Read CHUYA QELLQA La Biblia en Quechua de Ayacucho 2012 Hechos 15 Bible Online

Hechos 15 - CHUYA QELLQA La Biblia en Quechua de Ayacucho 2012 bible

Hechos 15

¹Chay punchawkunapim wakin runakuna Judeamanta Antioquia-man rispanku, llapa iñiqkunata kaynata yachachirqaku: Moisespa kamachisqanman hina mana señalachikuspaykichikqa manam salvakuyta atiwaqchikchu, nispanku.

²Chaymi Pablowan Bernabeyqa llum-payta paykunawan atipanakurqaku. Chayraykum Pablotawan Bernabeyta hinaspa wakin iñiqkuta akllarurqaku, Jerusalenman rispa apostolkunawan hinaspa chaypi kaq iñiqkunapa ancia-nonkunawan chay asuntomanta rima-munankupaq.

³Antioquía llaqtapi kaq iñiqkunapa kachasqanmi Jerusalén llaqtaman rirqaku, chaymi Fenicia lawninta hinaspa Samaria lawninta rispanku, mana judío kaqkunapas Diosman iñikusqankuta willakurqaku. Hinaptinmi lliw iñiqkuna chay willakuywan llumpayta kusikurqaku.

⁴Jerusalenman Pablowan Bernabé chayaruptinkum, llapallan iñiqkuna, apostolkuna hinaspa ancianokuna kusikuyllawanña chaskirqaku, chaymi Pablowan Bernabeyqa willakurqaku imayna payninkunatakama tukuy imata Dios ruwamusqanmanta.

⁵Ichaqa Jesucristoman iñiq wakin fariseokunam sayarispanku nirqaku: Mana judío kaqkunamanta iñiqkunapas qari kayninkupi señalasqam kananku, kamachinataqmi Moisespa leyninkunata kasukunankupaqpas, nispanku.

⁶Chaymi apostolkuna, hinaspa ancianokuna chay asuntomanta rimanankupaq huñunakurqaku.

⁷Llumpayta atipanakuptinkum Pedroñataq sayarispan nirqa: Wawqekuna, yachasqaykichikpi hinam qamkunamanta Dios akllawarqa Jesu-cristomanta allin noticiata mana judío kaqkunamanpas willakunaypaq, chaynapi paykunapas iñikunankupaq.

⁸Llapa runakunapa sonqon reqsiq Diosmi paykunamanpas Chuya Espiritunta qorqa ñoqanchikman hina, chaynapim qawachiwarqanchik paykunatapas chaskisqanta.

⁹Diosqa manam ñoqanchikmanpas nitaq paykunamanpas sayapakunchu, aswanqa iñikuptinkum sonqonkuta chuyanchaykun.

¹⁰Chaynaqa, ¿imanasqataq Diosta piñachinkichik, ñoqanchikpapas hinaspa ñawpaq taytanchikkunapapas mana apay atisqan llasaq qepita iñiqkunaman churkuspaykichik?

¹¹Yachasqanchikman hinaqa Señor Jesús kuyawasqanchikraykullam Diosqa salvawanchik, ñoqanchiktapas chaynataq paykunatapas, nispa.

¹²Hinaptinmi lliw upallaruspanku Bernabeytawan Pablota uyarirqaku, paykunam willakurqaku Diospa qosqan atiywan mana judío kaqkunapipas admirakuypaq milagrokuna ruwamusqankumanta.

¹³Paykuna willakuyta tukuruptinkum Jacobo nirqa: Wawqekuna, uyariykuwaychik.

¹⁴Simón Pedrom willawarqanchik mana judío kaqkunamanpas Dios watukuykusqanta, chaynapi paykunamantapas runankunata akllaykunanpaq.

¹⁵Chaykunaqa tupanpunim profetakunapa qellqasqanwan. Chuya Qellqam nin:

¹⁶“Kaykuna pasaruptinmi kutimusaq, hinaspaymi Davidpa tuñisqa wasinta hatarichisaq, perqankunata allichaykuspaymi musoqmanta hatarichisaq,

¹⁷chaynapi wakin runakunapas, ñoqapaq sapaqchasqa nacionkunapas, Señorta maskanankupaq.

¹⁸Ñawpaqmantaraq kaykunata reqsichiq Diosmi chaynata nin”, nispa.

