Read CHUYA QELLQA La Biblia en Quechua de Ayacucho 2012 Hechos 21 Bible Online

Hechos 21 - CHUYA QELLQA La Biblia en Quechua de Ayacucho 2012 bible

Hechos 21

¹Iñiqkunamanta rakikuykuspay-kum barcopi Cos islaman pasa-kurqaniku. Paqarinnintinñataqmi Rodas islaman chayaruspayku Pátara llaqtaman rirqaniku.

²Chay llaqtapim Feniciaman riq barcota tariruspayku chaywan pasarqaniku.

³Chipre islapa alleq lawnintam Siriaman rirqaniku, hinaspam cargakuna bajachina kaptin Tiro llaqtaman chayarqaniku.

⁴Chay llaqtapi iñiqkunata tariruspaykum paykunawan qanchis punchaw qeparqaniku. Pablotam paykuna Chuya Espiritupa rimarichisqan nirqaku: Ama riychu Jerusalén llaqtamanqa, nispanku.

⁵Chay qanchis punchaw pasaruptinmi lloqsirqaniku, hinaptinmi lliw iñiqkuna warmipas qaripas warmakunapas llaqtapa patankama qatiwarqaku aviawanankupaq, chaymi lamar qochapa patanpi qonqorakuykuspa Diosta mañakurqaniku.

⁶Chaymantam llapallayku abrazanakuykuptiyku wasinkuman kutikurqaku, ñoqaykuñataqmi barcoman qespiykuspa pasakurqaniku.

⁷Tiro llaqtamantam barcopi Tolemaida llaqtaman chayarqaniku, hinaspaykum iñiqkunata watukuspayku paykunawan huk punchaw qeparqaniku.

⁸Paqarinnintin punchawñataqmi Cesarea llaqtakama rirqaniku. Chaypim watukurqaniku evangelista Felipeta, payqa karqa Jerusalenpi ñawpaqtaraq akllasqanku qanchis diaconokunapa hukninmi. Paypa wasinpim samakurqaniku.

⁹Paypam karqa manaraq qari reqsiq tawa sipas churinkuna. Paykunaqa karqaku profetizaqkunam.

¹⁰Felipepa wasinpi unayña kachkaptiykum Judeamanta profeta Agabo chayaramurqa.

¹¹Paymi watukamuwaspanku Pablopa chumpinta hapiykuspa chakintawan makinkunata watakuruspan nirqa: Chuya Espiritum nin: “Jerusalenpi judiokunam kay chumpipa dueñonta kaynata wataruspa mana judío kaqkunaman entreganqaku”, nispa.

¹²Chayta uyarispaykum Cesareapi iñiqkunapiwan Pablota mañakurqaku amaña Jerusalén llaqtaman rinanpaq.

¹³Pabloñataqmi nirqa: ¿Imanasqataq waqaspaykichik llaki-chiwankichik? Manam watasqa kanallaypaqchu kachkani, ñoqaqa chayllam kachkani Señor Jesucristorayku Jeru-salenpi wañunaypaqpas, nispa.

¹⁴Mana imayna harkayta atispaykum, “Señorpa munasqanyá ruwasqa kachun” nispayku upallakurqanikuña.

¹⁵Chay punchawkunapa qepantam alistakuruspayku Jerusalén llaqtaman qespirqaniku.

¹⁶Riysiwarqakutaqmi Cesareamanta wakin iñiqkunapas, paykunam Chipre llaqtayuq Mnasonpa wasinman pusawarqaku, payqa unay watakunaña iñikuqmi karqa. Paypa wasinpim samakurqaniku.

¹⁷Jerusalenman chayaruptiykum kusikuyllawanña llapa iñiqkuna chaskiwarqaku.

¹⁸Paqarinnintin punchawtam Pablo ñoqaykuwan kuska rirqa Jacobo watukuq, chaypim kachkasqaku llapallan ancianokunapas.

¹⁹Pablom paykunata rimaykuspan willakuyta qallaykurqa, imaynam paynintakama mana judío kaqkunapi Diospa tukuy imakunam ruwamusqanmanta.

²⁰Uyariykuspankum Diosta yupaycharqaku, hinaspam Pablota nirqaku: Wawqelláy, yachasqaykipi hinapas waranqanpim judiokuna Jesucristoman iñikurunku, ichaqa hinallaraqmi Moi-sespa leyninman hapipasqa kachkanku.

²¹Paykunamanmi wakin runakuna qanmanta willarunku, huklaw nacionpi judiokunatas yachachinki Moisespa leyninta manaña kasukuspa amaña churinkutapas señalanankupaq, hinaspa costumbrenchikkunaman hina amaña kawsanankupaq.

²²¿Imanisuntaq llapa runakuna kay llaqtaman chayamusqaykita yacharuptinkuqa?

