruwaynikichikta saqespa kawsaq Diosman kutirikunaykichikpaq. Paymi unancharqa kay pachata, hanaq pachata, lamar qochata, hinaspa chaykunapi tukuy ima kaqkunatapas.

¹⁶Ñawpaq tiempokunapim llapa runakunata kachaykurqa munasqankupi purikunankupaq.

¹⁷Chaywanpas Diosqa runakunapaq allin kaqkunata ruwaspam pim kasqanta reqsichikurqa. Paymi parachimun, paytaqmi tarpuykunatapas allinta ruruchispa mikunanchikpaqpas chani-chaninta qowanchik, chaynapi kusisqa kawsananchikpaq, nispanku.

¹⁸Chaynata nispankum, paykunaman sacrificiokuna ofrecenankumanta ñaka-ñakayta harkakururqaku.

¹⁹Chayllamanmi Antioquía llaqtamantawan Iconio llaqtamanta judiokuna chayaramurqaku, paykunam llapa runa-kunata umacharuspanku, Pablota rumi-wan choqaparurqaku, hinaspankum “wañurunñam” nispanku llaqtapa patan-kama aysarurqaku.

²⁰Ichaqa iñiqkuna Pablopa muyuriqninpi huñunasqa kachkaptinkum, Pablo hatarispan huktawan chay llaqtaman yaykurqa. Paqarinnintin punchawñataqmi Bernabeywan kuska Derbe llaqtaman pasakurqa.

²¹Jesucristomanta allin noticiata Derbe llaqtapi willakuspankum achkallataña iñichirqaku. Chaymantam kutirqaku Listra, Iconio hinaspa Antioquía llaqtakunaman.

²²Chay llaqtakunapim Jesucristoman iñikuqkunata imam creesqankupi qaqa hina sayanankupaq kallpancharqaku: Diospa munaychakuyninman yaykuqqa achka sasachakuytam ñakarinan, nispanku.

²³Sapa iglesiapim ancianokunata churarqaku, hinaspankum ayunowan chaynataq Diosta mañakuspanku iñisqanku Señorpa makinman churarqaku.

²⁴Pisidia lawninta pasaspankum Panfi-lia lawman chayarqaku.

²⁵Hinaspankum Diospa siminta Perge llaqtapi willakuruspanku Atalia llaqtaman uraykurqaku.

²⁶Chaymantam Antioquiaman barcopi kutirqaku. Chay llaqtamantam Diospa kuyapayakuyninta mañakuspanku llapa iñiqkuna allin noticiata willakamunankupaq paykunata kacharqaku.

²⁷Antioquiaman chayaruspankum llapa iñiqkunata huñururqaku, hinaspam willakurqaku payninkunatakama Diospa tukuy ima ruwamusqanta, chaynataq mana judío kaqkunamanpas iñikunankupaq punkuta Dios kichaykusqanmanta.

²⁸Chaypim iñiqkunawan unay watakunata qeparqaku.