¹⁹Chaynaqa, Diosman iñikuq mana judío kaqkunataqa amañayá iskayrayachiychikchu,

²⁰aswanqa kaynatayá qellqaykusunchik: “Amam mikunkichikchu idolokunaman ofrecesqa mikuytaqa, amam huchapakunkichikchu, amam mikunkichikchu yawartaqa nitaq ya-warpa pasasqan aychatapas”, nispan-chik.

²¹Ñawpaq tiempokunamantaraqmi, Moisespa leynintaqa sapa llaqtapi yachachinku, chaytaqa sinagogakunapi sapa samana punchawpi huñunakuspankum leenku, nispa.

²²Chaymi apostolkunawan ancia-nokuna hinaspa lliw iñiqkuna rima-nakurqaku, paykuna ukumanta akllaspa Pablotawan Bernabeytawan kuska-ta Antioquía llaqtaman kachanankupaq. Chaypaqmi akllarqaku Barsabaswan sutichasqa Judastawan Silasta, paykunaqa karqaku allin reqsisqa qarikunam.

²³Paykunawanmi kay cartata apachirqaku: “Apostolkunawan iñiqmasinchik ancianokunam rimaykamuykiku Antioquiapi, Siriapi hinaspa Ciliciapi kaq mana judío wawqe-panikunata.

²⁴Yachanikum ñoqaykuwan kaqkunamanta wakin runakuna mana kamachichkaptiyku qamkunaman hamusqanta. Paykunam yachachikuyninkuwan pantachisuspaykichik iskayrayachisurqankichik, señalachikunaykichikpaq hinaspa Moisespa leyninta kasukunaykichikpaq kamachisuspaykichik.

²⁵Chaymi lliwchayku tanteanakuruspayku runa-kunata akllarqaniku, chaynapi kuyas-qanchik Bernabeywan hinaspa Pablo-wan qamkunaman hamunanpaq.

²⁶Paykunaqa wañuytapas mana manchakuspam Señorninchik Jesucristota servinku.

²⁷Kachamusqayku Judaswan Silasmi qamkunaman tukuy kaykunata willasunkichik.

²⁸Chuya Espiritupaqpas chaynataq ñoqaykupaqpas allinpaq kasqanraykum sasa kamachikuykunataqa ama qonaykupaq tantearuniku, aswanqa kamachimuykikuqa kaykunallatam:

²⁹Amam mikunkichikchu idolokunaman ofrecesqa aychataqa, amam mikunkichikchu yawartaqa nitaq yawarpa pasasqan aychatapas, amataqmi huchapakunkichikchu. Allinpunim kaykunata kasukuptikichikqa. Qamkunañayá allinlla” niqta.

³⁰Chay riqkunam despedikuykuspanku Antioquía llaqtaman pasarqaku. Chaypim llapa iñiqkunata huñuruspanku cartata qorqaku.

³¹Chaymi iñiqkuna leeruspanku sonqonku tiyaykuptin llumpayta kusikurqaku.

³²Judaswan Silaspas profetakuna kasqankuraykum iñiqkunata kallpancharqaku, chaynapi qaqa hina sayanankupaq.

³³Chaypi unay punchawkuna karuptinkum, llapa iñiqkuna hawkallata aviarqaku, chaynapi Jerusalenmanta kachamuqkunaman kutinankupaq.

³⁴[2][Silasmi ichaqa hinapi qepakurqa].

³⁵Pablowan Bernabeypas Antioquía llaqtapim qeparqaku, hinaspam wakinkunapiwan Diospa palabranta yachachispanku Jesucristomanta allin noticiata willakurqaku.

³⁶Punchawkuna pasaruptinmi Berna-beyta Pablo nirqa: Huktawan kutisun Jesucristomanta willakusqanchik llaqtakunaman, chaynapi llapa iñiqkunapa imaynam kasqanta qawaykamunanchikpaq, nispa.

³⁷Chaymi Bernabeyqa munarqa Marcoswan sutichasqa Juanta pusanankupaq.

³⁸Pablopaqmi ichaqa mana allinpaq hinachu karqa, punta illayninkupi Panfilia lawmanta kutikuspa paykunawan mana-ña risqanrayku.

³⁹Llumpayta piñanaku-ruspankum iskayman rakinakururqaku. Bernabeymi Marcosta pusarikuspan barcopi Chipre lawman pasakurqa.

⁴⁰Pablo-ñataqmi reysinanpaq Silasta akllaykurqa, chaynapim Señorpa yanapakuyninta iñiqkuna mañaykapuptinku pasarqaku.

⁴¹Hinaspam Siria lawninta, Cilicia lawninta llapa iñiqkunata kallpanchastin rirqaku.