Read CHUYA QELLQA La Biblia en Quechua de Ayacucho 2012 Hechos 23 Bible Online

Hechos 23 - CHUYA QELLQA La Biblia en Quechua de Ayacucho 2012 bible

Hechos 23

¹Chaymi cortepi kamachikuqkunata allinta qawaykuspan Pablo nirqa: Wawqellaykuna, kunankamam sonqoy hawkalla karqa Diospa qayllanpi, nispa.

²Hinaptinmi Sumo sacerdote Ana-niasñataq, Pablopa waqtanpi kaqkunata kamachirqa siminpi laqechunankupaq.

³Pabloñataqmi nirqa: ¡Yaw iskay uya! Diosmi qamtapas laqechusunki, leyman hina juzgawanaykipaqmi chaypiqa tiyachkanki, ¿ima-nasqataq leyta mana kasukuspayki laqechuwanankupaq kamachinki? nispa.

⁴Chaypi kaqkunañataqmi Pablota nirqaku: ¿Diospa Sumo sacerdotentachu chaynata kaminki? nispanku.

⁵Pabloñataqmi nirqa: Wawqellaykuna, manam ñoqaqa ya-charqanichu sumo sacerdote kasqantaqa. Chuya Qellqapim nichkan: “Amam llaqtaykipi kamachikuqtaqa ñakankichu”, nispa.

⁶Chaypi wakin kamachikuqkunam saduceo partidomanta karqaku, wakinñataqmi fariseokunamanta. Chayta qawaykuspanmi Pabloqa hatunmanta qaparirqa: Wawqekuna, ñoqaqa fariseokunapa mirayninmi kani. Qamkunaqa wañuqkunapa kawsarichimunanmanta yachachisqaymantam juzgawachkankichik, nispa.

⁷Chaynata rimaruptinmi llapa fari-seokuna saduceokunawan atipanakuyta qallaykuspanku iskayman raki-nakururqaku.

⁸Saduceokunam yacha-chinku: “Wañuqkunaqa manam kaw-sarinqachu, manataqmi angelkunapas nitaq espiritukunapas kanchu”, nispanku. Fariseokunañataqmi chaykunapi creenku.

⁹Llumpayta atipanakuptinkum, fariseokunamanta Diospa leynin yacha-chiqkuna sayarispanku nirqaku: Manam kay runapiqa ima mana allintapas tarinikuchu, ichapas paytaqa huk angelpas otaq espiritupas rimapayarqa, nispanku.

¹⁰Llumpa-llumpayta atipanakuptinkum soldadokunapa kamachiqnin mancharikurqa: Pablotaqa tisaparunqakupascha, nispa. Hinaspam soldadokunata kamachirqa: Yaykuspaykichik imaynatapas Pablota hurqomuspaykichik cuartelman pusaychik, nispa.

¹¹Chay tutam Pabloman Señor rikuriykuspan nirqa: Pablo kallpanchakuy, kay Jerusalén llaqtapi ñoqamanta willakusqaykita hinam Roma llaqtapipas willakunayki, nispa.

¹²Paqarinnintin punchawmi wakin judiokuna tanteanakurqaku Pablota wañurachinankupaq, paykunam juraspanku ninakurqaku: Pablota wañurachinanchikkamam ama mikusunchu nitaq imatapas tomasunchu, mana chaynata ruwaspanchikqa ñakasqayá kasunchik, nispanku.

¹³Chay juramentaqkunaqa tawa chunka masninmi karqaku.

¹⁴Paykunam sacerdotekunapa kamachiqninkunaman chaynataq ancianokunaman rispanku nimurqaku: Ñoqaykum jurarqaniku Pablota wañu-chinaykukama imatapas mana mikunaykupaq nitaq tomanaykupaq, mana chaynata ruwaspaqa ñakasqam kasaqku.

¹⁵Chaynaqa, qamkunayá cortepi kamachikuqkunapiwan Roma soldadokunapa kamachiqninta mañamuychik, paqarinpuni Pablota qamkunaman pusamunanpaq. Pusachimunkichikqa: “Paymantam mastaraq yachaykuyta munaniku”, nispallam. Ñoqaykuñataqmi manaraq chayamuchkaptin wañurachinaykupaq chaylla suyasaqku, nispanku.