²³Chaynaqa, kaynatayá ruway: Kaypim ñoqanchikwan kachkan tawa runakuna Diosman prometekusqankuta cumpliqkuna.

²⁴Templomanyá paykunawan kuska rispayki costumbrenchikman hina chuyanchakamuychik, paykunapa gastonta pagaspayá chukchankuta rutuchimuy. Chaynapim lliw yachanqaku qanmanta tukuy ima rimasqankuqa mana cheqapchu kasqanta, aswanqa Moisespa leynin kasukusqaykita.

²⁵Ichaqa mana judío kaq iñiqkunamanqa, ñam cartata aparqankichikña, chaypim nirqanchik: “Amam mikunkichikchu idolokunaman ofrecesqa mikuytaqa, amam mikunkichikchu yawartaqa nitaq yawarpa pasasqan aychatapas, amataqmi huchapakunkichikchu”, nispanku.

²⁶Chaymi Pabloqa chay tawa runakunata pusarikuspan paqarinnintin punchaw chuyanchakurqaku, hinaspam temploman yaykurqa chuyanchakusqanku punchawkuna tukusqanta willakunanpaq, chaynataq haykapim ofrendankuta sapakama Diosman ofrecenankuta yachamunanpaq.

²⁷Qanchis punchaw chuyanchakuyninkuta tukuruchkaptinkuñam, Asia lawmanta kaq judiokuna Pablota tem-plopi rikururqaku, hinaspam llapa runa-kunata paypa contranpi hatarirachir-qaku. Hapiruspankuñataqmi

²⁸qayayka-chakurqaku: ¡Israelpa mirayninkuna yanapawayku! Kay runam tukuy hinastinpi purispan Israel runakunapa contranpi, Moisespa leyninpa contranpi hinaspa templopa contranpi yachachin. Kunanpas templomanmi mana judío kaq runakunata pusaykurun, hinaspam millakuypaqta kay templota ruwarun.

²⁹Chaynataqa nirqaku Éfeso llaqtayuq Trofimotawan Pablota Jerusalén llaqtapi rikurusqankuraykum, Trofimoqa manam judiochu karqa. Payta temploman Pablo pusarusqantam piensarqaku.

³⁰Llaqtapi runakunam chayta uyariruspanku llapallanku kallpamurqaku. Pablota hapiruspankum templomanta hawaman aysarqaku, hinaspam templopa punkunta apurawllamanña wichqarurqaku.

³¹Wañurachinankupaq kachkaptinkuñam Roma llaqtayuq soldadokunapa kamachiqninman willaykamurqaku: Jerusalenpi lliw runakunam chaqwata ruwachkanku, nispanku.

³²Paymi capitanninkunatawan soldadonkunata pusarikuspa kallpaylla chayarurqa, hinaptinmi payta soldadokunatawan rikuruspanku chay llapa runakuna Pablota maqachkaspanku sayarurqaku.

³³Soldadokunapa kamachiqninñataqmi asuykuspan Pablota presocharurqa, hinaspam iskay cadenawan watanankupaq kamachirqa, chaymantam tapurqa pim kasqanta, hinaspa imatam ruwarusqanta.

³⁴Llapa runakunañataqmi wakin hukta wakinñataq hukta qaparispa chaqwakurqaku, hinaptinmi capitanñataq chaqwakusqankuwan mana allinta uyarisqanrayku cuartelman Pablota pusanankupaq kamachirqa.

³⁵Cuartelpa gradasninman chayaruptinkum, llapa runakuna imatapas ruwarunankumanta Pablotaqa wantupiña soldadokuna apaykurqaku.

³⁶Llapa runakunañataqmi qepankuta qatispanku qaparirqaku: ¡Wañuchun! nispanku.

³⁷Pablota cuartelman apaykuchkaptinkum soldadokunapa capitanninta Pablo tapurqa: ¿Imallatapas rimariymanchu? nispa. Chaymi payñataq nirqa: ¿Griego rimayta yachankichu?

³⁸¿Ma-nachum qamqa kachkanki qayninpakunalla Roma nacionpa contranpi tawa waranqa runakunata hatarirachispa chunniqman pusaruq Egipto llaqtayuq runa? nispa.

³⁹Hinaptinmi Pabloñataq nirqa: Ñoqaqa Cilicia lawpi Tarso llaqtapi naceq judiom kani, llaqtayqa ancha reqsisqam. Ama hina kaspa saqeykuway llapa runakunata rimapayaykunaypaq, nispa.

⁴⁰Chay capitán “allinmi” niykuptinmi, gradaspi Pablo sayaykuspa runakunata makinwan señaschaspa upallachirqa. Upallaruptinkum hebreo rimayninkupi paykunata nirqa: