Read CHUYA QELLQA La Biblia en Quechua de Ayacucho 2012 Hechos 17 Bible Online

Hechos 17 - CHUYA QELLQA La Biblia en Quechua de Ayacucho 2012 bible

Hechos 17

¹Pablowan Silasmi Anfípolis hinaspa Apolonia llaqtanta pasaspanku Tesalónica llaqtaman chayarurqaku, chaypim judiokunapa sinagogan karqa.

²Chaymanmi Pablo costumbrenman hina sapa samana punchaw rirqa, hinaspam kimsa samana punchawpuni chaypi kaq judiokunawan atipanakurqaku.

³Qellqaman hina qawachispanmi yachachirqa Cristopa ñakarinanmantawan wañukuspan kawsarimunanmanta. Paykunatam nirqa: Qamkunaman kay willasqay Jesusqa salvaqninchik Cristopunim, nispa.

⁴Hinaptinmi wakin judiokuna iñikuspanku Pablomanwan Silasman hukllawakurqaku. Diosta yupaychaq Grecia law runakunapas achkallañam iñikurqaku, iñikurqakutaqmi achka ancha reqsisqa warmikunapas.

⁵Mana iñiq judiokunañataqmi celoso churakuspanku qella runakunatawan mana allin runakunata huñuruspanku chay llaqtapi hatun chaqwata hatarirachirqaku. Paykunam Jasonpa wasinman yaykuruspanku Pablotawan Silasta hurqoyta munarqaku llapa runakunaman entreganankupaq.

⁶Mana chaypi tarispankuñataqmi Jasontawan wakin iñiqmasinkunata autoridadkunaman aysarqaku kaynata qayaykachakustin: Kay runakunaqa llapallan llaqtakunapim runakunata engañamuchkanku, hinaspam kaymanpas chayaramunku.

⁷Paykunatam kay Jasonpas wasinpiraq samarachin. Paykunaqa llapallankum emperador Cesarpa kamachikuyninkunapa contranpi rimachkanku: “Huk reymi kachkan Jesús sutiyuq”, nispanku.

⁸Kamachikuqkunawan llapa runakunañataqmi chayta uyariruspanku aswanraq chaqwakurqaku.

⁹Hinaptinmi Jasonmantawan wakin iñiqkunamanta pagota chaskiruspanku kachaykurqaku.

¹⁰Iñiqkunañataqmi, chay tutalla Pablotawan Silasta Berea llaqtaman ayqechirqaku. Berea llaqtaman chayaruspankum judiokunapa sinagoganman yaykurqaku.

¹¹Chay Berea llaqtapi kaq judiokunaqa Tesalonicapi kaqkunamantapas allin yuyayniyuq runakunam karqaku. Paykunam kusikuyllawanña Diospa palabranta uyarispanku Chuya Qellqata sapa punchaw allinta qatiparqaku, cheqap kasqanta otaq mana cheqap kasqanta yachanankupaq.

¹²Chaynapim paykunamanta kaqkuna achkallaña iñikurqaku, iñikurqakutaqmi Grecia lawmanta kaq ancha reqsisqa warmikunawan achka qarikunapas.

¹³Ichaqa Tesalónica llaqtapi kaq judiokunam yacharurqaku, Berea llaqtapipas Diospa palabranta Pablo willakusqanta, chaymi pasaspanku llapa runakunata umachaspa chaqwachirqaku.

¹⁴Hinaptinmi llapa iñiqkuna Pablota lamar qochapa patanman ayqechirqaku, Silaswan Timoteom ichaqa hina Berea llaqtallapi qeparurqaku.

¹⁵Pablota pusaqkunam Atenas llaqtaman chayarachirqaku, chaymi paykuna kutiptinku Pablo kunakurqa: Silaswan Timoteo utqayman pasamuchunku, nispan.

¹⁶Pablom Silastawan Timoteota Atenas llaqtapi suyaspan, llumpay llakisqallaña karqa chay llaqtapi runakuna idolokunaman qokurusqankuta qawaspan.

¹⁷Chaymi sinagogaman rispa judiokunawan hinaspa Diosta yupaychaq runakunawan atipanakuq. Sapa punchawtaqmi plazakunaman riqkunawanpas atipanakuq.