¹⁶Ichaqa chay rimasqankutam Pablopa paninpa wawan uyarirurqa, chaymi cuartelman rispan Pabloman willaykamurqa.

¹⁷Hinaptinmi huknin capitanta qayaykuspan Pablo nirqa: Kay joventa kamachiqnikiman pusay, willananmi kachkan, nispa.

¹⁸Kamachiqninman chay joventa pusaruspanmi, chay capitanqa nirqa: Carcelpi kaq Pablom qayaykuwaspan ruegakuwarqa kay joventa qanman pusamunaypaq, willasunaykis kachkan, nispa.

¹⁹Chaynata willaykuptinmi Pablopa sobrinonta chay capitanpa kamachiqnin makinmanta hapiykuspa huklawman pusaruspa tapurqa: ¿Imataq willawanayki kachkan? nispa.

²⁰Hinaptinmi chay jovenñataq nirqa: Judiokunam tanteanakurunku Pablota mañasunaykipaq, paykunam nisunki: “Paqarinyá Pablota corteman pusay, paymantam mastaraq yachaykuyta munaniku”, nispanku.

²¹Ichaqa amam creenkichu, tawa chunka masnin runakunam pakakuspa suyachkanku. Paykunam Diospa qayllanpi kaynata jurarunku: “Amam imatapas mikusunchu nitaq tomasunchu Pablota wañuchinanchikkama” nispanku. Listollañam suyachkanku pusachiptiki wañurachinankupaq, nispa.

²²Soldadokunapa kamachiqninñataqmi chay joventa aviaspan nirqa, kay niwasqaykitaqa amam pimanpas willakunkichu, nispan.

²³Soldadokunapa kamachiqninmi iskay capitanninkunata qayaykuspan kamachirqa: Iskay pachak soldadokunatawan qanchis chunka sillada soldadokunata hinaspa lanzawan peleaq iskay pachak soldadokunata alistaychik, chaynapi kunan tuta isqon horata Cesarea llaqtaman rinankupaq.

²⁴Alistaychiktaqyá caballotapas Pablo sillakunanpaq, chaynapi sanollata prefecto Felixman chayachinaykichikpaq, nispan.

²⁵Paykunawanmi kayna niq cartata apachirqa:

²⁶“Ancha reqsisqa prefecto Félix, ñoqa Claudio Lisiasmi saludamuyki.

²⁷Pusachimusqay runatam llapa judiokuna presocharuspanku wañurachiyta munarqaku. Ichaqa Roma nacionniyuq kasqanta yacharuspaymi, soldadokunawan rispay salvaramurqani.

²⁸Hinaspaymi imamantam acusasqankuta yachaykuyta munaspay judiokunapa cortenman pusarqani.

²⁹Chaypim yachamurqani leyninkupa contranpi yachachisqanmanta acusasqankuta. Ichaqa manam ima delitonpas kanchu wañunanpaq hinaqa nitaq carcelpi kananpaqpas.

³⁰Ichaqa wañurachinankupaq llapa judiokunapa tanteanakusqanta yacharuspaymi qanman pusachimuyki. Chaynallataqmi acusaqninkunatapas kamachini qampa qayllaykipiña acusanankupaq”, nispa.

³¹Llapa Soldadokunañataqmi kamachiqninkupa nisqanman hina, Pablota tutallan Antípatris llaqtakama pusarqaku.

³²Achikyaramuptinmi chakiwan riq soldadokuna cuartelninkuman kutikamurqaku, sillada tropakunañataqmi Pablowan rirqaku.

³³Cesarea llaqtaman chayaruspankum carta apasqankuta Gobernador Felixman qoykurqaku, Pablotapas entregaykurqakutaqmi.

³⁴Gobernador Felixñataqmi chay cartata leeruspan Pablota tapurqa maylaw llaqtayuq kasqanta. Cilicia lawmanta kasqanta yacharuspanmi

³⁵nirqa: Acusaqnikikuna hamuptinñam quejaykitaqa uyarisqayki, nispa. Hinaspam soldadokunata kamachirqa Pablota Herodespa palacionpi cuidanankupaq.