Read CHUYA QELLQA La Biblia en Quechua de Ayacucho 2012 Hechos 19 Bible Online

Hechos 19 - CHUYA QELLQA La Biblia en Quechua de Ayacucho 2012 bible

Hechos 19

¹Corinto llaqtapi Apolos kachkaptinmi, Pabloñataq tukuy orqonta rispan Éfeso llaqtaman chayarurqa. Chaypim wakin iñiqkunawan tuparuspan

²tapurqa: ¿Iñikuspaykichikqa yaqachu Chuya Espirituta chaskirqankichik? nispa. Paykunañataqmi nirqaku: Manam uyariyllapas-uyarirqanikuchu Chuya Espiritumantaqa, nispanku.

³Pabloñataqmi huktawan tapurqa: Hinaptinqa, ¿ima bautismotataq chaskirqankichik? nispa. Paykunañataqmi nirqaku: Juanpa bautizasqallantam, nispanku.

⁴Chaymi Pabloñataq nirqa: Juanqa runakunataqa bautizarqa huchankumanta wanakuptinkum, chay-wanpas payqa yachachirqa qepan hamuqman iñikunankupaqmi. Juanpa qepan hamuqqa Jesusmi, nispa.

⁵Chayta uyariykuspankum Señor Jesuspa sutinpi bautizakurqaku.

⁶Hinap-tinmi hawankuman Pablo makinta churaykuptin, Chuya Espíritu paykunaman huntaykurqa, chaymi mana yachasqanku rimaykunapi rimaspa profetizarqaku.

⁷Chay bautizakuqkunaqa karqaku yaqa chunka iskayniyuq runakunam.

⁸Kimsa killapunim Pablo rirqa llapa judiokunapa sinagoganman, hinaspam paykunata iñichinanrayku, mana manchakuspa Diospa munaychakuyninmanta willakurqa.

⁹Ichaqa wakin runakunam sonqonkuta rumiyarachispanku mana iñiyta munarqakuchu, aswanraqmi paykunaqa Cristomanta allin noticiapa contranpi tukuy imaymanata llapa runakunaman nirqaku. Chaymi Pablo paykunamanta sapaqcharuspan llapa iñiqkunata rakirurqa Tiranno sutiyuq runapa escuelanman, chaypiñam sapa punchaw paykunata yachachirqa.

¹⁰Iskay watapuni chaypi yachachiptinmi Asia lawpi llapallan yachaqkunapas, judiokunapas, chaynataq mana judiokunapas Señormanta uyarirqaku.

¹¹Diospa atiyninwanmi Pablo ruwarqa runakunapa mana haykapipas rikusqan milagrokunata.

¹²Chaynapim Pablopa cuerponpa tupaykusqan pañuelotapas otaq pachatapas onqoqkunaman apaptinku sanoyaqku, mana allin espiritukunapas lloqsiqtaqmi.

¹³Chaypitaqmi kachkarqaku llaqtan-llaqtan purispa demoniokunata qarqoq judiokunapas. Paykunam Señor Jesuspa sutinta rimarispa qarqoyta munaspanku nirqaku: Pablopa willakusqan Jesuspa sutinpim kamachiki, lloqsiy kay runamanta, nis-panku.

¹⁴Chaynatam ruwarqaku Escevapa qanchis churinkunapas, Escevaqa karqa sacerdotekunapa kamachiqnin judiom.

¹⁵Chay mana allin espirituñataqmi paykunata nirqa: Jesustaqa reqsinim, yachanitaqmi pim Pablo kasqantapas, ¿qamkunaqa pitaq kankichik? nispa.

¹⁶Hinaptinmi chay mana allin espiritupa huntasqan runa pawaykuspan paykunata llumpa-llumpayta maqaparurqa, chaymi paykunaqa yawarninkupas suturisqa qalallaña chay wasimanta ayqekurqaku.

¹⁷Chaytam Éfeso llaqtapi kaqkuna judiopas mana judiopas yacharuspanku llumpayta mancharikururqaku, hinaspam Señor Jesuspa sutinta hatuncharqaku.

¹⁸Chaymi achka iñiqkuna hamuspanku llapa runakunaman willakurqaku, ñaw-paqta mana allinkuna ruwasqankumanta.

¹⁹Layqakunapas libronkuta apamuspankum llapa runakunapa qayllanpi kañarqaku, chay kañasqanku librokunapa precionmi hayparqa yaqa pichqa chunka waranqa jornalpa chaninman.

²⁰Chaynatam Diospa palabranta atiywanraq tukuy hinastinpi willakurqaku.