¹⁸[3]Epicureokunapa chaynataq Estoicokunapa qatiqnin yachayniyuqkunapas Pablowanmi atipanakurqaku. Wakiqninkum nirqaku: ¿Imamantataq kay rimaysapa runa rimachkan? nispanku. Wakinñataqmi nirqaku: Sapaq dioskunamanta willakuqchusmi kay runaqa, nispanku. Chaynataqa nirqaku Jesusmanta allin noticiata willakuspa chaynataq wañusqakunapa kawsarimunanmanta yachachiptinmi.

¹⁹Chaymi Pablota pusarqaku huñunakunanku [4]Areopagoman, hinaspankum nirqaku: ¿Yaqachum willawankikuman chay musoq yachachikuy apamusqaykita?

²⁰Qamqa rimachkanki mana haykapipas uyarisqaykutam, chayraykum tukuy chaykunamanta yachaykuyta munaniku, nispanku.

²¹Atenas runakunaqa chaynataq chaypi yachaq huklaw llaqtayuq runakunaqa musoq yachaykunata uyariyllapi otaq rimayllapim ocupakuqku.

²²Pabloñataqmi Areopagopa chawpinpi sayaykuspan nirqa: Atenas runakuna, qawasqayman hinaqa llumpay religiosollañam kasqankichik.

²³Kunanmi hamuchkaspay dioskuna yupaychanaykichik sitionkuna qawamusqaypi huk altarta rikuramuni, chay altarpim kayna qellqasqa kasqa: “Mana reqsisqa Diospa Altarnin” niq. Chay mana reqsistin yupaychasqaykichik Diosmanta willanaypaqmi hamuni.

²⁴Chay Diosmi kay pachatapas chaynataq chaypi tukuy ima kaqkunatapas unancharqa, payqa kay pachapipas chaynataq hanaq pachapipas Diosmi, manam runakunapa ruwasqan templopichu yachan,

²⁵manataqmi runamantaqa imatapas necesitanchu, payqa lliwchanchikta kawsachiwaspanchikmi samaytapas chaynataq tukuy imakunatapas qowanchik.

²⁶Huk runallamantam tukuy hinastinpi kaq nacionkunata mirachirqa, chaynapi lliw kay pachapi yachanankupaq; paymi hayka watam kawsanankutapas señalarqa, chaynataq maypim yachanankutapas,

²⁷chaynapi llapchaykachaq hinañapas Diosta maskaspanku tarinankupaq. Payqa manam karupichu ñoqanchikmantaqa kachkan.

²⁸Cheqaptaqa paypa yanapakuyninwanmi kawsanchikpas, purinchikpas hinaspa kachkanchikpas. Chaynatam takiku-na ruwaq llaqtamasikichikkunapas qellqarqaku: “Diosmanta miramuqkunam kanchik”, nispanku.

²⁹Diospa mirayninkuna kachkaspaqa, amayá Diosmantaqa piensasunchu qorimanta, qollqemanta, rumimanta ruwasqa idolokuna hina kasqantaqa, chaykunataqa runakunallam tanteasqanman hina ruwarqaku.

³⁰Ñawpaq tiempokunapim runakunapa huchallikusqanta Dios pacienciakurqa, kunanmi ichaqa kay pachapi llapallan runakunata huchankumanta wanakunankupaq kamachin.

³¹Diosmi huk runata akllarun, paymi akllasqan punchawpi mana pimanpas sayapakuspa kay pachata juzganqa. Chayta llapa runakuna creenankupaqmi chay akllasqan Jesusta wañusqanmanta Dios kawsarichimurqa, nispa.

³²Wañusqakunapa kawsarimunanmanta uyariruspankum, wakin uyariqkuna asipayarqaku, wakinñataqmi nirqaku: Yapapiña chaykunamantaqa willawankiku, nispanku.

³³Chaymi Pablo paykunapa chawpinmanta lloqsikaramurqa.

³⁴Ichaqa wakin runakunam payta qatispanku iñikurqaku. Paykunamantam huknin karqa Dionisio, payqa karqa Areopagopi kamachikuqmi, iñikururqataqmi Dámaris sutiyuq warmipas, chaynataq wakin runakunapas.