²¹Chaymantam Pablo tantearurqa Macedonia hinaspa Acaya lawninta pasaspan Jerusalenman riyta, hinaspam nirqa: Jerusalenmantam imaynapas Roma llaqtaman risaq, nispa.

²²Yanapaqnin Timoteotawan Erastota Macedonia lawman kachaspanmi payñataq Asia lawpi qeparirqa.

²³Chay punchawkunapim Cristopi iñiqkunapa contranpi hatun chaqwa hatarirurqa.

²⁴Chaytaqa qallaykachirqa Demetrio sutiyuq runam. Paymi Dianawan sutichasqa idolopa capillachankunata qollqemanta ruwaq, chaywanmi paywan llamkaqkunata achka qollqeta ganachiq.

²⁵Demetriom llamkaqmasinkunata hinaspa chayna oficioyuq runakunata huñuruspan nirqa: Qarikuna, yachasqaykichikpi hinapas, kay oficionchikwanmi allinta ganakunchik.

²⁶Ichaqa qamkunam rikuchkankichik hinaspa uyarichkankichik kay Pablopa rimasqanta, paymi nichkan: “Runapa ruwasqanqa manam dioskunachu”, nispa. Chaynata nispaqa manam pantachichkan kay Éfeso llaqtapi kaqkunallatachu, aswanqa lliw Asia lawpi kaqkunatawanmi.

²⁷Kaywanqa manam negociollanchikchu pierderunqa, aswanqa ancha reqsisqa Diana idolopa templonpas penqaypim rikurirunqa, chaynapim Asia lawpi kaqkunapa chaynataq lliw tukuy hinastinpi runakunapa yupaychasqan Dianapa ancha reqsisqa kayninpas yanqachasqa karunman, nispa.

²⁸Chayta uyariruspankum llapa runakuna llumpayta piñakururqaku, hinaspam qayaykachakurqaku: ¡Éfeso llaqtapi kaq mamachanchik Dianaqa hatunmi! nispanku.

²⁹Chaymi Éfeso llaqtapi runakuna hatun chaqwata hatarirachispanku, Pablopa puriqmasin Gayotawan Aristarcota hapirurqaku, paykunaqa karqaku Macedonia lawmanta kaqkunam; hinaspam llaqtapa huñunakunan teatroman aparqaku.

³⁰Hinaptinmi Pablo chayman yaykuyta munarqa llapa runakunata rimapayananpaq, ichaqa iñiqkunam harkakururqaku.

³¹Asia lawpi kaq wakin kamachikuqkunapas Pablopa amistadnin kasqankuraykum runakunata kacharqaku: Ama huñunakunanku teatromanqa riychu, nispanku.

³²Chay runakunapa huñunakusqankupim hatun chaqwata ruwaspanku imaymanata qayaykachakurqaku, yaqa llapallankum imapaqmi huñunakusqankutapas mana yacharqakuchu.

³³Judío runakunañataqmi llapa runapa chawpinmanta Alejandrota ñawpaqman tanqarqaku, payñataqmi llapa runakunapa qayllanpi defiendekuyta munaspan upallanankupaq makinwan señascharqa.

³⁴Ichaqa Alejandropa judío kasqanta yacharuspankum lliwchanku yaqa iskay horata qaparkacharqaku: ¡Éfeso llaqtapi kaq mamachanchik Dianaqa hatunmi! nispanku.

³⁵Hinaptinmi chay llaqtapa secretarion, chay runakunata upallarachispan nirqa: Llaqtamasiykuna, lliw runakunam yachanku kay Éfeso llaqtapi hatun mamacha Dianapa templon nanachikusqanchiktaqa, yachankutaqmi cielomanta uraykamuq imagennin nanachikusqanchiktapas.

³⁶Manam pipas kaykunataqa neganchu, chaynaqa hawkayaychik. Amayá imatapas ruwaychikchu mana sumaqta tantearispaqa.

³⁷Kay pusamusqaykichik runakunaqa manam ima mana allintapas mamacha Dianapa templonpa contranpiqa ruwarqakuchu, nitaqmi paypa contranpipas rimarqakuchu.

³⁸Sichum Demetriowan llamkaqmasinkuna pitapas quejakuyta munaptinqa kachkanmi juezkunawan gobernadorkuna, chaypiyá sapakama quejankuta allichamuchunku.

³⁹Imamantapas rimayta munaptikichikqa leyman hinayá hatun huñunakuypi sumaqta allichasun.

⁴⁰Mana chayqa kay huñunakusqanchikmanta mana imatapas niyta atiptinchikmi llapa kamachikuqkuna tumpaykuwachwanchik runakuna hatarichisqanchikmanta, nispan.

⁴¹Kaykunata niruspanmi llapa runakunata kamachirqa wasinkuman kutiku-nankupaq.